29 Oct 2016, 23:39
ކްރިސްޓިއާނޯ ރޮނާލްޑޯގެ ހެޓްރިކާ އެކު 4-1 ލަނޑުގެ ނަތީޖާއަކުން ޑިޕޯޓިވޯ އަލަވޭސް ބަލިކޮށް ރެއާލް މެޑްރިޑުން ލީގުގެ އެއްވަނައިގައި ތިން ޕޮއިންޓްގެ ލީޑެއް ނަގައިފިއެވެ.
ރެއާލް އެއްވަނައިގައި 24 ޕޮއިންޓާއި އެކު އޮތްއިރު ދެވަނައިގައި އެތުލެޓިކޯ މެޑްރިޑް އޮތީ 21 ޕޮއިންޓާއެކުއެވެ. ސެވިއްޔާއަށް ވެސް 21 ޕޮއިންޓް ލިބުނު ނަމަވެސް އެޓީމަށް ތިން ވަނަ ލިބެނީ ގޯލުގެ ތަފާތުންނެވެ. ސެވިއްޔާއަށް ދެވަނައަށް އަރަން ލިބުނު ފުރުސަތު ގެއްލުނީ މިރޭ އެޓީމް ކުޅުނު މެޗު 1-1ގެ ނަތީޖާ އަކުން ސްޕޯޓިންއާ އެއްވަރުވުމުންނެވެ.
ރަށުން ބޭރުގައި ރެއާލް ކުޅުނު މެޗުގައި ފުރަތަމަ ލަނޑެއް ކާމިޔާބްކޮށް ލީޑް ނެގީ އަލަވޭސް އެވެ. މެޗުގެ ފުރަތަމަ ކޮޅުގައި އެޓީމަށް ލީޑު ނަގައިދިނީ ޑޭވާސަންގެ ލަނޑުންނެވެ.
ރެއާލަށް މެޗުގެ ނަތީޖާ އެއްވަރުކޮށްދިނީ 17 ވަނަ މިނެޓްގައި އެޓީމަށް ލިބުނު ޕެނަލްޓީއެއްގައި ރޮނާލްޑޯއެވެ. ފުރަތަމަ ހާފް ނިމުމުގެ ކުރިން 33 ވަނަ މިނެޓްގައި ރޮނާލްޑޯ ވަނީ ރެއާލަށް ދެވަނަ ލަނޑު ކާމިޔާބުކޮށް ފުރަތަމަ ފަހަރަށް ލީޑް ނަގައިދީފައެވެ.
ރެއާލްގެ ލީޑް އިތުރަށް ފުޅާ ކުރުމަށް މެޗުގެ 79 ވަނަ މިނެޓްގައި އެޓީމަށް ޕެނަލްޓީއެއް ލިބުނު ނަމަވެސް ރޮނާލްޑޯ ފޮނުވާލި ޕެނަލްޓީ އަލަވޭސްގެ ކީޕަރު ވަނީ ހުޝިޔާރުކަމާ އެކު ދިފާއުކޮށްފައެވެ.
ރެއާލްގެ ތިން ވަނަ ގޯލު 84 ވަނަ މިނެޓްގައި އެޓީމަށް ކާމިޔާބުކޮށްދިނީ ދެވަނަ ހާފްގައި ބަދަލު ކުޅުންތެރިއެއްގެ ގޮތުގައި ކުޅުނެ އެރި އަލްވާރޯ މޮރާޓޯއެވެ.
މެޗުގައި ރޮނާލްޑޯގެ ހެޓްރިކް އޭނާ ފުރިހަމަކުރީ 88 ވަނަ މިނެޓްގައި މާސެލޯ ތަނަވަސްކޮށްދިން ފުރުސަތެއްގައެވެ.
ލީގްގައި މިރޭ އެތުލެޓިކޯ ކުޅުނު މެޗު އެޓީމުން ކާމިޔާބުކުރީ 4-2ގެ ނަތީޖާ އަކުން މަލާގާ ބަލިކޮށްފައެވެ. އެތުލެޓިކޯގެ ހަތަރު ލަނޑުގެ ތެރޭން ދެ ލަނޑު ކެވިން ގަމާރިއޯ ކާމިޔާބުކޮށްދިންއިރު އަނެއް ދެ ލަނޑު ކާމިޔާބުކޮށްދިނީ ފެރެއިރާ ކެރަސްކޯއެވެ.
މަލާގާގެ ދެ ލަނޑުގެ ތެރޭން ފުރަތަމަ ލަނޑު ސެންޑްރޯ ރަމިރޭޒް ކާމިޔާބު ކުރިއިރު އަނެއް ލަނޑު ކާމިޔާބްކޮށްދިނީ އިގްނާސިއޯ ކަމާޗޯއެވެ.