Last Updated: 9 year 4 week ago
ކުރީގެ ރައީސް އަދި ޕީޕީއެމްގެ ރައީސް މައުމޫން އަބްދުލް ގައްޔޫމް، ޕީޕީއެމްގެ އޮފީހުގައި މިރޭ ބާއްވަން އުޅުނު ޖަލްސާއަށް ނުދެވޭ ގޮތަށް އެ ސަރަހައްދު ފުލުހުން ބަންދުކޮށްފި އެވެ.
23:22
ރައީސް އަބްދުﷲ ޔާމީން އަބްދުލް ގައްޔޫމްގެ ސަރުކާރަށް ކުރެއްވި ތާއީދު، ރައީސް މައުމޫން އަނބުރާ ގެންދަވައިފި އެވެ.
މައުމޫން އެކަން ހާމަކުރެއްވީ، އެމަނިކުފާނު މިރޭ ބާއްވަން އުޅުނު ޖަލްސާއަށް ފުލުހުން ހުރަސް އެޅުމުން ޝީ ބިލްޑިންގައި ބޭއްވި ޕްރެސް ކޮންފަރެންސެއްގަ އެވެ.
އެމަނިކުފާނު ވިދާޅުވީ ރާއްޖޭގައި ކޮަރަޕްޝަންގެ މައްސަލަތައް އިތުރުވެފައިވާ ކަމަށާއި ބޭރުގެ ނުފޫޒު ރާއްޖޭގައި އިތުރުވަމުންދާ ކަމަށެވެ. އަދި ސަރުކާރުން ކުރަމުންދާ ކަންތައްތަކުގެ ބަދުނާމު އެމަނިކުފާނު ބޮލުގައި އެޅޭކަށް ބޭނުންފުޅު ނުވާ ކަމަށާއި އެހެން ކަމުން ރައީސް ޔާމީންގެ ސަރުކާރަށް ކުރެއްވި ތާއީދު އަނބުރާ ގެންދަވާ ކަމަށް އެމަނިކުފާނު ވިދާޅުވިއެވެ.
"މިހިނގާ ސަރުކާރަކީ ޕީޕީއެމްގެ ވިސްނުމާއި ޕީޕީއެމްގެ އާންމު އުސޫލުތަކާ އެއްގޮތަށް ހިންގާ ސަރުކާރެއް ނޫނޭ. އަދި މިސަރުކާރުން ހިންގާ ކަންތައްތައް، އަޅުގަނޑު މި މަގާމުގައި ހުރީމާ ކޮންމެވެސް ވަރަކަށް އަޅުގަނޑުގެ ބޮލުގައި މިޒިންމާ އެބަ އެޅޭ. އެހެންވީމާ އަޅުގަނޑު މި ގަސްތު ކުރަނީ މިހާތަނަށް ޕީޕީއެމްގެ މި ސަރުކާރަށް އަޅުގަނޑު ދެއްވާ ތާއީދު މިއަދުން ފެށިގެން އަނބުރާ ގެންދިއުމަށް،" ރައީސް މައުމޫން ވިދާޅުވިއެވެ.
ޕީޕީއެމްގެ ކުލައިގައި ޕީއޭގެ މީހުން އެ ޕާޓީގައި ތިބި ކަން ފާހަގަ ކުރައްވައި ވާހަކަފުޅު ދައްކަވަމުން މައުމޫން ވިދާޅުވީ ޕީޕީއެމްގައި މައްސަލަ އުފެދުނީ އެހެން ޕާޓީތަކުން މީހުން އެ ޕާޓީއަށް ވަނުމުން ކަމަށެވެ.
"މައްސަލަ ޖެހުނީ ޕީޕީއެމްގެ ފިކުރާ ހިލާފު، ޕީޕީއެމްގެ އުސޫލުތައް ގަބޫލު ނުކުރާ ބަޔަކު ޕާޓީ ތެރެއަށް ވަނުމުން. މިސާލަކަށް ޕީއޭގެ ވަރަށް ގިނަ މެމްބަރުން ޕީޕީއެމްގެ ތެރެއަށް ވަދެއްޖެ. ގިނަ މުއައްސަސާތަކުގައި ވެސް ތިބީ ޕީއޭގެ މެމްބަރުން. އެ މީހުން ދަނީ ޕީޕީއެމްގެ ހެދުން އަޅައިގެން އޮޅުވާލަމުން،" މައުމޫން ވިދާޅުވިއެވެ.
މައުމޫން ވިދާޅުވީ މި ސަރުކާރަކީ ޕީޕީއެމްގެ ފިކުރާއި އުސޫލުތަކާ އެއްގޮތަށް އަމަލުކުރަން ގެނައި ސަރުކާރެއް ކަމަށްވީ އިރު އެ ޕާޓީން އެންމެ ބޮޑު އަހަމިއްޔަތުކަމެއް ދެނީ ގައުމަށް ކަމަށެވެ. ނަމަވެސް ގައުމީ މަސްލަހަތު އެއްފަރާތްކޮށް، މި ސަރުކާރުން އިސްކުރަމުން ދަނީ އަމިއްލަ މަސްލަހަތު ކަމަށް އެމަނިކުފާނު ވިދާޅުވިއެވެ.
މީގެ އިތުރުން އެމަނިކުފާނު ވިދާޅުވީ ޕީޕީއެމްގެ ސަރުކާރަކުން ރައްޔިތުންނަށް ގެއްލުން ދޭން އެއްވެސް ކަމެއް ނުކުރާނެ ކަމަށެވެ. ނަމަވެސް މިސަރުކާރުން ވަނީ ރައްޔިތުންނަށް ގެއްލުން ލިބޭ ގޮތަށް އެތައް ގާނޫނެއް ފާސްކޮށް، ރައްޔިތުންނަށް ގެއްލުންވާ ފަދަ އެތައް އަމަލެއްކޮށްފައި ކަމަށްވެސް މައުމޫން ވިދާޅުވިއެވެ.
"އަޅުގަނޑު ތާއީދުކުރާ ޕާޓީއަކުން އެފަދަ ކަމެއް ކުރާކަށް ބޭނުމެއް ނޫން. އެއީ އެ ކަންކަމުގެ ޒިންމާ އަޅުގަނޑު އުފުލަން ޖެހޭނެތީ،" މައުމޫން ވިދާޅުވިއެވެ.
ރައީސް މައުމޫން ވިދާޅުވީ ސަރުކާރަށް ކުރާ ތާއީދު އަނބުރާ ގެންދެވި ނަމަވެސް ޕީޕީއެމްގައި ދެމިހުންނަވާނެ ކަމަށެވެ. އަދި އެޕާޓީއަކީ ކާމިޔާބު ޕާޓީއެއްގެ ގޮތުގައި ދަމަހައްޓަން މަސައްކަތް ކުރައްވާނެ ކަމަށްވެސް އެމަނިކުފާނު ވިދާޅުވިއެވެ.
ޕީޕީއެމްގައި މައްސަލަ އުފެދުނީ އެހެން ޕާޓީތަކުން މީހުން އެ ޕާޓީއަށް ވަނުމުން ކަމަށް ވިދާޅުވެ، ރައީސް މައުމޫން ވިދާޅުވީ ޕީޕީއެމްގެ ކުލައިގައި ޕީއޭގެ މީހުން އެ ޕާޓީގައި ތިބި ކަމަށް.
"އިސްލާހު" މި ބަސް މިހާރު ވެފައި ވަނީ ބައެއް މީހުންގެ ހިތްތަކަށް ނުތަނަވަސްކަން ގެނެސްދޭ ބަހަކަށް. އެ ބަސް ބުނާ މީހަކީ އެމްޑީޕީ މީހަކަށް ހަދާ.
ތިން ބާރު އެއްވެފައިވާ ކަމަށް މައުމޫން ވިދާޅުވެއްޖެ. އެންމެ ފަރާތެއްގެ އަޑަށް ތަބާވާން މަޖުބޫރުވެފައިވާ ކަމަށް.
އެތެރޭގެ ގޮންޖެހުންތަކަކީ ޕާޓީގެ އަސާސީ ގަވާއިދާ ހިލާފުވުމުން ދިމާވާ މައްސަލައެއް ކަމަށް ވިދާޅުވި. މި ދަނޑިވަޅުގައި ޕާޓީގެ އަސާސީ މަގުސަދުތައް ހަނދާން ކުރަންޖެހޭނެ ކަމަށް ވިދާޅުވި. ޕާޓީގެ އަސާސީ ގަވާއިދުގެ 10 ވަނަ މާއްދާގައި ބަޔާންކޮށްފައިވާ އެ ޕާޓީގެ މަގުސަދުތައް އެމަނިކުފާނު ވިދާޅުވި.
ކޮރަޕްޝަން ނައްތާލުމާއި އެންމެންގެ މެދުގައި ހަމަހަމަކަން ދެމެހެއްޓުމާއި ސަރުކާރު ޒިންމާދާރު ކުރުވުމާއި ދިވެހިންގެ އަންމަތިން ގެއްލިފައިވާ ތަކެތި ހޯދުމަކީ އެ ޕާޓީގެ މަގުސަދުތައް ކަމަށް ވިދާޅުވި.
ޕާޓީގެ އަސާސީ ގަވާއިދުގައިވާ މަގުސަދުތައް ހާސިލު ކުރެވޭތޯ މައުމޫން ސުވާލު ކުރެއްވި.
ޕީޕީއެމަށް ފަސް އަހަރު ފުރުމާ ގުޅިގެން އެ ޕާޓީގެ އާންމު މެމްބަރުންނަށް މަރުހަބާ ދަންނަވަމުން މައުމޫންގެ ވާހަކަފުޅު ފައްޓަވައިފި.
ޖަލްސާ ނުބޭއްވުމާ ގުޅިގެން ޝީ ބިލްޑިންގައި ރައީސް މައުމޫން ނޫސްވެރިންނާ ބައްދަލު ކުރުމަށް ތައްޔާރުވެއްޖެ. އެމަނިކުފާނު މިހާރު ވަނީ ޝީ ބިލްޑިންއަށް ވަޑައިގެންފައި.
މިއީ ފުލުހުން އެޅި ހުރަހެއް ނޫން، މިއީ ޔާމީން ފެކްޝަނުން އެޅި ހުރަހެއް: އުމަރު
ވީޓީވީއަށް ފޯނުން ދެއްވި އިންޓަވިއުއެއްގައި އުމަރު ނަސީރު ވިދާޅުވީ "ކޮންމެ ވެސް ސިފައެއްގައި" އަހަރީ ދުވަހުގެ ޖަލްސާ ބާއްވާނެ ކަމަށް. މިރޭގެ ޖަލްސާއަށް ހުރަސް ޕީޕީއެމްގެ ފެކްޝަނުން ކަމަށާއި އެކަން ކުރީ ރައީސް މައުމޫނަށް އޮތް ތާއިދު ފެނިދާނެތީ ކަމަށް އުމަރު ވިދާޅުވި.
މިއީ ފުލުހުން އެޅި ހުރަހެއް ނޫން. މިއީ ރައީސް ޔާމީންގެ ފެކްޝަނުން އެޅި ހުރަހެއް. މިކަން މިކުރަނީ ރައީސް މައުމޫންގެ ތާއިދު ފެނިފާނެތީ.އުމަރު ނަސީރު
ރާއްޖެ ޓީވީއަށް ދެއްވި އިންޓަވިއުއެއްގައި ފާރިސް ވިދާޅުވީ ޕީޕީއެމް އޮފީސް ހުންނަ ސަރަހައްދަށް ނުވަދެވޭ ގޮތަށް ބަންދު ކުރީ ސަލާމަތީ ސަބަބުތަކަށްޓަކައި ކަމަށް ފުލުހުން ބުނެފައިވާ ކަމަށް.
ރައީސް މައުމޫންގެ ދަރިކަލުން، އަދި މަޖިލީހުގެ ދިއްގަރު ދާއިރާގެ މެމްބަރު ފާރިސް މައުމޫން އެ ސަރަހައްދަށް ވަޑައިގަތުމުން ވެސް އޭނާއަށް ވެސް ޕީޕީއެމްގެ އޮފީހަށް ވަދެވަޑައިނުގެންނެވޭނެ ކަމަށް ފުލުހުން ވަނީ އަންގާފައި.
ބޮޑުތަކުރުފާނު މަގު، ހ. ތެމާގައި ހިންގާ ޕީޕީއެމްގެ އޮފީހުގައި ޖަލްސާ ބާއްވަން ނިންމާފައި ވަނިކޮށް، މިރޭ 8:30 އެހާކަންހާއިރު ފުލުހުން ވަނީ އެ ސަރަހައްދަށް އާންމުންނަށް ނުވަދެވޭ ގޮތަށް ބަންދުކޮށްފައި. އެގޮތުން އެ އޮފީސް ކުރިމަތިން ބޮޑުތަކުރުފާނު މަގު، އުތުރާއި ދެކުނު ފަރާތުގައި ފުލުހުން ވަނީ ބެރިކޭޑު ޖަހައި މަގު ބަންދުކޮށްފައި. އަދި ޕީޕީއެމް އޮފީހާ ދިމާލުން އާޓްފިޝަލް ބީޗު ސަރަހައްދަށް ވެސް މީހުން ވަނުން ވަނީ މަނާކޮށްފައި.
