27 Oct 2016, 23:47
ރާއްޖެއިން ބައިވެރިވެފައިވާ އދ. ގެ މޫސުމާ ބެހޭ މުއާހަދާ ޔުނައިނެޑް ނޭޝަންސް ފްރޭމްވާކް ކޮންވެންޝަން އޮން ކްލައިމެޓް ޗޭންޖް (ޔޫއެންއެފްސީސީ) އަށް ހުށަހެޅުމަށް ތައްޔާރު ކުރި ކްލައިމެޓް ޗޭންޖުގެ ދެ ވަނަ ނޭޝަނަލް ކޮމިއުނިކޭޝަން ރިޕޯޓް ނެރެފި އެވެ.
މިއީ 15 އަހަރަށްފަހު ނޭޝަނަލް ކޮމިއުނިކޭޝަން ރިޕޯޓް ނެރޭ ފުރަތަމަ ފަހަރެވެ. ޔޫއެންއެފްސީސީ އެ ރިޕޯޓް އެންމެ ފުރަތަމަ ހުށަހެޅީ 2001 ވަނަ އަހަރު އެވެ.
ކްލައިމެޓް ޗޭންޖުގެ ދެ ވަނަ ނޭޝަނަލް ކޮމިއުނިކޭޝަން ރިޕޯޓް ނެރެދެއްވީ މިއަދު ބޭއްވި ރަސްމިއްޔާތެއްގައި އެންވަޔަރަންމަންޓް މިނިސްޓަރު ތާރިގު އިބްރާހީމެވެ.
ރަސްމިއްޔާތުގައި ވާހަކަފުޅުދައްކަވަމުން މިނިސްޓަރު ވިދާޅުވީ، މިއަދު ނެރުނު ރިޕޯޓަކީ ބައިނަލްއަގުވާމީ ގޮތުން ރާއްޖެއިން ކުރަމުންގެންދާ މަސައްކަތަށް ލިބިގެންދާ އިތުރު ބާރަކަށް ވެގެންދާނެ ކަމަށެވެ.
އެ ރިޕޯޓްގެ ސަބަބުން ކުދި ޖަޒީރާ ގައުމުތަކުގެ ނާޒުކުކަން ދުނިޔެއަށް އިތުރަށް ހާމަވެގެންދާނެ ކަމަށް ވިދާޅުވި އެވެ.
އެގޮތުން މިއަދު ނެރުނު ރިޕޯޓުގެ މަގުސަދަކީ މޫސުމަށް އަންނަ ބަދަލުތަކުގެ ސަބަބުން ކުރާ ނޭދެވޭ އަސަރުތަކާއި ބެހޭ މައުލޫމާތާއި ކުރަމުންދާ އަސަރުތައް ކުޑަކުރުމަށް ކުރެވެމުންދާ މަސައްކަތްތަކާ ބެހޭ ގޮތުން އދ. އަށް މައުލޫމާތު ފޯރުކޮށްދިނުމެވެ.
މިއަހަރުގެ ރިޕޯޓުގައި މޫސުމަށް އަންނަ ބަދަލުތަކުގެ ސަބަބުން ދިމާވެދާނެ ނުރައްކާތަކުގެ މައްޗަށާއި ރައްކާތެރިވުމުގެ ގޮތުން ގައުމީ ފެންވަރުގައި ކުރެވެމުންދާ މަސައްކަތްތަކުގެ މައްޗަށް ވަނީ އަލިއަޅުއްވާލާފައެވެ.
އދ. ގެ މޫސުމަށް އަންނަ ބަދަލުތަކާބެހޭ އަހަރީ ޖަލްސާތައް އަންނަ ހަފްތާގައި މޮރޮކޯގައި ފެށުމަށް ވަނީ ހަމަޖެހިފައެވެ. އަދި މިދިޔަ އަހަރު އެކުލަވާލެވުނު ޕެރިސް އެގްރީމަންޓަށް ގާނޫނީ ހައިސިއްޔަތު އަންނަ ނޮވެމްބަރު މަހުގެ ހަތަރު ވަނަ ދުވަހު ލިބޭނެ އެވެ.