27 Oct 2016, 12:33
ހދ. މަކުނުދޫ ރަށު ކައުންސިލުން އިސްނަގައިގެން، ޖަމާޢަތްތެރިކަން ދަސްކޮށްދޭ ކޯހެއް އެރަށުގައި ކުރިޔަށް ގެންގޮސްފިއެވެ. އިސްލާމިކް މިނިސްޓްރީން ބުނާ ގޮތުގައި މިއީ މިނިސްޓްރީ ފިޔަވާ އިތުރު ބަޔަކު އަމިއްލަ އިސްނެގުމެއްގެ މަތިން މި ކޯސް ކުރިޔަށް ގެންދިޔަ ފުރަތަމަ ފަހަރެވެ.
އިސްލާމިކް މިނިސްޓްރީން މައުލޫމާތު ދޭ ގޮތުގައި، މަކުނުދޫގައި މި ކޯސް ހިންގައިދިނީ، އިސްލާމިކް މިނިސްޓްރީން މާލޭގައި ބޭއްވި ޖަމާޢަތްތެރިކަމުގެ ކޯހެއްގައި ބައިވެރިވި އެރަށުގެ އާންމު ރައްޔިތެކެވެ.
އަބްދުލްރައްޒާގު މުހައްމަދު ނަމަކަށް ކިޔާ މި މީހާ، މާލޭގައި ޖަމާޢަތްތެރިކަމުގެ ކޯސް ފުރިހަމަކޮށް، އޭނާއަށް ދަސްވި އެއްޗެހި އޭނާގެ ރަށުގެ ރައްޔިތުންނަށް ފޯރުކޮށްދިނުމަށް އަމިއްލަ ގޮތުން ކޯހެއް ހިންގައިދިނީ އެރަށު ކައުންސިލާ ގުޅިގެންނެވެ. އެއް މަސް ދުވަހަށް ކުރިޔަށް ގެންދިޔަ މި ކޯހުގައި 19 މީހަކު ބައިވެރިވިއެވެ.
އުތުރުގެ ރަށްރަށަށް އިސްލާމިކް މިނިސްޓަރު ޑރ. އަހްމަދު ޒިޔާދު ބާގިރު ކުރައްވަމުން ގެންދަވާ ދަތުރުފުޅުގައި މަކުނުދުއަށް ވަޑައިގެންނެވި އިރު، މިނިސްޓަރު ވަނީ މި ކޯސް ނިންމުމުގެ ރަސްމިއްޔާތުގައި ބައިވެރިވެފައެވެ.
އެ ރަސްމިއްޔާތުގައި އިސްލާމިކް މިނިސްޓަރު ޒިޔާދު ވިދާޅުވީ، މާތް ނިޔަތެއްގައި، ގިނަ ބަޔަކަށް މަންފާ ލިބޭނެ ގޮތަށް ޢިލްމު ފޯރުކޮށްދިނުމަށް މިފަދަ ކަމެއް ހިންގައިދިނީތީ އެކަމަށް ޝުކުރުވެރިވާ ކަމަށެވެ.
މިނިސްޓަރ ވިދާޅުވީ، މި ޒަމާނުގައި ފައިސާއަށް ބެލުމެއް ނެތި ކަންކަން ކޮށްދިނުމަކީ ވަރަށް މަދުން ކުރާ ކަމެއް ކަމަށެވެ.
އަދި ޚާއްސަކޮށް އެކަކު އަނެކަކަށް ޢިލްމު ފޯރުކޮށް، އުނގަންނައިދިނުމަކީ މިހާރު ފައިސާއަށް ކުރާ ކަމަކަށް ވާ އިރު، އެކަން މީގެ 30 އަހަރު ކުރިން އޮތީ އެހެން ނޫންކަން މިނިސްޓަރު ފާހަގަކުރައްވައި، މަކުނުދޫގައި ހިންގި ކޯހުގައި ކިޔަވައިދިން އަބްދުލްރައްޒާގަށް ވަނީ ތައުރީފު ކުރައްވައިފައެވެ.
އަދި ޖަމާޢަތްތެރިކަމާއި، ކަށުކަމާކެމީގެ ކަންކަމާ ބެހޭ ފުރިހަމަ މައުލޫމާތު ހިމެނޭ ފޮތެއް، މި ކޯހުގައި ބައިވެރިވި 19 ބައިވެރިންނަށް ކައިރި މުސްތަގުބަލެއްގައި ފޮނުވައިދެއްވާނޭ ކަމުގެ ވައުދު ވެސް މިނިސްޓަރު ވެވަޑައިގަތެވެ.