26 Oct 2016, 14:20
ސިޔާސީ ޕާޓީތަކަށް ވަނުމަށް މިއަހަރު ހުށަހަޅާފައިވަނީ 8000 އެއްހާ ފޯމް ކަމަށް އިލެކްޝަންސް ކޮމިޝަނުން ބުނެފިއެވެ.
އިލެކްޝަންސް ކޮމިޝަންގެ މެމްބަރު އަހުމަދު އަކުރަމް ސަން އަށް ވިދާޅުވީ، ސިޔާސީ ޕާޓީތަކަށް ވަނުމަށް އެދި މިއަހަރު މިހާތަނަށް ހުށަހަޅާފައިވަނީ 8036 ފޯމުކަމަށެވެ. ފިންގާ ޕްރިންޓް ޖެހުމަށް ދިން މުއްދަތުގެ ތެރޭގައި ހުށަހެޅީ އެންމެ 225 ފޯމް ކަމަށްވެސް އަކްރަމް ވިދާޅުވިއެވެ.
އިލެކްޝަން ކޮމިޝަނުން ފަހުންއިއުލާންކުރި ދަފްތަރާއެކު ޕާޓީތަކުގެ މެމްބަރުންގެ އަދަދަށް ވަނީ ބޮޑެތި ބަދަލުތަކެއް އިސްފައެވެ. ޕީޕީއެމްގެ މެމްބަރުންގެ އަދަދު ގިނަވެ އެޕާޓީ އެންމެ ބައިގިނަ ޕާޓީއަށްވީއިރު ދެން ހުރި ހުރިހާ ޕާޓީއަކުން ވަނީ މެމްބަރުންގެ އަދަދު ދަށަށް ގޮސްފައެވެ. ހާއްސަކޮށް އޭރު އެންމެ ބޮޑު ޕާޓީގެ ގޮތުގައި އޮތް އެމްޑީޕީން ދެބައިކުޅަ އެއްބަޔަށްވުރެ މެމްބަރުންގެ އަދަދު ވަނީ ދަށަށް ގޮސްފައެވެ.
އެމްޑީޕީގެ ސެކްރެޓަރީ ޖެނެރަލް އަނަސް އަބްދުލް ސައްތާރު ވިދާޅުވީ، އެޕާޓީގެ މެމްބަރުންގެ އަދަދު ދަށްކޮށްފައިވަނީ ގިނަ އަދަދެއްގެ ފޯމްތައް ރިޖެކްޓްކޮށްގެން ކަމަށެވެ. ފުލުހުން ލަށްވައި ފިންގާ ޕްރިންޓްތައް ޔަގީން ކުރަމުންދާއިރު ފޯމްތަކުގައި ފިންގާ ޕްރިންޓް ވެރިފައިކުރުމުގައި މައްސަލަތަކެއް އުޅޭ ކަމަށް އޭނާ ވިދާޅުވިއެވެ.
ޖުމްހޫރީ ޕާޓީ އަދި އަދާލަތު ޕާޓީންވެސް ބުނަނީ އެޕާޓީތަކުން ފޮނުވި ފޯމްތައް ރިޖެކްޓްކޮށްފައިވާ ކަމަށެވެ.
އެކަންކަމާ ގުޅިގެން އިލެކްޝަން ކޮމިޝަންގެ މެމްބަރު އަހުމަދު އަކުރަމް ވިދާޅުވީ ފޯމްތައް ރިޖެކްޓް ވަނީ އުސޫލާ ހިލާފްވުމުން ކަމަށާއި ނަމަވެސް ފޯމް ރިޖެކްޓްވާ އަދަދު ކުރިއާ އަޅައިބަލާއިރު މިހާރު ބޮޑުތަން ދަށްވެފައިވާ ކަމަށެވެ.