26 Oct 2016, 10:27
ވޮޝިންޓަން (އޮކްޓޯބަރު 26): އެމެރިކާގެ ޑިމޮކްރަޓިކް ޕާޓީގެ ރިޔާސީ ކެނޑިޑޭޓު ހިލަރީ ކްލިންޓަންގެ ހާރިޖީ ސިޔާސަތުގެ ސަބަބުން ތިން ވަނަ ބޮޑު ހަނގުރާމަ ފެށިދާނެ ކަމަށް ރިޕަބްލިކަން ޕާޓީގެ ރިޔާސީ ކެނޑިޑޭޓު ޑޮނަލްޑް ޓްރަމްޕް ވިދާޅުވެއްޖެ އެވެ.
ރޮއިޓާސްއަށް ދެއްވި އިންޓަވިއުއްގައި ވާހަކަފުޅު ދައްކަވަމުން ޓްރަމްޕް ވަނީ ސީރިއާ މައްސަލަ ހައްލު ކުރުމަށް ހިލަރީ ރާއްވަވާފައިވާ ސިޔާސަތަށް ފާޑު ވިދާޅުވެފަ އެވެ. ހިލަރީ ވަނީ ސީރިއާގެ ރައީސް ބައްޝާރުލް އައްސަދު މަގާމުން އިސްތިއުފާ ދެއްވުމަށް އެއްބަސް ކުރުވުމަށާއި ސީރިއާގައި "ނޯ ފްލައި ޒޯން"ތައް ގާއިމު ކުރުމަށް އިސްކަން ދެއްވާނެ ކަމަށް ވިދާޅުވެފަ އެވެ.
ނަަމަވެސް ޓްރަމްޕް ވިދާޅުވި ގޮތުގައި އެމެރިކާ އިން ރައީސް ބައްޝާރުލް އަސަދުއަށް ވުރެ ބޮޑަށް އިސްކަން ދޭން ޖެހެނީ އައިއެސްއާ ހަނގުރާމަ ކުރުމަށެވެ.
"އަޅުގަނޑުމެން ސަމާލުކަން ދޭންވީ އައިއެސްއަށް. ސީރިއާއަކަށް ނޫން. ހިލަރީ ކްލިންޓަން ވިދާޅުވާ ގޮތަށް އަމަލު ކުރުމުން ތިން ވަނަ ބޮޑު ހަނގުރާމަ ފެށޭނީ. (އެމެރިކާއިން) ހަނގުރާމަ ކުރަނީ (ހަމައެކަނި) ސީރިއާއަކާ ނޫން، ހަނގުރާމަ ކުރަނީ ސީރިއާ އާއި ރަޝިއާ އާއި އީރާނާ،" ޓްރަމްޕް ވިދާޅުވި އެވެ.
އަދި ޓްރަމްޕް ވަނީ ރަޝިއާ އަކީ ނިއުކްލިއާ ހަތިޔާރު ގެންގުޅޭ ގައުމެއް ކަމަށާއި "އެފަދަ ހަތިޔާރު ގެންގުޅޭ ކަމަށް ބުނާ އެހެން ގައުމުތަކާ ހިލާފަށް ރަޝިއާގެ ހަތިޔާރަކީ ބޭނުން ކުރެވޭނެ ހަތިޔާރު،" ކަމަށް ވިދާޅުވެފަ އެވެ.
މީގެ އިތުރުން ޓްރަމްޕް ވަނީ މީގެ ކުރިން ރަޝިއާގެ ރައީސް ވްލަޑިމިއާ ޕުޓިންއަށް ވަރަށް ބޮޑަށް ފާޑު ވިދާޅުވެފައިވާ ހިލަރީއަށް ޕުޓިންއާ މަޝްވަރާ ކުރުންތައް ނުބޭއްވޭނެ ކަމަށް ދޭހަވާ ގޮތަށް ވާހަކަފުޅު ދައްކަވާފަ އެވެ. އަދި ރިޕަބްލިކަން ޕާޓީގެ ލީޑަރުންގެ ތާއިދާ އެކު ޓްރަމްޕަށް އިންތިހާބު ކާމިޔާބު ކުރެވޭނެ ކަމަށް ވިދާޅުވެފަ އެވެ.
ހިލަރީގެ ސިޔާސަތަށް ޓްރަމްޕް ފާޑު ވިދާޅުވި ނަމަވެސް އައިއެސްއާ ހަނގުރާމަ ކުރާނެ ގޮތުގެ ސްޓެރެޓެޖީ އެއް ނުވަތަ ސީރިއާ ހަނގުރާމަ ނިމުމަކަށް ގެންނަވާނެ ގޮތުގެ ރޭވުންތަކެއް ޓްރަމްޕް އިއުލާން ކުރައްވާފައި ނުވެ އެވެ. ނަމަވެސް އޭނާ ވަނީ ސީރިއާ ހަނގުރާމައިގައި ރަޝިއާއާ އެއްބައިވުމާ ބެހޭ ގޮތުން ވާހަކަފުޅު ދައްކަވާފަ އެވެ. ރަޝިއާ އިން ދަނީ ސީރިއާގެ ރައީސް ބައްޝާރުލް އައްސަދާ ގުޅިގެން އައިއެސްއާ ދެކޮޅަށް ހަނގުރާމަ ކުރަމުންނެވެ. (ބީބީސީ)