25 Oct 2016, 13:17
ޖެނުއަރީމަހު ބާއްވާ ލޯކަލް ކައުންސިލްތަކުގެ އިންތިހާބުގައި ވޯޓުލާން ދާއިރު ވިސްނާފައި ވޯޓުލުމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމު ރައްޔިތުންނަށް އިލްތިމާސް ކުރައްވައިފި އެވެ.
ރައީސް ޔާމީން ހދ. އަދި ށ. އަތޮޅަށް ކުރައްވަމުން ގެންދަވާ ދަތުރުފުޅުގައި ހދ. ކުރިނބީއަށް ވަޑައިގެން ވަނީ އެރަށުގެ ބަނދަރު ރަސްމީކޮށް ހުޅުއްވާ ދެއްވާފައެވެ. އެރަށުގައި ބޭއްވި ހާއްސަ ރަސްމިއްޔާތެއްގައި ވާހަކަފުޅުދައްކަވަމުން ރައީސް ޔާމީން ވިދާޅުވީ "ސިކުނޑި ހިފައިގެން ވޯޓުލާން ދިއުމަށް" އެދޭ ކަމަށެވެ.
ހެޔޮގޮތް ވިސްނައި، ވެފައި ހުރި ކަންތައްތަކަށް ރިއާޔަތް ކުރުމަށްފަހު، އިންތިހާބު ކުރަން އުޅޭ މީހެއްގެ ކިބައިން އަންނާނީ ހިކާވަރެއްގެ ފަސޭހައެއްތޯ ވިސްނައި ވޯޓު ދިނުމަށް ރައީސް ޔާމީން ވަނީ އެދިއްލައްވާފައެވެ.
"އަޅުގަނޑުމެންނަށް ފެނިއްޖެ ލޯކަލް ކައުންސިލް އިންތިހާބުތައް. އަޅުގަނޑުމެން ލޯކަލް ކައުންސިލަރުން އިންހާބުކޮށްގެން ރަށުގެ ތަރައްގީއަށް ބޭނުންވާ ކިތަންމެ ބޮޑެތި ކަންތައްތައްވެސް ސިޔާސީ ފިކުރުގެ ތަފާތާ ހެދި ރައްޔިތުންނަށް ބޭނުންވާ ގޮތަށް އެކަންކަން ފުދިގެން ނެތް ކިތަންމެ ހާލަތެއް އަޅުގަނޑުމެގެ މި ކުރު މާޒީގެ ތެރޭގަައި އަޅުގަނޑުމެންނަށް މިހިރީ ފެނިފައި،" ރައީސް ޔާމީން ވިދާޅުވި އެވެ.
ރައްޔިތުންގެ ތަރައްގީއަށް ސަރުކާރާ ގުޅިގެން މަސައްކަތްކުރާނެ ބަޔަކު މި ލޯކަލް ކައުންސިލް އިންތިހާބުގައި އިންތިހާބު ކުރަންޖެހޭ ކަމަށް ރައީސް ޔާމީން ވަނީ ވިދާޅުވެފައެވެ.
ސަރުކާރު ޖަވާބުދާރީ ކުރުވަން ކަމަށްބުނެ ސިޔާސީ ބައެއް ފަރާތްތަކުން މުޅިންވެސް ދައްކަނީ ސަރުކާރު ވައްޓާލާ ވާހަކަ ކަމަށާއި ސަރުކާރުން ތައްރައްގީއަށްކުރާ މަސައްކަތްތައް ވޭތޯ ނުވަތަ ނޫންތޯ ސުވާލު ނުކުރާކަމަށް ރައީސް ޔާމީން ވިދާޅުވި އެވެ.
"އަބަދުވެސް އަބުރާ ބެހޭ ބިލުގައި ހުރި އަދަބުތައް ބޮޑުވެގެން. ކުއްވެރިންގެ ހައްގުތައް ގެއްލިގެން އެހައްގުތައް ހޯދައިދިނުމުގައި. މިކަހަލަ ކޮންމެސް ކަމެއްގައި މިއުޅެނީ. މުޅިންވެސް ވީރާނާ ކުރަނިވި ކަންކަމުގައި މިއުޅެނީ،" ރައީސް ޔާމީން ވިދާޅުވި އެވެ.
ރައީސް ޔާމީން ހދ. އަދި ށ. އަތޮޅަށް ކުރައްވަމުން ގެންދަވާ ދަތުރުފުޅުގައި މިހާރު ވަޑައިގެންހުންނެވީ ހދ. ހިރިމަރަދުގަވެ. އޭގެ އިތުރުންވެސް ބައެއް ރަށްރަށަށް ވަޑައިގަތުމަށް ވަނީ ހަމަޖެހިފައެވެ.