17 Oct 2016, 22:35
ދުނިޔޭގެ އެންމެ ބޮޑު ކެމިކަލް ކާރުހާނާ، ބީއޭއެސްއެފްގެ މައި ކާރުހާނާގައި ގޮވުމެއް ގޮވައި އަލިފާން ރޯވެ، އެކަކު މަރުވެއްޖެ އެވެ.
ހާދިސާއާ ގުޅިގެން ޖަރުމަނުގެ ލުޑްވިގްސްހާފެންގައި ހުންނަ ބީއޭއެސްއެފްގެ މައި ކާރުހާނާގެ ސައިޓް ޗީފް އުވި ލީބެލްޓް ވިދާޅުވީ، މިއަދު ހިނގި އެ ހާދިސާގައި ހަ މީހަކަށް އަނިޔާވެ، އިތުރު ހަ މީހަކު ގެއްލިފައިވާ ކަމަށެވެ.
އަދި ހާދިސާއާ ގުޅިގެން ސަލާމަތަށްޓަކައި ހާދިސާ ހިނގި ކާރުހާނާ ކައިރީގައި ހުރި 14 ފެސިލިޓީއެއް ބަންދުކޮށްފައިވާ ކަމަށް އޭނާ ވިދާޅުވި އެވެ.
ބީއޭއެސްއެފް އިން ބުނީ، ގޮވުމެއް ގޮވާފައިވަނީ ޝިޕިންއަށް ކެމިކަލް އަޅަމުންދިޔަ ސަޕްލައި ލައިނެއްގައި ކަމަށާއި ނަމަވެސް ގޮވުން ގޮވަން މެދުވެރިވި ސަބަބެއް އަދި ނޭނގޭ ކަމަށެވެ.
ލުޑްވިގްސްހާފެންގެ އުތުރުގައިގައި ހުންނަ ބީއެސްއެފްގެ މައި ކާރުހާނާގައި މިއަދު ހިނގި ގޮވުމުގެ ސަބަބުން އަލިފާން ރޯވެ ކަޅުދުން ފެތުރިގެންދިޔައިރު، އެ ސިޓީގެ އާއްމުންނަށް ވަނީ ބޭރަށް ނުނިކުތުމަށް ނަސޭހަތްތެރިވެ، ދޮރުތަކާއި ކުޑަ ދޮރުތައް ބަންދުކޮށްގެން ތިބުމަށް އަންގައިފައެވެ.
ނަމަވެސް، ބައެއް އާއްމުންގެ ފަރާތުން ނޭވާލުމުގެ ދަތިތަކެއް އުޅޭކަމަށް ރިޕޯޓްތައް ބުނާއިރު، ބީއޭއެސްއެފް އިން ބުނީ، ވައިގެ ތެރޭގައި ވިހައިގެ އެއްވެސް އަސަރެއް ނެތް ކަމަށް އެ ކުންފުނިން ނެގި ސާމްޕަލްތަކުން ދައްކާ ކަމަށެވެ.