17 Oct 2016, 19:52
ރާއްޖޭގެ އެކި ކަންކޮޅުތަކުގައި ފުޓްބޯޅަ ތަރަށްގީކޮށް ކުރިއެރުވުމަށް މާޒިޔާ ސްޕޯޓްސް އެންޑް ރެކްރިއޭޝަން ކްލަބުން ކުރިއަށްގެންދާ މަޝްރޫއުގެ ދަށުން ހދ. ނޮޅިވަރަމްގައި ގާއިމުކޮށްފައިވާ އެ ކްލަބުގެ ފުޓްބޯޅަ އެކެޑަމީ މިއަދު ހަވީރު ރަސްމީކޮށް ހުޅުވައިފިއެވެ.
ނޮޅިވަރަމުގައި މިއަދު ހަވީރު ބޭއްވި ހާއްސަ ހަފްލާއެއްގައި އެލްމޯބައިލް މާޒިޔާ ފުޓްބޯލް އެކެޑަމީ ރަސްމީކޮށް ހުޅުވައި ދިނީ ގައުމީ ޓީމުގެ ކެޕްޓަން އަދި މާޒިޔާގެ ފޯވަޑް އަލީ އަޝްފާގު (ދަގަނޑޭ)އެވެ.
އެ ހަފްލާގައި ދަގަނޑޭގެ އިތުރުން، މާޒިޔާ ފުޓްބޯޅަ އެކެޑަމީގެ ހެޑްކޯޗް އިބްރާހީމް ޝާފިއު އާއި، ނޮޅިވަރަމަށް ނިސްބަތްވާ މާޒިޔާގެ ޑިފެންޑަރު އަދި އެ ޓީމުގެ ވައިސް ކެޕްޓަން އަމްދާން އަލީ (އެންޑީ) ވެސް ބައިވެރިވިއެވެ.
މާޒިޔާގެ އޮފިޝަލަކު ސަންއަށް ވިދާޅުވީ، އެ ކްލަބުގެ ފަރާތުން މި ހަފްތާގެ ތެރޭގައި އިތުރު ދެ ރަށެއްގައި ވެސް އެކެޑަމީ ހުޅުވާނޭ ކަަމަށެވެ. އެގޮތުން، މާދަމާ ހަވީރު، ނ. ހޮޅުދޫގައި މާޒިޔާގެ ފުޓްބޯޅަ އެކެޑަމީއެއް ހުޅުވުމަށް ހަމަޖެހިފައި ވާއިރު އޭގެ އަނެއް ދުވަހު، ރ. ދުވާފަރުގައި ވެސް އެ ކްލަބުގެ ފުޓްބޯޅަ އެކެޑަމީއެއް ހުޅުވާނޭ ކަމަށް އޮފިޝަލް މައުލޫމާތު ދެއެވެ. އަދި ވަރަށް އަވަހަށް ބ. ތުޅާދޫގައި ވެސް މާޒިޔާގެ ފުޓްބޯޅަ އެކެޑަމީއެއް ހުޅުވާނޭ ކަމަށް އޮފިޝަލް ވިދާޅުވިއެވެ.
"މިއަދު ރަސްމީކޮށް އެކަޑެމީ މި ހުޅުވުނީ، ހދ. ނޮޅިވަރަމުގައި، މާދަމާ ހަވީރު ނ. ހޮޅުދޫގައި އެކެޑަމީއެއް ހުޅުވޭނެ، އެއީ މާޒިޔާއާ އެރަށު ބޭސް ޖަމިއްޔާ ގުޅިގެން. ދެން ބުދަ ދުވަހު ރ. ދުވާފަރުގައި އަޅުގަނޑުމެންގެ އެކެޑަމީއެއް ހުޅުވާނެ. މި ހުރިހާތަނެއް ވެސް ހުޅުވާން އެރައްތަކަށް އަޝްފާގު ދާނެ،" މާޒިޔާގެ އޮފިޝަލް ވިދާޅުވިއެވެ.
އަތޮޅުތެރޭގެ ހަތަރު ރަށެއްގައި މާޒިޔާއިން ގާއިމުކޮށްފައިވާ ފުޓްބޯޅަ އެކެޑަމީތައް ރަސްމީކޮށް ހުޅުވުމުގެ މަސައްކަތް ކުރިއަށްދާއިރު، މިހާރުވެސް އެއިން ކޮންމެ އެކެޑަމީއެއްގައި 50 ކުދިން ތަމްރީނުކުރަމުން ދާކަމަށް މާޒިޔާއިން މައުލޫމާތުދެއެވެ.
"އެކެޑަމީތަކަށް ބޭނުންވާ، ކޯޗުންނާއި ސްޓަފުން އަޅުގަނޑުމެން ހަމަޖައްސައިދޭނީ. އަދި އެކަޑެމީތަކަށް ބޭނުންވާ ބޯޅަފަދަ ތަކެތިވެސް. ދެން އެރަށުގެ ކައުންސިލާއި ޒުވާނުންނާ ގުޅިގެން އެތަންތަން ހިންގާ އެބޭފުޅުން،" މާޒިޔާގެ އޮފިޝަލް ވިދާޅުވިއެވެ.
މިހާރު ކުރިއަށްދާ މި ސީޒަންގެ ދިވެހި ޕްރިމިއަރ ލީގުގެ ޗެމްޕިއަންކަންވެސް ކަށަވަރުކޮށްފައިވާ މާޒިޔާއިން ދަނީ އެ ކްލަބާއި އަދި ރާއްޖޭގެ ފުޓްބޯޅަ ތަރައްގީ ކުރުމަށް ގިނަ މަސައްކަތްތަކެއް ކުރަމުންނެވެ.
ރާއްޖޭގެ ފުޓްބޯޅައިގެ މައި އިދާރާ، އެފްއޭއެމްގެ އެއްބާރުލުމާއެކު ފުރަތަމަ ޑިވިޝަންގައި ހިމެނޭ ކޮންމެ ކްލަބަކުން ވެސް ފުޓްބޯޅަ އެކެޑަމީއެއް ހިންގުމަށް ފެށި މަޝްރޫއުގެ ދަށުން، މާޒިޔާއިން ދަނީ މާލޭގައިވެސް އެކަޑެމީއެއް ހިންގަމުންނެވެ. އެގޮތުން މާލޭގައި ހިންގާ މާޒިޔާ ފުޓްބޯޅަ އެކެޑަމީގައި ވެސް މިހާރުވެސް 150އަށް ވުރެ ގިނަ ކުދީން ދަނީ ތަމްރީނު ހަދަމުންނެވެ.