17 Oct 2016, 20:48
މަޝްހޫރު ދީނީ އިލްމުވެރިޔާ އިސްމާއީލް އިބްނު މޫސާ މެންކު އަންނަ މަހު ރާއްޖެ ވަޑައިގެން ތަގުރީރުކުރެއްވުމަށް ހަމަޖެހިއްޖެއެވެ.
އިރުމަތީ އެފްރިކާ އަދި އެނޫން ސަރަހައްދުތަކުގެ ގައުމުތަކުގައިވެސް ގިނަ ތަގުރީރުތަކެއް ދެއްވަމުން ގެންދަވާ ޝެއިޚް މުފްތީ އަކީ ޒިމްބާބުވޭގެ މުސްލިމު އާބާދީއަށް އިސްލާމީ ތައުލީމު ފޯރުކޮށްދޭ މަޖްލީސުއް އުލަމާގެ ދަށުން ހިންގަމުން އަންނަ އިސްލާމީ އެޑިއުކޭޝަން ސެންޓަރު ނުވަތަ ދާރުލް އިލްމުގެ ޑިރެކްޓަރެވެ.
ޝެއިހް މުފްތީ މެންކް ރާއްޖޭގައި ތަގުރީރު ކުރައްވާނީ ދީނީ ހޭލުންތެރިކަން އިތުރުކޮށް ތަރައްގީ ކުރުމަށް މަސައްކަތްކުރާ ދީނީ ޖަމިއްޔާއެއް ކަމަށްވާ ޖަމިއްޔަތުއް ރަހްމާއިން ޒުވާނުންނަށް ބާއްވަމުން އަންނަ "އިލްމު ޓޯކްސް"ގެ މިއަހަރުގެ ވޯކްޝޮޕްގައެވެ.
އިލްމު ޓޯކްސްގެ ސިލްސިލާ ވޯކްޝޮޕްތައް ފަށާފައިވަނީ މިދިޔަ އަހަރު އެވެ. އެގޮތުން ރާއްޖޭން ބޭރުގެ ޝެއިހުންނާއި އުސްތާޛުންގެ ތެރެއިން 15 ބޭފުޅުން މިދިޔަ އަހަރުގެ ވޯކްޝޮޕްގައި ބައިވެރިވެފައިވާ ކަމަށް ރަހްމާ ޖަމިއްޔާއިން ބުނެއެވެ.
ގައުމީ ޔުނިވާސިޓީގެ ދަރިވަރުންގެ ގުޅުމުންނާއި ރާއްޖޭގެ އިސްލާމީ ޔުނިވާސިޓީގެ ދަރިވަރުންގެ ގުޅުމުގެ އިތުރުން މޯލްޑިވިއަން ޔޫތު ލީގް (މައިލް) ގުޅިގެން މިއަހަރު ކުރިއަށްގެންދާ އިލްމު ޓޯކްސް ހަރަކާތުގައި ޝެއިހް މުފްތީ ތަގުރީރު ކުރައްވާ ސެޝަން އޮންނާނީ އަންނަ މަހުގެ ކުރީކޮޅުގައެވެ.
ނަމަވެސް ތަގުރީރު ބާއްވާނެ ތަނަކާއި ތާރީހެއް ފަހުން އިއުލާންކުރާނެ ކަމަށް ރަހްމާ ޖަމިއްޔާއިން ބުނެއެވެ.
މީގެ ކުރިން ވެސް ރާއްޖޭގައި ދަރުސް ދެއްވައި، ގިނަ ބައެއް ލޯތްބާއި އިޙްތިރާމް ހޯއްދަވާފައިވާ މުފްތީ މެންކް މިއަހަރުގެ އިލްމު ޓޯކްސްގައި ތަގުރީރު ކުރައްވަން ހަމަޖެހިފައިވަނީ އެއް މުސްލިމަކު އަނެއް މުސްލިމެއްގެ މައްޗަށް އަދާކުރަންޖެހޭ ހައްގުތަކުގެ މައްޗަށެވެ.
އިސްލާމިކް ޔުނިވާސިޓީ އޮފް މަދީނާއިން ޝަރީއާ ލޯއިން ޑިގްރީއެއް ހާސިލްކުރައްވައިގެން ހުންނެވި ޝެއިހް މުފްތީ ވަނީ އިސްލާމިކް މިނިސްޓްރީން ކުރިއަށްގެންދިޔަ "ދަ މެސެޖް ޕްރޮގްރާމް"ގެ ތެރެއިން މިދިޔަ އަހަރުގެ އޭޕްރިލް މަހު ވެސް ރާއްޖެ ވަޑައިގެން ދަރުހެއް ދެއްވާފައެވެ.