17 Oct 2016, 15:29
އޯގަނައިޒޭޝަން ފޯ އިސްލާމިކް ކޯޕަރޭޝަންގެ ބައްދަލުވުމެއްގައި ބައިވެރިވެވަޑައިގަތުމަށް ފޮރިން މިނިސްޓަރު ޑރ. މުހައްމަދު އާސިމް ރާއްޖެއިން ބޭރަށް މިއަދު ފުރާވަޑައިގަތުމާ ގުޅިގެން، އެ މިނިސްޓްރީގެ ހިންގުން ޔޫތު މިނިސްޓަރު އިރުތިޝާމް އާދަމާ ހަވާލު ކުރައްވައިފި އެވެ.
އިރުތިޝާމްއަކީ މީގެ ކުރިން ޑިޕްލޮމެޓެއްގެ ގޮތުގައި މަސައްކަތް ކުރައްވައި، ޖެނީވާގައި ހުންނަ ރާއްޖޭގެ ދާއިމީ މަންދޫބުގެ ގޮތުގައި ވެސް ހުންނެވި ފަރާތެކެވެ.
ޔޫތު މިނިސްޓަރު އިރުތިޝާމް އާދަމް -- ސަން ފޮޓޯ/ ފަޔާޒު މޫސާ
ފޮރިން މިނިސްޓަރު ޑރ. އާސިމް މިއަދު ފުރާވަޑައިގަތީ އޯއައިސީގެ ކައުންސިލް އޮފް ފޮރިން މިނިސްޓަރސްގެ 43 ވަނަ ބައްދަލުވުމުގައި ބައިވެރިވެވަޑައިގަތުމަށް، އުޒްބަކިސްތާނަށެވެ.
އެ ގައުމުގެ ވެރިރަށް ޓަޝްކެންޓުގައި މި ބައްދަލުވުން ފަށާނީ މާދަމާއެވެ. އަދި ބުދަ ދުވަހުގެ ނިޔަލަށް އެ ބައްދަލުވުންތައް ކުރިޔަށް ދާ ގޮތަށް ވަނީ ހަމަޖެހިފައެވެ.
އޯއައިސީގެ ޑިރެކްޓަރު ޖެނެރަލް އޮފް ޕޮލިޓިޗަލް އެފެއާޒް ވިދާޅުވީ، އޯއައިސީ ފޮރިން މިނިސްޓާސް ކައުންސިލުގެ ބައްދަލުވުމަށް ފަލަސްތީނާއި، ސީރިއާއާއި، ޔަމަނާއި، ލީބިޔާއާއި މާލީގެ އިތުރުން ސެންޓްރަލް އެފްރިކަން ރިޕަބްލިކްގައި ހިނގަމުންދާ ކަންކަމާ ގުޅޭގޮތުން ގަރާރުތަކެއް ހުށެހެޅޭނެ ކަމަށެވެ.
އަދި އޯއައިސީގައި ނުހިމެނޭ ގައުމުތަކުގައި މުސްލިމުންނަށް ކުރިމަތިވަމުންދާ މައްސަލަތަކާއި، ޓެރަރިޒަމާއި ހައްދުފަހަނަ އެޅުމާއި އިސްލާމޯފޯބިއާގެ އިތުރުން ހަތިޔާރު މަދުކުރުމާ ގުޅޭ ގަރާރުތަކެއް ވެސް މި ބައްދަލުވުމުގައި ހުށަހެޅިގެން ދާނެ ކަމަށް އޯއައިސީގެ ސެކްރެޓަރީ ޖެނެރަލް އޮފް ޕޮލިޓިކަލް އެފެއާޒް ވިދާޅުވިއެވެ.
މި ބައްދަލުވުމުގެ އެންމެ މައިގަނޑު ކަމަކީ، އޯއައިސީގެ އިދާރާއިން އެކުލަވާލާފައިވާ ގަރާރުތަކެއްގެ މައްޗަށް އެކުލެވޭ "ޓަޝްކެންޓް މުއާހަދާ"އާ މެދު ގޮތެއް ނިންމުމެވެ. މި މުއާހަދާގައި، ސިޔާސީ، އިންސާނީ އަދި އިގްތިސާދީ ކަންކަމާ ގުޅޭ ގަރާރުތަކެއް ހިމެނޭ އިރު، 2025 ވަނަ އަހަރާ ހަމައަށް އޯއައިސީއިން ކުރާނެ މަސައްކަތްތަކާ ގުޅޭ ޑޮކިއުމެންޓްތަކެއް ވެސް ހިމެނޭނެއެވެ.