16 Oct 2016, 21:57
ޕީޕީއެމްގެ މުސްތަޝާރު އަދި ރައީސުލް ޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމްގެ ޒައާމަތުގައި އެ ޕާޓީއަށް ލޯކަލް ކައުންސިލް އިންތިހާބު ކާމިޔާބު ކުރެވޭނެ މަގުފަހިކޮށްދޭނެ ކަމަށް ހޯމް މިނިސްޓަރު އަޒްލީން އަހްމަަދު ވިދާޅުވެއްޖެ އެވެ.
ޕީޕީއެމްގެ ޕާލިމެންޓަރީ ގުރޫޕާއި ކައުންސިލްގެ ގިނަ މެމްބަރުންތަކެއް މިއަދު ބޭއްވި ނޫސްވެރިންގެ ބައްދަލުވުމެއްގައި އަޒްލީން ވިދާޅުވީ، ކުރިއަށް އޮތް ކައުންސިލް އިންތިހާބުގައި ޕީޕީއެމްއާ ގުޅިވަޑައިގަންނަވަން ބޭނުންފުޅުވާ އަތޮޅުތެރޭގައި ތިއްބެވި ބޭފުޅުންނަށް އެ އިންތިހާބުގައި ކުރިމަތި ލުމަށް ހުޅުވާލައި ކޮށްފައިވާ އިއުލާނުގައި ދީފައިވަނީ، ވަރަށް ކުޑަ މުއްދަތެއް ކަމަށާއި އެގޮތަށް ތާރީހުތައް އިއުލާނު ކުރުމުން ޕާޓީއަށް ތާއީދުކުރައްވާ އެތައް މެމްބަރުންނަކަށް ފުރުސަތު ގެއްލިގެން ގޮސްފައިވާ ކަމަށެވެ.
އަދި އެގޮތަށް ނިންމާފައިވަނީ ރައީސް މައުމޫން ހުންނަވައިގެން ބޭއްވި ޕާޓީ ކައުންސިލްގެ ބައްދަލުވުމެއްގައި ކަމަށް އަޒްލީން ވިދާޅުވި އެވެ.
ނަމަވެސް ރައީސް ޔާމީންގެ ލީޑާޝިޕްގައި ޕާޓީ އިތުރަށް ހަރުދަނާކޮށް ޕާޓީގެ ހިންގުން ހަރުދަނާ ވެގެންދާނެކަމަށާއި ކައުންސިލް އިންތިހާބު ކާމިޔާބު ކުރުމަށް މަގުފަހިކޮށްދޭނެ ކަމަށް އަޒްލީން ވިދާޅުވި އެވެ.
"މުޅިން ތަފާތު ގޮތަކަށް އިއުލާނު ކުރެވިގެން ދިޔަ ތާރީހްތަކަކީ އަޅުގަނޑުމެންގެ މިދެންނެވި ތާއީދު ކުރައްވާ އެތައް އެތައް މެމްބަރުންނަށް ފުރުސަތުވެސް ގެއްލިގެން ދިޔަ ކަމަކަށް ވާތީވެ، ﷲގެ ރަހްމަތްފުޅާ އެކު އިރާދަކުރެއްވިއްޔާ ރައީސުލްޖުމްހޫރިއްޔާގެ ލީޑާޝިޕްގަ މި ޕާޓީ އިތުރަށް ހަރުދަނާކޮށް، މިދެންނެވި ގޮތުގެ މަތިން އަޅުގަނޑުމެން ތާރީހުތައް އިއުލާނުކޮށް ކާމިޔާބު ގޮތެއްގައި މިކަން ކުރެވޭނެ މަގު ފަހިކޮށްދޭނަން،" އަޒްލީން ވިދާޅުވި އެވެ.
އަޒްލީން ވިދާޅުވީ ރައީސް ޔާމީންގެ ލީޑާޝިޕްގެ ދަށުން މިއަދުން ފެށިގެން ޕާޓީ ހަރަކާތްތެރި ނުވެ އޮތްއޮތުން ނިމުމަކަށް އައިސް ޕާޓީ ވަރުގަދައަށް ހިނގައިގަންނާނެ ކަމަށެވެ.
"އިރާދަކުރެއްވިއްޔާ ޕާޓީ ހަރަކާތްތެރި ނުވެ އޮތްއޮތުން މިއަދުން ފެށިގެން ވަރުގަދައަށް ހިނގައިގަންނާނެ. މާލޭގައިވެސް އަދި އަތޮޅުތެރޭގައިވެސް އިރާދަކުރެއްވިއްޔާ ޕާޓީގެ ހަރަކާތްތައް ހަމަ އިސާހިތަކު ވަރުގަދައަށް އަޅުގަނޑުމެން ފަށްޓާނަން،" އަޒްލީން ވިދާޅުވިއެވެ.