12 Oct 2016, 11:38
މޯލްޑިވްސް ގެޓްއަވޭސްގެ ފަރާތުން އިންތިޒާމުކޮށްގެން ރާއްޖޭގައި ފުރަތަމަ ފަހަރަށް ބާއްވާ ޓްރެވަލް ޓްރޭޑް ޝޯގެ އެސޯސިއޭޓް ޕާޓްނަރަކަށް މޯލްޑިވްސް އެސޯސިއޭޝަން އޮފް ޓްރެވަލް އޭޖެންޓްސް އެންޑް ޓުއަރ އޮޕަރޭޓާސް (މަޓާޓޯ) ހަމަޖައްސައި އެއްބަސްވުމުގައި ސޮއިކޮށްފިއެވެ.
މޯލްޑިވްސް ގެޓްއަވޭސްގެ މެނޭޖިންގ ޑިރެކްޓަރު އަޚްމީމް އަބްދުއް ރައްޒާގު ވިދާޅުވީ، ޓްރެވަލް ޓްރޭޑް ޝޯ އޮފް މޯލްޑިވްސްގެ އެސޯސިއޭޓް ޕާޓްނަރެއްގެ ގޮތުގައި މަޓާޓޯ ހަމަޖައްސައި އެއްބަސްވުމުގައި ސޮއިކުރުން އޮތީ، ހޮޓެލް ޖެންގައި އިއްޔެގެ ވަގުތެއްގައި ކަމަށެވެ. މަޓާޓޯގެ ފަރާތުން އެއްބަސްވުމުގައި ސޮއިކުރެއްވީ، އެ ޖަމިއްޔާގެ ރައީސް އަބްދުﷲ ޣިޔާސެވެ. މޯލްޑިވްސް ގެޓްއަވޭސްގެ ފަރާތުން އެއްބަސްވުމުގައި ސޮއިކުރެއްވީ، ޓްރެވަލް ޓްރޭޑް ޝޯ އޮފް މޯލްޑިވްސްގެ ޕްރޮޖެކްޓް ޑައިރެކްޓަރު އަހްމަދު އީހަބްއެވެ.
އަންނަ އަހަރުގެ ޖުލައި މަހު، ދަރުބާރުގޭގައި ދެދުވަހުގެ މުއްދަތަށް ކުރިއަށް ގެންދާން ހަމަޖެހިފައިވާ، ޓްރެވަލް ޓްރޭޑް ޝޯއަކީ ރާއްޖޭގެ ރިސޯޓްތަކާއި ރިސޯޓް ސެގްމަންޓްގެ ހުރި ޕްރޮޕަޓީތައް ޕްރޮމޯޓްކޮށް ހެދުމަށް ބާއްވަން ހަމަޖައްސާފައިވާ އިވެންޓެކެވެ.
މޯލްޑިވްސް ގެޓްއަވޭސް އިން މައުލޫމާތު ދޭގޮތުގައި، ޓްރެވަލް ޓްރޭޑް މޯލްޑިވްސް ޝޯގައި ރާއްޖޭގެ 100 އަށްވުރެ ގިނަ ރިސޯޓްތައް ބައިވެރިވާނެއެވެ. އަދި ރާއްޖެއާއި ރާއްޖޭން ބޭރުން 150 ޓްރެވަލް އެޖެންޓުންނާއި، އިވެންޓް އިތުރަށް ޕްރޮމޯޓްކުރުމަށް މީޑިއާއާއި ސޯޝަލް މީޑިއާގެ ފަރާތްތައް ހިމެނޭގޮތަށް 50 ޕާޓްނަރުން ބައިވެރިވާނެއެވެ.
މޯލްޑިވްސް ގެޓްއަވޭސްގެ ބިޒްނަސް ޑިވެލޮޕްމަންޓް ޑައިރެކްޓަރު ހުސެން ސަނީ އުމަރު ވިދާޅުވި ގޮތުގައި އެ އިވެންޓުގެ މައިގަނޑު އަމާޒަކަށް ވާނީ، ސަރަހައްދީ ގައުމުތަކަކީ މިހާރު ޓޫރިޒަމްގައި ވާދަވެރި ގައުމުތަކަކަށް ވާއިރު، ރާއްޖެއަށް އަންނަ ޓޫރިސްޓުންގެ އަދަދު އިތުރުކުރުން ކަމަށެވެ. އެގޮތުން 2020 އަށް ކަނޑައަޅާފައިވާ ދެ މިލިއަން ޓޫރިސްޓުން ހަމަކުރުމަކީ އިވެންޓުގެ މަގްސަދެއް ކަމަށް އޭނާ ވިދާޅުވި އެވެ.