11 Oct 2016, 22:36
ދިވެހި މިއުޒިކީ ދާއިރާއަށް އިންގިލާބެއް ގެނުވި މަޝްހޫރު ބޭންޑް ޒީރޯ ޑިގްރީ އެޓޯލްސް އިން ރާއްޖޭގައި އުފެދުނު މިއުޒިކީ ލެޖެންޑް، އަހުމަދު ނާޝިދު (ފުލޫ ނާޝިދު) ގެ ޖަނާޒާ ބާއްވައިފިއެވެ.
ގިނަ އަދަދެއްގެ މީހުން ބައެއްގެ ހާޒިރުގައި އޭނާގެ ޖަނާޒާ ބޭއްވީ މިރޭ އިޝާ ނަމާދަށްފަހު އާ ސަހަރާގަ އެވެ.
ކެންސަރު ބައްޔާ ގިނަ ދުވަސްތަކެއް ވަންދެން ހަނގުރާމަ ކުރަމުންދިޔަ ނާޝިދު 53، ނިޔާވީ އިތުރަށް ހާލު ސީރިއަސްވެގެން އޭޑީކޭ އަށް ގެންގޮސް ފަރުވާދެމުން ދަނިކޮށް އިއްޔެ އޭޑީކޭ ހޮސްޕިޓަލުގައެވެ.
ނާޝިދު ނިޔާވުމާ ގުޅިގެން އޭނާގެ އާއިލާއަށް ރައީސް އަބްދުﷲ ޔާމީން ވެސް ވަނީ މިއަދު ތައުޒިޔާ ފޮނުއްވާފަ އެވެ. އޭނާގެ އާއިލާއަށް ތައުޒިޔާ ފޮނުއްވައި މިއަދު ރައީސް ވިދާޅުވީ، މި ދުނިޔެ ދޫކުރެއްވުމަކީ ރާއްޖޭގެ މިއުޒިކުގެ ދާއިރާއަށް ލިބިގެންދިޔަ ވަރަށް ބޮޑު ހީނަރުކަމެއްކަމަށެވެ.
ރާއްޖޭގެ މިއުޒިކުގެ ދާއިރާއަށް ވަރަށްދިގު މުއްދަތެއްގައި ނާޝިދު ކޮށްދެއްވާފައިވާ ހިދުމަތްތަކަކީ ރާއްޖޭގެ ޒުވާނުންނަށް، ހާއްސަކޮށް މިއުޒިކުގެ ދާއިރާގައި ހިދުމަތް ކުރައްވަމުން ގެންދަވާ ފަރާތްތަކުން އެކަމުގެ އަގު ވަޒަންކުރައްވާ ހިދުމަތްތަކެއް ކަމަށް ދެކިވަޑައިގަންނަވާ ކަމަށް ވެސް ރައީސް ވިދާޅުވި އެވެ.
އާއްމު ހިދުމަތުގެ ހިތްވަރު ދިނުމުގެ އެވޯޑް ސަރުކާރުން 1990 ވަނަ އަހަރު އަރުވާފައިވާ ނާޝިދު މިއުޒިކީ ދާއިރާއަށް ވަނީ މަޖީދިއްޔާ ސްކޫލުގައި ތައުލީމު ހާސިލް ކުރި ދުވަސްވަރުގައެވެ.
އޭރުން ފެށިގެން މިއުޒިކުގެ ތެރޭގައި އުޅެބޮޑުވި ނާޝިދުގެ ދިވެހިވަންތަ ރާގުގެ ލަވަތަކަކީ އަދިވެސް ދިވެހިންގެ ތެރޭގައި މަގުބޫލު ލަވަތަކެވެ. އަދިވެސް ދިވެހިންގެ ވިންދާ ކުޅެމުންދާ ރާގުތަކެކެވެ. އޭނާ އަކީ ދިވެހި މިއުޒިކީ ދާއިރާއަށް އަގުހުރި ގިނަ ހިދުމަތްތަކެއް ކޮށްދީފައިވާ އެވަރު ދެވަނައެއް ނުވާ ފަންނާނެ ކަމަށް ގިނަ ބަޔަކު ގަބޫލުކުރާ ލެޖެންޑެކެވެ.
ނާޝިދުގެ ކިޑްނީއަށް ކެންސަރު ޖެހިފައިވާކަން އެނގި ފަރުވާ ހޯދަން ފަށާފައިވަނީ މީގެ ގާތްގަނޑަކަށް ފަސް އަހަރު ކުރިންނެވެ. އަދި އޭރު އޭނާ ފަރުވާ ހޯދަމުންދިޔައީ ލަންކާއިންނެވެ. ލަންކާގައި ގިނަ އަހަރު ތަކެއް ވަންދެން ދިރިއުޅުން ބަދަލުކޮށްގެން އުޅުމަށްފަހު ނާޝިދު ރާއްޖެ ބަދަލުވީ އަހަރެއްހާ ދުވަސް ކުރިންނެވެ. ރާއްޖެ އައުމަށްފަހު ވެސް އޭނާ ގެންދިޔައީ ކެންސަރަށް ފަރުވާ ހޯދަމުންނެވެ.
ނާޝިދު އާންމުންގެ ތެރެއަށް ނުފެނި ގިނަ ދުވަސްތަކެއް ވުމަށްފަހު، އެންމެ ފަހުން ފެނިގެންދިޔައީ މިދިޔަ މަހުގެ 21 ވަނަ ދުވަހުގެ ރޭ އޭނާއަށް ހާއްސަކޮށް އޮލިމްޕަހުގައި ބޭއްވި "އަ ޓްރިބިއުޓް ޓު ނާޝިދު" ޝޯގައެވެ.