11 Oct 2016, 13:47
މިހާރު ދުނިޔޭގައި ހުރި އެންމެ އުސް އިމާރާތް، ދުބާއީގައި ހުންނަ ބުރުޖު ޚަލީފާ އަށްވުރެ ވެސް އުސްކޮށް ދުބާއީގައި އަޅަން ނިންމާފައިވާ އިމާރާތުގެ މަސައްކަތް ފަށައިފި އެވެ.
ޖުމްލަ، އެއް ބިލިއަން އެމެރިކާ ޑޮލަރު ހަރަދުކޮށްގެން ދުބާއީ ކްރީކް ހާބަރުގައި އަޅާ އެ އިމާރާތުގެ ބިންގާ އަޅުއްވައިދެއްވީ ދުބާއީގެ އަމީރު ޝެއިހް މުހައްމަދު ބިން ރާޝިދު އަލް މަކްތޫމެވެ.
ދުބާއީގައި 2020 ވަނަ އަހަރު ބާއްވަން ތައްޔާރުވަމުން އަންނަ ވޯލްޑް އެކްސްޕޯ ޓްރޭޑިން ފެއާއަށް ނިންމުމަށް އަމާޒު ހިފާފައިވާ އެ އިމާރާތުގެ މަސައްކަތްކުރަނީ އެކުވެރި އަރަބި އިމާރާތުގެ ކުންފުންޏެއް ކަމަށްވާ އިމާރު ޕްރޮޕެޓީސް އިންނެވެ.
އަލަށް އަޅާ އިމާރާތުގެ ޖުމްލަ އުސްމިން ހާމަކޮށްފައިނުވި ނަމަވެސް، އިމާރާތްކުރާ ކުންފުނިން ބުނި ގޮތުގައި އެ އިމާރާތް އުސްވާނީ ބުރުޖު ޚަލީފާ އަށްވުރެ ކުޑަ ތަންކޮޅެއް ކަމަށް ބުނެފައިވެ އެވެ.
މުންނާރެއްގެ ބައްޓަމަށް ހަނިކޮށް ހަދާ އެ އިމާރާތް ފަރުމާކޮށްފައި ވަނީ، ސްޕެނިޝް ސްވިސް އާކިޓެކްޓެއް ކަމަށްވާ، ސެންޓިއާގޯ ކަލަޓްރާވާ ވާލްސް އެވެ. އެ އިމާރާތަށް ދޭނެ ނަމެއް އަދި ނިންމާފައެއްނުވެ އެވެ.
އިމާރު ޕްރޮޕެޓީސްގެ ޗެއާމަން މުހައްމަދު އަލައްބާރު މިދިޔަ އޭޕްރިލް މަހު ވިދާޅުވީ، އެ އިމާރާތުގައި އޮބްޒަވޭޝަން ޑެކަކާއި ރެސްޓޯރެންޓާއި ބުޓިކް ހޮޓަލެއް ހިމެނޭ ގޮތަށް އެކި ބޭނުންތަކަށް 18 ނުވަތަ 20 ހިމެނޭނެ ކަމަށާއި އިމާރާތުގެ ބޭރުން އެނބުރޭ ބެލްކަނިތަކެއް ވެސް ހިމެނޭނެ އެވެ.
ދިގު މިނުގައި 2700 ފޫޓު ހުންނަ ބުރިޖު ޚަލީފާ ހުޅުވާފައި ވަނީ 2010 ވަނަ އަހަރުގެ ޖަނަވަރީ މަހުގެ ތެރޭގައެވެ. އަދި އެ އިމާރާތް ހެދުމަށް 1.5 ބިލިއަން އެމެރިކާ ޑޮލަރު ހޭދަކޮށްފައިވެ އެވެ.
ބުރުޖު ޚަލީފާއާ ވާދަކުރުމަށް ސައުދީ އަރަބިއާގެ ކިންގްޑަމް ހޯލްޑިންގް އިން އަންނަނީ ބުރުޖު ޚަލީފާއަށް ވުރެ ކިލޯ މީޓަރެއް އުސްކޮށް ޖިއްދާގައި އިމާރާތެއް އިމާރާތްކުރަމުންނެވެ.