08 Oct 2016, 11:10
ދުނިޔޭގެ މަޝްހޫރު އެއާލައިނެއް ކަމަށްވާ ގަތަރު އެއާވޭސް އިން އެކުންފުނީގެ ދަތުރުތަކުގައި ބޭނުން ކުރުމަށް 40 މަތިންދާ ބޯޓު ގަތުމަށް އޯޑަރު ދީފިއެވެ.
އެމެރިކާގެ އެންމެ މަގުބޫލު ފްލައިޓު އުފައްދާ ކުންފުނި ކަމަށްވާ ބޮއޭންގް އިން ހާމަ ކުރާ ގޮތުގައި ގަތަރު އެއާވޭސް އިން ގަންނަން އޯޑަރު ދީފައިވަނީ 9-787 މަރުކާގެ 30 ޑްރީމްލައިނާ މަތިންދާ ބޯޓަށާއި 300-777އީއާރު މަރުކާރުގެ 10 މަތިންދާ ބޯޓު ގަތުމަށެވެ. މި އޯޑަރުގެ ޖުމްލަ އަގަކީ 11.7 ބިލިއަން އެމެރިކާ ޑޮލަރެވެ.
ގަތަރު އެއާވޭސްއިން ދީފައިވާ މި އޯޑަރާ އެކު ބޮއޭންގް ކުންފުނިން ވަނީ 737 މެކްސް 8 މަރުކާގެ 60 މަތިންދާ ބޯޓު، 6.9 ބިލިއަން ޑޮރަލަށް ވިއްކުމުގެ އޮފާއެއް އެކުންފުންޏަށް ދީފައެވެ.
ޚަބަރުތައް ބުނާ ގޮތުގައި މިއީ ގަތަރު އެއާވޭސް އިން މިހާތަނަށް ދީފައިވާ އެންމެ ބޮޑު އޯޑަރެވެ. އެ ކުންފުނިން މި އޯޑަރު ދީފައިވަނީ މިފަދަ ބޮޑެތި މަތިންދާ ބޯޓުތައް ގަތުމަށް ބޮއޭންގް އަށް އެހެން އެއާލައިނުތަކުން ދޭ އޯޑަރުތަކުގެ މިންވަރު ވަރަށް ދަށްވެފައިވާ ދަނޑިވަޅެއްގައެވެ.
ގަތަރު އެއާވޭސްއިން ބޮއޭންގް ކުންފުންޏަށް މި އޯޑަރު ދީފައިވަނީ، ޔޫރަޕްގެ އެއާބަސް ކުންފުނިން މަތިންދާ ބޯޓުތައް ގަތުމުން ޑެލިވަރީކޮށްދޭލެއް ލަސްކަމުން ކަމަށް ވެއެވެ.