07 Oct 2016, 10:16
އުމުރުން އެންމެ ނުވަ އަހަރުގައި އެވަޓަންގެ ޔޫތު ޓީމާ ގުޅުނު ވޭން ރޫނީ، އޭނާގެ ފުޓްބޯޅަ ކެރިއަރުގައި ޕްރޮފެޝަނަލް މެޗެއް އެންމެ ފުރަތަމަ ކުޅުނީ، 2002 ވަނައަހަރުއެވެ. އޭރު އޭނާގެ އުމުރަކީ 16 އަހަރެވެ. ގޯލާ ނިކަން ރައްޓެހި، ހަލުއި ފޯވާޑެއްގެ ގޮތުގައި އޭރު ވިދަންފެށި ރޫނީ ވެގެން ދިޔައީ އިނގިރޭސި ފުޓްބޯޅައިގައި ބްރޭންޑް ނަމަކަށެވެ. ގައުމުގައި އުފެދުނު އެންމެ މޮޅެތި ފުޓްބޯޅަ ކުޅުންތެރީންގެ ތެރޭގައި އޭނާ ހިމެނުނެވެ. އެއީ އިނގިރޭސި ގައުމީ ޓީމުގައި މިވަގުތު ހުރި އެންމެ ތަޖުރިބާކާރު ކުޅުންތެރިޔާއެވެ. އަދި ޓީމުގެ ލީޑަރަކީވެސް ރޫނީއެވެ.
އިންގްލެންޑްގެ އިތުރުން އެ ގައުމުގެ އެންމެ ބޮޑު އެއް ކްލަބު ކަމަށްވާ މެންޗެސްޓާ ޔުނައިޓެޑްގެ ވެސް ކެޕްޓަން ބޭންޑާ ހަވާލުވެހުރި، އުމުރުން 30 އަހަރުގެ ރޫނީއާ ބެހޭގޮތުން މިފަހަކަށް އައިސް ވަރަށް ގިނަ ވާހަކަތަކެއް ދަނީ ދެކެވެމުންނެވެ. ހާއްސަކޮށް، އޭނާ ކުޅެން އެންމެ ރަނގަޅީ، "ސްޓްރައިކަރަކަށްތޯ، ނަމްބަރު 10ގެ މަގާމަށްތޯ، ނުވަތަ މިޑްފީލްޑަރަކަށްތޯ" ބުނެ އުފައްދަމުންދާ ސުވާލުު މިވަނީ ރޫނީގެ ބޮލުގެ ރިހުމަކަށް ވެފައެވެ.
ވޭން ރޫނީ ޕްރޮފެޝަނަލް ފުޓްބޯޅަ ކެރިއަރު ފެށީ އެވަޓަން އިން --
ކުރިން ވަރަށް ޒީލަގަދަ ކުޅުންތެރިއެއްގެ ގޮތުގައި، އެހެން ނަމަވެސް މިހާރު ވަރަށް ބޮޑަށް ބަދަލުވެފައިވާ، ރޫނީ ބުނާގޮތުން އޭނާ ކުޅޭނޭ މަގާމަކާ ދޭތެރޭ އެއްވެސް އިރެއްގައި އޭނާ ނުފޫޒެއް ނުފޯރުވައެވެ. އަދި އެއީ ހަމައެކަނި އެއިރެއްގައި ހުންނެ ކޯޗެއްގެ ނިންމުންކަމަށް އޭނާ ގަބޫލުކުރެއެވެ.
ފިޓްނަސްގެ މައްސަލަތަކާ ހުރެ، މިފަހަކަށް އައިސް މެންޗެސްޓާ ޔުނައިޓެޑްގެ ފުރަތަމަ 11އިން ޖާގަ ގެއްލެމުންދާ ރޫނީ އަކީ ޓީމުގެ ލީޑަރެއްގެ ގޮތުގައި އޭނާގެ މިހާރުގެ ދެ ކޯޗުންވެސް ގަބޫލުކުރެއެވެ. އެގޮތުން އިންގްލެންޑު ޓީމުގެ ވަގުތީ ކޯޗު ގެރެތު ސައުތުގޭޓާއި ޔުނައިޓެޑްގެ ކޯޗު ހޯޒޭ މޮރީނިއޯވެސް ބުނެފައި ވަނީ ރޫނީއަތުން ކެޕްޓަން ބޭންޑު ނުނަގާނޭ ކަމަށެވެ.
ވޯލްޑް ކަޕް ކޮލިފައިންގައި އިންގްލޭންޑް އެންމެ ފަހުން ކުޅުނު މެޗުގައި ސްލޮވާކިއާ އަތުން ހަނިގޮތަކަށް 1-0 ލަނޑުން މޮޅުވި މެޗަށް ފަހު، އޭރުގެ ކޯޗު ސޭމް އެލަޑީސް، "ވޭން ކުޅޭނީ އޭނާ ހިތަށް އެރިފަހަރަކު" އޭ ބުނެ ރޫނީއަށް ފާޑުކީފަހުން ރޫނީގެ ކުރިމަގާމެދު ގިނަ ސުވާލުތަކެއް އުފެދުނެވެ.
މިދިޔަ ސީޒަންގެ ފަހުކޮޅުގައި މެންޗެސްޓާ ޔުނައިޓެޑުން ވަނީ، ރޫނީލައްވައި އެންމެ ކުރިއަށް ކުޅުވުމުގެ ބަދަލުގައި މިޑްފީލްޑަރަކަށް ބަދަލުކޮށްފައެވެ. އަދި ހަމަ އެހެންމެ ޔޫރޯ 2016ގައި އިނގިރޭސި ޓީމުގައިވެސް ރޫނީ ލައްވައި މިޑްފީލްޑަރެއްގެ ދައުރު އަދާކުރުވަން ފެށި ހިސާބުން، އޭނާއަށް އެންމެ ރަނގަޅު މަގާމަކީ ކޮބައިތޯ ކުރެވޭ ސުވާލުތައް ވަނީ ބޮޑު ބަހުސަކަށްވެފައެވެ.
އިންގްލޭޑްން ގައުމީ ޓީމުގެ ކެޕްޓަން ވޭން ރޫނީ. ރޫނީގެ ކުރިމަގާ މެދު ގިނަ ސުވާލުތަކެއް ދަނީ ކުރެވެމުން --
ވޯލްޑް ކަޕް ކޮލިފައިން ގްރޫޕް އެފްގައި، ހޮނިހިރު ދުވަހު މޯލްޓާއާ ދެކޮޅަށް ވެމްބްލީގައި އިނިގރޭސީން ކުޅޭ މެޗުގެ ކުރީން ބޭއްވި ނޫސްކޮންފަރެންސެއްގައި އެ ޓީމުގެ ފުރަތަމަ 11އިން ރޫނީއަށް ޖާގަ ލިބިދާނެތޯ ނޫސްވެރިއަކު ރޫނީއާ ސުވާލުކުރުމުން އޭނާ ބުނީ، "އަހަންނަކަށް ނޭނގެ ތިއަށް ދޭނެ ޖަވާބެއް. ތިސުވާލުކުރާންވީ ސައުތުގޭޓާ،" ކަމަށެވެ.
"ދެން އަނެއް ސުވާލަކީ އިންގްލޭންޑް ޓީމުގައި އަހަރެން ކުޅޭނީ ކޮން މަގާމަކަށްތޯ. ސްޓްރައިކަރަކަށްތޯ، މިޑްފީލްޑަރަކަށްތޯ ނޫނީ ނަމްބަރު 10ގެ މަގާމަށްތޯ. އެއް ސުވާލުތަކަކަށް ޖަވާބުދީދީ މިހާރު ވަރުބަލިވެއްޖެ،"
"އަހަރެން މިހާރު ވާނީ އެ ސުވާލަށް އެތަކެއް ފަހަރު ޖަވާބު ދީފައި، އެއީ ހަމަ އެއް ޖަވާބެއް. އަހަރެން ކުޅޭނީ އޭރަކު ހުރި ކޯޗަކު އަހަރެން ލައްވައި ކުޅުވަން ބޭނުންވާ މަގާމަކަށް."
ރޫނީ ބުނީ، ގައުމީ ޓީމުގެ ސްކޮޑްގައި އޭނާގެ ނަން ހިމެނީ އޭނާ އަމިއްލައަށް ނޫންކަމަށާއި، އޭނާ ޓީމަށް ކުޅޭނެތޯ ނޫންތޯވެސް ނިންމާނީ ކޯޗު ކަމަށެވެ. އަދި މިވަގުތު އެ ޓީމާ ހަވާލުގެ ހުރި ގެރެތު ސައުތުގޭޓްދޭ އިރުޝާދާ އެއްގޮތަށް ވީއެންމެ ރަނގަޅަކަށް މަސައްކަތްކުރާނޭ ކަމަށްވެސް އިންގްލޭންޑް ކެޕްޓަން ބުންޏެވެ.
މޮރީނިއޯގެ ޔުނައިޓެޑް ޓީމުގެ ފުރަތަމަ 11އިން ޖާގަ ނުލިބޭތީ ރޫނީ ހުންނަނީ ވަރަށް ބޮޑަށް މާޔޫސްވެފައެވެ. އެހެންނަމަވެސް އެގޮތަށް ކަންތައް މެދުވެރިވަނީ އޭނާއަށްވުރެ ރަނގަޅު ކުޅުންތެރީން ކްލަބުގައި ތިބޭތީކަން ރޫނީ ގަބޫލުކުރެއެވެ.
"އަހަންނަކީ ފުޓްބޯޅަ ކުޅުންތެރިއެއް. ފުޓްބޯޅަ ކުޅުމަކީ އަހަރެންގެ ވަޒީފާ، އަހަރެން މި ކުޅިވަރު ދެކެ ލޯބިވޭ. އެހެންވީމަ ޓީމުގަ ހިމެނެން އަހަރެން ބޭނުންވޭ،"
މެންޗެސްޓާ ޔުނައިޓެޑްގެ ފުރަތަމަ 11އިން ޖާގަ ހޯދުމަކީ މިހާރު ރޫނީއަށް އެހާ ފަސޭހަކަމެއް ނޫން --
ރޫނީ ބުނީ، ފުރަތަމަ 11ގައި ހިމެނުމަށް އޭނާ ބުރަ މަސައްކަތްތަކެއް ކުރާން ޖެހޭކަމަށް ގަބޫލުކުރާ ކަމަށެވެ. އެގޮތުން މާކަސް ރަޝްފަޑް ފަދަ ޒުވާން ކުޅުންތެރީން ޓީމުގައި ތިބުމުން، މަސައްކަތް އިތުރަށް ބުރަވާނޭކަމަށްވެސް އޭނާ ބުންޏެވެ.
ރަޝްފަޑްއަކީ މިވަގުތު އިނގިރޭސި ޓީމުގައި ހިމެނޭ މުހިންމު ކުޅުންތެރިއެއް ކަމަށާއި، ޔުނައިޓެޑާއި އަދި އިނގިރޭސި ގައުމީ ޓީމުގައި ވެސް ކުރިއަށް އޮތްތާނގައި އޭނާގެ ދައުރު މުހިއްމުވާނޭކަމަށް ވެސް ރޫނީ ބުންޏެވެ.
ރޫނީގެ ކުޅުމުގެ ފޯމު ގެއްލި، ގައުމީ ޓީމާއި އޭނާ ކުޅެމުން އަންނަ ކްލަބުގައިވެސް ހިތްދަތި ދުވަސްތަކެއް ގުނަމުންދާއިރު، އިންގްލެންޑް އަދި ޓޮޓެންހަމްގެ ކުރީގެ ކޯޗު ހެރީ ރެޑްނެޕް ބުނީ، ރޫނީއަށް މިވަގުތު އެންމެ ރަނގަޅު ވާނީ، ޕްރިމިއާ ލީގުގެ އެހްނެ ކްލަބަކަށް ބަދަލުވުން ކަމަށެވެ. އެގޮތުން، ޗެލްސީ ނުވަތަ އާސެނަލް ފަދަ ޓީމެއްގެ އެޓޭކިން މިޑްފީލްޑަރެއްގެ ރޯލު އަދާކުރަން ލިބިއްޖެ ނަމަ އަދިވެސް ރޫނީގެ ފަރާތުން ރަނގަޅު ކުޅުމެއް ފެނުން ގާތްކަށް އޭނާ ބުންޏެވެ.
ރެޑްނެޕް ގަބޫލުކުރާ ގޮތުގައި، ރޫނީ ލައްވައި މިޑްފީލްޑަރެއްގެ މަގާމަށް ކުޅުވުމަކީ ބޭކާރުކަމެކެވެ.
"ޗެލްސީ ނުވަތަ އާސެނަލް ފަދަ ޓީމެއްގެ ނަންބަރު 9، ނުވަތަ 10އަށް އޭނާ ރަނގަޅު،" މިޑްފީލްޑަރެއްގެ މަގާމަކީ ރޫނީއަށް އެންމެ ރަނގަޅު މަގާމު ނޫންކަން ފާހަގަކުރަމުން ރެޑްނެޕް ބުންޏެވެ.
މެންޗެސްޓާ ޔުނައިޓެޑަށް ލަނޑެއް ކާމިޔާބުކޮށް ދިނުމަށްފަހު އެޓީމުގެ ކެޕްޓަން ވޭން ރޫނީ އުފާފާޅުކުރަނީ --
އެވަޓަންއިން ޕްރޮފެޝަނަލް ފުޓްބޯޅަ ކެރިއަރު ފެށި ހުނަރު ވެރި ފޯވާޑް އެ ކްލަބުގައި ކާމިޔާބު ދެ ސީޒަން ހޭދަކުރި ފަހުން، 2004 ވަނަ އަހަރުގެ ސަމަރ ޓްރާންސްފާގައި މެންޗެސްޓާ ޔުނައިޓެޑުން ވަނީ 25.6 މިލިއަން ޕައުންޑުގެ ފީއަކަށް ރޫނީ އެޓީމަށް ގެންގޮސްފައެވެ. އަދި އޭގެ ފަހުން ޕްރިމިއާ ލީގުގެ ވާދަވެރި ކްލަބުތަކުންނާއި، ވިލާތުގެ ބޮޑެތި ކްލަބުތަކުން ވެސް އެތަކެއް ފަހަރު ރޫނީގެންދަން މަސައްކަތް ކުރިއެވެ. ނަމަވެސް އޭނާ އިހްތިޔާރުކުރީ ޔުނައިޓެޑްގައި މަޑުކުރުމަށެވެ.
ރޫނީގެ ފުޓްބޯޅަ ކެރިއަރުގެ ބޮޑުބައެއް އޭނާ ހޭދަކުރީ ސްޓްރައިކަރެއްގެ ގޮތުގައެވެ. ރޫނީ ވަނީ، އެވަޓަންއަށް އޭނާ ކުޅުނު 67 މެޗުގައި 15 ލަނޑު ޖަހައިފައެވެ. މެންޗެސްޓާ ޔުނައިޓެޑްގައި މިހާތަނަށް 375 މެޗު ކުޅެ 179 ލަނޑު ޖަހާފައި ވާއިރު، ރޫނީ ވަނީ އިނގިރޭސި ގައުމީ ޓީމަށްވެސް 116 މެޗު ކުޅެ 53 ލަނޑު ޖަހައިފައެވެ. ނަމަވެސް މިއަދު މިވަނީ އޭނާ ލައްވައި ކުޅުވަން އެންމެ ރަނގަޅީ ކޮން މަގާމަކަށްތޯ ބުނެ ބޮޑެތި ބަހުސުތަކެއް އުފެދިފައެވެ.