05 Oct 2016, 17:40
ބ. ތުޅާދޫގައި ވިހެއުމަށް ފަހު ދަރިފުޅު މަރާލި ކަމަށް ތުހުމަތު ކުރެވޭ އެރަށު ހުދުއަސުރުމާގޭ ފާރިހާ އަބްދުއްރަހްމާންގެ މައްޗަށް ދައުލަތުން ދައުވާކުރާ މައްސަލަ ސާބިތު ކުރުމަށް ހެއްކެއްގެ ގޮތުގައި އޭނާގެ މަންމަ އައިމިނަތު ހުސައިން ހުށަހަޅައިފިއެވެ.
އެމައްސަލައިގައި ފާރިހާގެ މައްޗަށް ދައުލަތުން ވަނީ ތިން ދައުވާއެއް އުފުލާފަ އެވެ. އެއީ އިންސާނާގެ ފުރާނައިގެ އަގަށް އެއްވެސް ފަރުވާލެއް ނެތްކަމަށް ދައްކުވައިދޭ އަމަލެއް ކުރުމުގެ ކުށުގެ ދައުވާ އާއި މީހަކު މަރުވުމުގެ ފަރުވާކުޑަ އަމަލެއް ކުރުމުގެ ދައުވާ އާއި ދަރިން ބެލެހެއްޓުމަށް އޮތް ވާޖިބާއި ދަރިންނަށް އަޅާނުލައި ދޫކޮށްލުމުގެ ކުށުގެ ދައުވާއެވެ.
އެމައްސަލަ މިއަދު ކްރިމިނަލް ކޯޓުގައި ކުރިއަށް ގެންގިސްފައިވާއިރު މައްސަލަ ވަނީ ދައުލަތުން އެދިގެން ސިއްރު ކޮށްފައެވެ. އެކަން ކްރިމިނަލް ކޯޓުން ޔަގީން ކޮށްދެއެވެ.
އެނގިފައިވާ ގޮތުގައި އެމައްސަލަ ފާރިހާގެ މައްޗަށް ސާބިތު ކުރުމަށް ހެކިންގެ ގޮތުގައި ފާރިހާގެ މަންމަގެ އިތުރުން ބޮޑުދައިތަ ހިމެނޭ ގޮތަށް ޖުމްލަ 10 މީހަކު ވަނީ ހެކިންގެ ގޮތުގައި ހުށަހަޅާފައެވެ.
އެމައްސަލާގައި މިއަދު ކުރިއަށް ދިޔަ ޝަރީއަތުގެ މަޖިލީހުގައި ފުލުހެއްގެ ހެކިބަސް ނަގާފައިވާކަން ވަނީ އެނގިފައެވެ.
ފާރިހާ ވިހެއި ދަރިފުޅަކީ ތުޅާދޫގައި ދިރިއުޅޭ ބަންގްލްދޭޝް މީހެއްގެ ކުއްޖެކަމަށް ބުނެފައިވާތީ ފުލުހުން ވަނީ ވަކި މައްސަލައެއްގެ ގޮތުގައި އެމައްސަލަ ތަހުގީގު ކޮށްފަ އެވެ. ނަމަވެސް އެކަށީގެންވާ ހެކި ނެތް ކަމަށް ފުލުހުން ބުނެއެވެ.
މިއަދު ޝަރީއަތަށް ހާޒިރުކުރެވުނު ހެއްކާ އެކަމާ ގުޅޭ ގޮތުން ފާރިހާގެ ފަރާތުން ސުވާލު ކުރުމުން ފުލުސް މީހާ ބުނެފައިވަނީ ކުއްޖާގެ ގައިން ޑީއެންއޭ ޕްރޮފައިލް ލިބިފައި ނުވާ ކަމަށެވެ.
ފާރިހާގެ ނަފްސާނީ މައްސަލައެއް ހުންނަ ކަމަށް އޭނާގެ ފަރާތުން ހަދާފައިވާ ރިޕޯޓުތަކުން ދައްކާތީ ނަފްސާނީ ޑޮކްޓަރެއް ޝަރީއަތުގެ މަޖިލީހަށް ހާޒިރުކުރުމަށް ދައުލަތުންވެސް އަދި ފާރިހާގެ ފަރާތުންވެސް މިއަދު ވަނީ އެދިފައެވެ.
އިންސާނާގެ ފުރާނައިގެ އަގަށް އެއްވެސް ފަރުވާލެއް ނެތްކަމަށް ދައްކުވައިދޭ އަމަލެއް ކުރުމުގެ ކުށުގެ ދައުވާ އާއި މީހަކު މަރުވުމުގެ ފަރުވާކުޑަ އަމަލެއް ކުރުމުގެ ދައުވާ ފާރިހާގެ މައްޗަށް އުފުލާފައިވަނީ ތުޅާދޫގައި އޭނާ ދިރިއުޅޭ ދޮންވެލިގޭގެ ފާޚާނާތެރެއަށް މިދިޔަ އަހަރުގެ ޖުލައި މަހުގެ 27 ވަނަ ދުވަހުގެ ރޭގަނޑުގެ ވަގުތެއްގައި ދަރިއަކު ވިހެމަށްފަހު ފާޚާނާތެރެއަށް ދަރިފުޅު ވެއްޓުމުން ފާޚާނާތަރެއަށް ފެންޖެހުމަށް ފަހު ނުކުމެގެންގޮސް، އޭގެ އިރުކޮޅެއް ފަހުން އަނެއްކާ ފާޚާނާތެރެއަށް ވަދެ ފެންހިންދާ ވަޅުގަނޑުގެ ތެރެއަށް ފާރިހާ އެ ދަރިފުޅު ވައްޓާލާފައިވާ ކަމަށް ބުނެއެވެ.
އަދި ދަރިން ބެލެހެއްޓުމަށް އޮތް ވާޖިބާއި ދަރިންނަށް އަޅާނުލައި ދޫކޮށްލުމުގެ ކުށުގެ ދައުވާ ފާރިހާގެ މައްޗަށް އުފުލީ ދަރިއަކު ވިހެއުމަށް ފަހު އެދަރިފުޅުގެ އުފަން ދުވަހުގެ ސެޓްފިކެޓު ހަދާފައިނުވާތީ ކަމަށް ދައުލަތުން ބުންޏެވެ.
އިންސާނާގެ ފުރާނައިގެ އަގަށް އެއްވެސް ފަރުވާލެއް ނެތްކަމަށް ދައްކުވައިދޭ އަމަލެއް ކުރުމުގެ ކުށުގެ ދައުވާ ފާރިހާގެ މައްޗަށް އުފުލީ ގާނޫނުލް އުގޫބާތުގެ 110 ވަނަ މާއްދާގެ (ށ)އާ ހަވާލާދީ އެ މާއްދާގެ (ރ)ގެ ދަށުންނެވެ.
މީހަކު މަރުވުމުގެ ފަރުވާކުޑަ އަމަލެއް ކުރުމުގެ ދައުވާ ފާރިހާގެ މައްޗަށް އުފުލާފައި ވަނީ ގާނޫނުލް އުގޫބާތުގެ 111 ވަނަ މާއްދާގެ (ހ) އާ ހަވާލާދީ އެ މާއްދާގެ (ނ) ގެ ދަށުންނެވެ.
ދަރިން ބެލެހެއްޓުމަށް އޮތް ވާޖިބާއި ދަރިންނަށް އަޅާނުލައި ދޫކޮށްލުމުގެ ކުށުގެ ދައުވާ ފާރިހާގެ މައްޗަށް އުފުލީ ގާނޫނުލް އުގޫބާތުގެ 414 ވަނަ މާއްދާގެ (ހ) އާ ހަވާލާދީ އެ މާއްދާގެ (ނ) ގެ ދަށުންނެވެ.