05 Oct 2016, 12:25
އާސެނަލްގެ ފްރާންސް ޑިފެންޑަރު ލޯރެންޓް ކޮޝިއެލްނީ ކުޅުންތެރިއެއްގެ ގޮތުގައި މީހަކަށް ހަދައިދިނީ އެ ކްލަބުގެ ކޯޗު އާސެން ވެންގާ ކަމަށް ކޮޝިއެލްނީ ބުނެފި އެވެ.
އުމުރުން 31 އަހަރުގެ ޑިފެންޑަރު މީގެ ހަ އަހަރު ކުރިން އާސެނަލަށް ގެނެސްފައި ވަނީ ފްރާންސްގެ ދެ ވަނަ ޑިވިޝަންގެ ކްލަބެއް ކަމަށްވާ ލޮރިއެންޓް އަށް ކުޅެމުން ދަނިކޮށެވެ. އާސެނަލްއާ ގުޅުމަށް ފަހު މޮޅު ކުޅުމެއް ދައްކައި، ޔޫރަޕުގެ އެންމެ މޮޅެތި ޑިފެންޑަރުންގެ ތެރޭގައި ކޮޝިއެލްނީ ހިމެނުނެވެ.
ކޮޝިއެލްނީ އަށް ހުރިހާ ކާމިޔާބަކާއި ކުރިއެރުމެއް ގެނެސްދިން ކޯޗު ވެންގާ އަށް އޭނާ ވަނީ ތައުރީފުކޮށް ޝުކުރު އަދާކޮށްފަ އެވެ. އާސެނަލްގެ ކޯޗުކަމުގެ މަގާމުގައި ވެންގާ ދެމިހުންނަތާ މިހާރު 20 އަހަރު ވެއްޖެ އެވެ.
"ބޮޑު ކްލަބަކުން އަހަރެންނަށް ފުރުސަތެއް ހޯދައިދިން ކޯޗަކީ ވެންގާ. ކުޑަ ކްލަބަކަށް ކުޅެނިކޮށް، އަހަރެން ގެނެސް ކުޅުންތެރިއެއްގެ ގޮތުގައި މީހަކަށް ހަދައިދިނީ ވެންގާ. ކްލަބާ ގުޅުމަށް ފަހު އަހަރެން ބޭނުންވީ އަހަރެންނަކީ އިތުބާރުކުރެވޭ މީހެއްކަން ސާބިތުކޮށްދޭން،" ކޮޝިއެލްނީ ބުންޏެވެ.
ކޮޝިއެލްނީ ބުނީ، އޭނާ މަސައްކަތްކުރަނީ ވެންގާ ކޮށްދިން ހެޔޮ ކަންތަކުގެ ބަދަލުގައި ކަންތައްތަކެއް ކޮށްދޭން ކަމަށާއި ވެންގާ އަކީ ފާއިތުވި އަހަރުތަކުގައި އާސެނަލަށް ގިނަ ހިދުމަތްތަކެއް ކޮށްދީފައިވާ ކޯޗެއް ކަމަށެވެ.