03 Oct 2016, 17:36
ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ސައޫދީ އަރަބިއްޔާއަށް ކުރައްވާ ރަސްމީ ދަތުރުފުޅެއްގައި ފުރާވަޑައިގެންފިއެވެ. އެމަނިކުފާނު ފުރާވަޑައިގަތީ މިއަދު ހަވީރުއެވެ.
ރައީސް އޮފީހުން ބުނިގޮތުގައި، ރައީސް ޔާމީން ސައުދީއަށް ކުރައްވާ އެ ދަތުރުފުޅުގައި ސައޫދީ އަރަބިއްޔާގެ ރަސްގެފާނު ސަލްމާން ބިން އަބްދުލްއަޒީޒް އާލްސައުދާއި އެ ގައުމުގެ ސީނިއާ މިނިސްޓަރުންނާ ބައްދަލުކުރައްވާނެ އެވެ.
މީގެ އިތުރުން، ރާއްޖޭގައި އިންވެސްޓް ކުރުމަށް ހުރި ފުރުސަތުތަކާއި އުމްރާނީ ތަރައްގީއާއި ރާއްޖެއާއި ސައޫދީ އަރަބިއްޔާއާ ދެގައުމަށް ފައިދާ ހުރި ދާއިރާތަކުން އިތުރަށް ގުޅުން ބަދަހި ކުރުމާ ގުޅޭ ގޮތުން މަޝްވަރާ ކުރައްވާނެ ކަމަށް ބުނެފައިވެއެވެ.
ނަމަވެސް ސައުދީ ދަތުރުފުޅަށްފަހު ރައީސް ޔާމީން ރާއްޖެ އެނބުރި ވަޑައިގަންނަވާނެ ތާރީހެއް ރައީސް އޮފީހުން ހާމަކުރައްވާފައެއް ނުވެއެވެ.
ރައީސް ޔާމީންގެ އެ ދަތުރުފުޅުގައި ފޮރިން މިނިސްޓަރު ޑރ. މުހައްމަދު އާސިމާއި އިކޮނޮމިކް މިނިސްޓަރު މުހައްމަދު ސައީދާއި ފިޝަރީޒް މިނިސްޓަރު ޑރ. މުހައްމަދު ޝައިނީގެ އިތުރުން ރައީސް އޮފީހުގެ ފޮރިން ރިލޭޝަންސްގެ ސްޓޭޓް މިނިސްޓަރު މުހައްމަދު ނަސީރާއި ސައޫދީއަށް ރާއްޖޭން ކަނޑައަޅުއްވާފައި ހުންނަވާ ސަފީރު އަބްދުﷲ ހަމީދު ބައިވެރިވެވަޑައިގަންނަވައެވެ.
ރައީސް ޔާމީން މިއަދު ސައުދީއަށް ދަތުރުފުޅެއް ފެއްޓެވިއިރު، ރައީސް ޔާމީންގެ ދެކަނބަލުން މިދިޔަ އަހަރުގެ މާޗް މަހު ވެސް ސައުދީ ރަސްގެފާނުގެ ހާއްސަ ދައުވަތަކަށް އެގައުމަށް ދަތުރުފުޅެއް ކުރެއްވިއެވެ.