03 Oct 2016, 15:38
މާދަމައިން ފެށިގެން އެސްޓީއޯގެ އަތޮޅުތެރޭގެ ބްރާންޗުތަކުން ކާޑު ސަބްސިޑީއަށް އެދޭ ފޯމު ލިބެން ހުންނާނެ ކަމަށް އެކުންފުނިން ބުނެފި އެވެ.
އެކުންފުނިން މިއަދު ބުނީ އެގޮތަށް ނިންމާފައި ވަނީ އަތޮޅުތެރޭގައި ދިރިއުޅުއްވާ ފަރާތްތަކަށް ފަސޭހަކަމާ އެކު ސަބްސިޑީ ފޯމު ފޯރުކޮށްދިނުމުގެ ގޮތުން ކަމަށެވެ.
އެސްޓީއޯގެ 14 ފިހާރައެއް އަތޮޅުތެރޭގައި ގާއިމްކޮށްފައިވާ އިރު އެހުރިހާ ފިހާރައަކުން ވެސް ކާޑުގެ ސަބްސިޑީއަށް އެދި އެންސްޕާއަށް ހުށަހަޅަން ޖެހޭ ފޯމު ލިބެން ހުންނާނެ ކަމަށް އެކުންފުނިން ބުންޏެވެ.
އެކުންފުނީގެ ފިހާރަތަކުން ސަބްސިޑީ ފޯމު ލިބެން ހުންނާނެ އިންތިޒާމު ހަމަޖައްސާފައިވާ އިރު ކާޑުގެޑުގެ ބާވަތްތަކަށް ދައުލަތުން ދެމުން ގެންދިޔަ ސަބްސިޑީ ކަނޑާލުމާ ގުޅިގެން ސަބްސިޑީއަށް އެދޭ ފަރާތްތަކުގެ ފޯމް ބަލައިގަތުން މާލޭގެ ހަތަރު ސަރަހައްދެއްގައި މިއަދު ކުރިއަށް އެބަ ދެއެވެ.
އެންސްޕާއިން ބުނެފައިވާ ގޮތުގައި ކާޑު ސަބްސިޑީ ދިނުމުގައި އަމަލު ކުރާނީ "ފަގީރު ހާލަތުގައި ދިރިއުޅޭ ފަރާތްތަކަށް ކާބޯތަކެތި ގަތުމަށް މާލީ އެހީ ދިނުމާ ބެހޭ ގަވާއިދާ" އެއް ގޮތަށެވެ.
އެ ގަވާއިދުގައި ބުނާ ގޮތުން ނަމަ އެހީއަށް އެދޭ ފަރާތަކީ ފަގީރުކަމުގެ ހާލަތު ދެނެގަތުމާ ބެހޭ ގޮތުން އޭޖެންސީން ކަނޑައަޅާފައިވާ އުސޫލުގައި ބަޔާންކޮށްފައިވާ މިންވަރަށް ވުރެ މަދުން އާމްދަނީ ލިބޭ އަދި ދިރިއުޅުމުގެ ހާލަތު ދަށް ފަރާތެއް ކަމުގައި ވާންވާނެ އެވެ. އަދި ސަބްސިޑީގެ ގޮތުގައި ބޮލަކަށް ދެވޭނީ 40 ރުފިޔާ ކަމަށާއި ގޭބިސީއެއް ނަމަ ދެވޭނީ 240 ރުފިޔާކަމަށް އެ ގަވާއިދުގައި ކަނޑައަޅާފައިވެ އެވެ.
ކާބޯތަކެތީގެ އަގަށް އައި ބަދަލާ އެކު އެސްޓީއޯއިން އިއުލާން ކޮށްފައިވާ ގޮތުން، 3.98 ރުފިޔާއަށް ވިއްކަމުން އަންނަ ހަނޑޫ ކިލޯގެ އަގު، 7.96 ރުފިޔާއަށް އުފުލޭނެ އެވެ. އަދި 4.50 ރުފިޔާއަށް ވިއްކާ ހަކުރު ކިލޯގެ އަގު އަށް ރުފިޔާއަށް، އަދި 3.50 ރުފިޔާއަށް ދޭ ފުށް ކިލޯގެ އަގު 5.96 ރުފިޔާއަށް، އެކެއް އޮކްޓޯބަރުން ފެށިގެން ވަނީ ބޮޑުވެފައެވެ. އަދި އަތޮޅުތެރެއަށް މި ތަކެތީގެ އަގު މިއަށްވުރެވެސް ބޮޑެވެ.