01 Oct 2016, 21:44
ވޯޓުދިން ހުރިހާ ކްލަބު ޖަމިއްޔާއެއްގެ ފުރިހަމަ ތާއީދާއެކު ވޮލީބޯލް އެސޯސިއޭޝަންގެ ރައީސްކަމުގެ މަގާމަށް، މުހައްމަދު ލަތީފް ހޮވައިފިއެވެ.
ޒުވާނުންގެ މަރުކަޒުގެ ސެމިނާ ރޫމުގައި މިރޭ ބޭއްވި، ވޮލީބޯލް އެސޯސިއޭޝަންގެ އިންތިޚާބުގައި އަމިއްލަ ގޮތުން ވާދަކުރި އިސްމާއިލް ރިފާއު (ޗިޗޫ) އާ ވާދަކޮށް ލަތީފް މި އިންތިޚާބު ކާމިޔާބުކުރީ ވޯޓުގައި ބައިވެރިވި މެންބަރުންގެ އިއްތިފާގުންނެވެ. އިންތިޚާބުގައި ވޯޓް ދީފައިވަނީ 12 މެންބަރުންނެވެ.
މި އަހަރުގެ މާޗު މަހު ބޭއްވި، ވޮލީބޯލް އެސޯސިއޭޝަންގެ އިންތިޚާބުގައި ވާދަކޮށް ތިންވަނަ ދައުރަކަށް ކުރީގެ ރައީސް މުހައްމަދު ރިޔާޒް އިންތިހާބުވެފައި ވަނިކޮށް، އެ އިންތިޚާބުގައި މަކަރު ހަދައި އޮޅުވާލާފައިވާ ކަމަށް ބުނެ ސްޕޯޓްސް ކޮމިޝަނުންނާއި ހޯމް މިނިސްޓްރީން ވަނީ އިންތިޚާބު ބާތިލުކޮށްފައެވެ. އަދި މިރޭ އިންތިޚާބު ބޭއްވީ، ހޯމް މިނިސްޓްރީން އެކުލަވައިލި "އިންތިޚާބާ ބެހޭ ވަގުތީ ކޮމިޓީ" އެއްގެ ބެލުމުގެ ދަށުންނެވެ.
ނައިބު ރައީސް ކަމަށް އިއްޒަތު ވަހީދު ކުރިމަތިލިރު، އޭނާ ހޮވުމަށް ނަގާފައިވަނީ ފެންނަ ނުފެންނަ ވޯޓެކެވެ. 12 ކްލަބުގެ ތެރެއިން 11 ކުލަބުން ވަނީ ފެންނަ ކަމަށް ވޯޓް ދީފައެވެ. ނުފެންނަ ކަމަށް ވޯޓް ދިނީ އެންމެ ކްލަބަކުންނެވެ.
ހަޒާންދާރުގެ މަގާމަށް އިންތިހާބުކުރީ ވޮލީބޯޅަ ޓީމްގެ ކުރީގެ ކުޅުންތެރިޔާ މުހައްމަދު ރަނޭޝް އެވެ. އޭނާއަށްވެސް ފެންނަ ކަމަށް 11 ކްލަބަކުން ވޯޓް ދިންއިރު އެއް ކުލަބުން ވަނީ ނުފެންނަ ކަމަށް ވޯޓް ދީފައެވެ.
ރޫލްސް ކޮމިޓީއަށް އިންތިހާބުވީ 12 ވޯޓާ އެކު އަލީ އިޔާޒާއި އިބްރާހިމް ފަލާހް އަދި 11 ވޯޓާ އެކު އަދުނާން އަބްދުއްރަހީމެވެ. ޓެކްނިކަލް އަދި ޑިވެލޮޕްމަންޓް ކޮމިޓީއަށް އިންތިހާބުވީ 12 ވޯޓާ އެކު، ވޮލީ ކޯޗު މުހައްމަދު ނަދީމާއި 11 ވޯޓާ އެކު ހަސަން އަގްލީމް އަދި ސޮފްވާން އަހުމަދެވެ.
ވޮލީ ބޯޅަ އެސޯސިއޭޝަންގެ އެކްސްކޯއަށް އިންތިހާބްވި މެމްބަރުން --- ސަން ފޮޓޯ: މުއާވިއަތު އަންވަރު
ބީޗް ވޮލީ ކޮމިޝަނުގެ ހަ މަގާމުގެ ތެރެއިން މިރޭ އިންތިހާބުކުރީ ހަތަރު މެމްބަރެކެވެ. އެއީ 12 ވޯޓާ އެކު ހާލިދު މުހައްމަދާއި މައުމޫރް މުހައްމަދާއި 11 ވޯޓާ އެކު އިސްމާއިލް ޝަރީފްގެ އިތުރުން އިސްމާއިލް އަބްދުﷲ އެވެ. އިތުރު ކެންޑިޑޭޓަކު ކުރިމަތިލާފައިނުވުމުން އިންތިހާބީ ކޮމިޓީން ނިންމީ އަނެއް ދެ މަގާމަށް މެމްބަރުން ހޮވުން، އެކްސްކޯއާ ހަވާލުކުރުމަށެވެ.
އިންތިޚާބު ކާމިޔާބުކުރެއްވުމަށް ފަހު، ލަތީފް ވިދާޅުވީ، ކުރިން ވެދިޔަ ކަންތައް ހަނދާން ނައްތާލައި، ވޮލީބޯޅަ އާއިލާގައި ހިމެނޭ އެންމެން ގުޅިގެން، ރާއްޖޭގެ ވޮލީބޯޅަ އާ ހަރުފަތަކަށް ގެންދިއުމަށް މަސައްކަތްކުރުމުގެ ވަގުތު ޖެހިއްޖެ ކަމަށެވެ.
"ވޮލީގައި ހަރަކާތްތެރިވާ ހުރިހާ ފަރާތްތަކަށްވެސް އަޅުގަނޑު ގޮވާލަން، އަޅުގަނޑުމެންނާ ބައިވެރިވެގެން ވޮލީބޯޅަ ކުރިއަރުވަން މަސައްކަތްކުރެއްވުމަށް،" ލަތީ ވިދާޅުވިއެވެ.
އޭނާ ވިދާޅުވީ، ވަކިބަޔަކު ދުރުކޮށް، ވަކިބަޔަކު ކައިރިކުރާ ސިޔާސަތެއް ނުގެންގުޅޭނޭ ކަމަށާއި، "މިކަމުގައި އަޅުގަނޑުމެންނާއެކު މަސައްކަތްކުރުމުގެ ފުރުސަތު ހުރިހާ ބޭފުޅުންނަށްވެސް އެބައޮތް،" ކަމަށެވެ.
ލަތީފް ވިދާޅުވީ، ވޮލީބޯލް އެސޯސިއޭޝަންގެ ކުރީގެ ރައީސް މުހައްމަދު ރިޔާޒުވެސް އެ އެސޯސިއޭޝަން ކުރިއެރުވުމަށް ވަރަށް ގިނަ މަސައްކަތްތަކެއް ކުރައްވާފައި ވާކަމަށާއި އެކަން ފާހަގަކުރައްވާ ކަމަށެވެ.
މިފަހަރުގެ އިންތިޚާބުގައި އޭނާއަށް އެންމެ ބޮޑު އެހީތެރިކަމެއް ވެދެއްވި، މުހައްމަދު ނަޝީދު (ކާނަލް)އަށް ވަރަށް ބޮޑަށް ޝުކުރު އަދާކުރާކަމަށްވެސް ލަތީފް ވިދާޅުވިއެވެ.
ލަތީފް ވިދާޅުވީ، މި ސަރުކާރުން ގެންގުޅުއްވާ ޒުވާނުންނާއި ކުޅިވަރު ކުރިއެރުވުމުގެ ސިޔާސަތުގެ އެންމެ ފުރިހަމަ ފައިދާ، ރާއްޖޭގައި ވޮލީބޯޅަ ކުރިއެރުމަށް ހޯއްދަވާނޭ ކަމަށާއި އެގޮތުން މާލެއެކޭ އެއްފަދައިން އަތޮޅުތެރޭގައި ވެސް ވޮލީބޯޅަ ފޯރި އިތުރަށް ގެނުވާނޭ ކަމަށެވެ.