30 Sep 2016, 10:19
މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ)ގެ އޮނިގަނޑު ބަދަލުކުރުމުން ބޭރުގެ ފަރާތްތަކުން މާލީ ގޮތުން ބޮޑެތި އެހީ އެކުންފުންޏަށް ފޯރުކޮށްދިނުމަށް ތައްޔާރަށް ތިބި ކަމަށް ސަރުކާރުން ބުނެފިއެވެ.
ސަރުކާރުގެ މައި ވިޔަފާރި ކުންފުނި، އެސްޓީއޯގެ ދަށަށް މިފްކޯ ގެންދިއުމަށް ނިންމިކަން އިއުލާންކުރުމަށް އިކޮނޮމިކް ކައުންސިލުން އިއްޔެ ބޭއްވި ނޫސްވެރިންގެ ބައްދަލުވުމުގައި ފިނޭންސް މިނިސްޓަރު އަހްމަދު މުނައްވަރު ވިދާޅުވީ މިހާތަނަށް މިފްކޯ އިން ވިޔަފާރި ކުރަމުން އައި މޮޑެލްއަކީ ބަދަލުކުރަން ޖެހިފައިވާ އެއްޗެއް ކަމަށެވެ. އޭނާ ވިދާޅުވީ އެސްޓީއޯގެ ދަށަށް އެކުންފުނި ގެނައުމަކީ އެކަމުގެ ފުރަތަމަ ފިޔަވަޅު ކަމަށެވެ.
"ކޮންމެ އަހަރަކު ސަބްސިޑީގެ ގޮތުުގައި އެތައް މިލިޔަން ރުފިޔާއެއް ދެމުން ދަނީ. މިކަން ހައްލު ވެގެން ދާނެ ބިޒްނަސް ސޮލިއުޝަނަކަށް ގެނައުމުން ފުރަތަމަ ފިޔަވަޅު މިއީ. އެސްޓީއޯއަކީ ރަނގަޅު ބިޒްނަސް މޮޑަލަކަށް ހިނގަމުންދާ ތަނެއް،" މުނައްވަރު ވިދާޅުވި އެވެ.
އޭނާ ވިދާޅުވީ މިފްކޯއަށް މާލީ އެހީ ދިނުމަށް އިސްލާމިކް ޑިވެލޮޕްމެންޓް ބޭންކުގެ އިސްލާމިކް ޓްރޭޑް ފައިނޭންސް ކޯޕަރޭޝަން (އައިޓީއެފްސީ) އިން ވެސް ހުރީ ތައްޔާރަށް ކަމަށެވެ. ނަމަވެސް މިހާތަނަށް ވެސް އެކަން ނުވެ އޮތީ މިފްކޯގެ އޮނިގަނޑު ބަދަލުނުކޮށް އޮތުމުން ކަމަށް މިނިސްޓަރު ވިދާޅުވި އެވެ.
"އެ ބޭފުޅުން ވެސް 10 ނުވަތަ 20 މިލިއަން ޑޮލަރަށް ވުރެ ގިނައިން ޓްރޭޑް ފައިނޭންސްއިން ދޭން ތައްޔާރަށް އެ ތިއްބެވީ، އެހެންނަމަވެސް މިހާރު މިފްކޯ އޮތް ހާލަތެއްގައި ނެތް އެއްވެސް ކަހަލަ ފެސިލިޓީސްތަކެއް ދެވޭކަށެއް ރީސްޓަކްޗާ ނުކޮށް،" މުނައްވަރު ވިދާޅުވި އެވެ.
މިނިސްޓަރު މުނައްވަރު ވިދާޅުވީ މިފްކޯގެ މައްސަލައަކީ މިހާތަނަށް ވެސް ފައިނޭންސް އިންޑަސްޓްރީއަށް އޮތް ބޮޑު ކަންބޮޑުވުމެއް ކަމަށެވެ. އެގޮތުން ބޭންކުތަކުގައި މިފްކޯގެ ދަރަނިތައް ފުނިޖެހި، ދަރަނީގެ މައްޗަށް ދަރަނިވެރިވެފައިވާ ކަމަށާއި އެއީ ފިނޭންސް މިނިސްޓްރީގެ ވެސް ބޮޑު ކަންބޮޑުވުމެއް ކަމަށް އޭނާ ވިދާޅުވި އެވެ.
އެސްޓީއޯގެ ދަށަށް މިފްކޯ ގެނައުމަށް ނިންމި ނިންމުމަކީ މާލީ ދާއިރާ އާއި މަސްވެރިކަމުގެ ދާއިރާއަށް ވެސް ރަނގަޅު ނިންމުމެއް ކަމަށް މުނައްވަރު ވިދާޅުވި އެވެ.