29 Sep 2016, 12:36
ރާއްޖޭގެ ބައެއް ރިސޯޓުތަކުގެ ފޮޓޯ ނަގައި، އެތަންތަނުގެ ރިވިއު ލިޔުމަށް ރާއްޖެ އައި އެމެރިކާގެ މީހަކު ރާއްޖެއަށް އެތެރެވުމުގެ ހުއްދަ ނުދީ، ރާއްޖެއިން ބޭރަށް ފޮނުވާލައިފި އެވެ.
އެމެރިކާއަށް ނިސްބަތްވާ ލާރާ ގްރާންޓް ނަމަކަށް ކިޔާ ލިޔުންތެރިޔާ ރާއްޖެއަށް ދަތުރުކުރަން އުޅުނީ ތިން ހަފްތާ ތެރޭގައި 25 ރިސޯޓާއި ހޮޓަލަށް ޒިޔާރަތްކޮށް، އެތަންތަނުގެ ފޮޓޯއާއި ރިވިއު ލިޔުމަށެވެ.
އޭނާ އަކީ "ޓްރިޕް އެޑްވައިޒާ" އަދި އޮއިސްޓާ ޑޮޓް ކޮމަށް ފޮޓޯއާއި ލިޔުންތައް ލިޔާ މީހެކެވެ.
އޮސްޓްރޭލިއާގެ ނޫހަކަށް ލިޔުނު ލިޔުމެއްގައި ލާރާ ބުނީ ނިއު ޔޯކުން ދުބާއީ މަގުން ރާއްޖެއަށް އޭނާ އައީ ބިޒްނަސް ވިސާގައި ކަމަށެވެ. އަދި އޭނާއާ އެކު ރާއްޖެ އައި އޭނާގެ ލޯބިވެރިޔާ އައީ ފަތުރުވެރިއެއްގެ ގޮތުގައި ކަމަށް އޭނާ ބުނެ އެވެ.
"އެއާޕޯޓުން އޮފިޝަލަކު އެހި އަހަރެން ކޮން ވިޔަފާރިއެއްގައި ތޯ ރާއްޖެ އައީ. އަހަރެން ކިޔައިދިނިން. އޭނާ ދެން އޭނާގެ ވެރިއަކަށް ހުރި މީހަކާ ވާހަކަ ދައްކާފައި، އެނބުރި އައިސް ބުނީ އަހަރެންނަށް ރާއްޖެއަށް އެތެރެ ނުވެވޭނެއޭ. އެކަމަކު އަހަރެންގެ ބޯއިފްރެންޑަށް ވަނުމުގެ ހުއްދަ ދިން،" ލާރާ ބުންޏެވެ.
ލާރާ ބުނި ގޮތުގައި، ރާއްޖޭގައި ބޭރުގެ ފޮޓޯގްރާފަރުން މަސައްކަތް ކުރުން މަނާކަން އެނގުނީ، އެއާޕޯޓުގައި އެ އިމިގްރޭޝަން އޮފިސަރު ކިޔައިދިނުމުން ކަމަށެވެ.
"މި ފޮޓޯޝޫޓުތަކަކީ ހިލޭ ކޮށްދޭ، އަދި އަހަރެންނަށް ފައިދާއެއް ލިބޭ ކަމަކަށް ނުވާ ކަމަކަށް ވިޔަސް އަހަރެންނަށް ވަނުމުގެ ހުއްދަ ނުދިން،"
ލާރާ ބުނީ، ރާއްޖެއިން ބޭރަށް ގޮސް ހަތަރު ދުވަސް ފަހުން ޓޫރިސްޓު ވިސާގައި ރާއްޖެ އައިސްފި ނަމަ ރާއްޖެއަށް ވަނުމުގެ ހުއްދަ ލިބިދާނެ ކަމަށް އެ އިމިގްރޭޝަން އޮފިސަރު ބުނި ކަމަށެވެ. އެހެންކަމުން ލާރާއާއި އޭނާގެ ލޯބިވެރިޔާ އެނބުރި ދުބާއީއަށް ދިޔަ އެވެ.
ރާއްޖެއަށް ލާރާ ދެވަނަ ފަހަރަށް އައީ ޗުއްޓީއަށް ކަމަށް ބުނެ އެވެ.
"ސިސްޓަމްތަކުން އަހަރެން އަނެއްކާ ފްލެގު ކުރި. އެއީ އޮޅުމެއް ކަމަށާއި މި ދަތުރުގައި އަހަރެން މަސައްކަތް ނުކުރާނެ ކަމަށް ބުނީމަ ވެސް ހުއްދަ ނުދިން. އަހަރެން ހުންނަ ތަނާ ގުޅޭ މައުލޫމާތު ދެއްކުމަށް އެންގި. އަހަރެން މަސައްކަތް ކުރާކަން އެނގިއްޖެ ނަމަ ޖޫރިމަނާ ކުރާނެ ކަމަށް ވެސް ބުނި. އަދި އަހަރެންގެ ފޮށިތަންމަތީގައި ކެމެރާއެއް އޮތްތޯ ވެސް ބެލި. އެމީހުން އުޅުނު ގޮތުން ހީވީ އަހަރެންގެ އަތުގައި އޮތީ ކެމެރާގެ ބަދަލުގައި ހަތިޔާރެއް ހެން،"
އެހެންކަމުން ދެވަނަ ފަހަރަށް ވެސް ލާރާ ރާއްޖެއަށް އެތެރެވުމުގެ ހުއްދައެއް ނުލިބުނެވެ. އޭނާ ދެން ދިޔައީ ސްރީލަންކާ އަށެވެ.
މޯލްޑިވްސް އިމިގްރޭޝަންގެ އިންފޮމޭޝަން އޮފިސަރު ހަސަން ޚަލީލް "ސަން" އަށް މިއަދު ވިދާޅުވީ ޓޫރިސްޓު ވިސާގައި ރާއްޖެ އައިސް ވިޔަފާރި ކުރުން ނުވަތަ ފޮޓޯނެގުމަކީ ހުއްދަ ކަމެއް ނޫން ކަމަށެވެ.
"ހޮލިޑޭ ހަދަން އައިސް ރިސޯޓަކަށް ހިލޭ އިޝްތިހާރު ކޮށްދޭން ފޮޓޯ ނެގުމަށޭތާ އޭނާ ބުނަނީ އެއީ ޓޫރިސްޓު ވިސާގައި ހުއްދަ އޮންނަ ކަމެއް ނޫން. އެތެރެއެއް ނުކުރާނެ އެކަހަލަ ކަންކަމަކަށް،" ޚަލީލް ވިދާޅުވި އެވެ.
ޚަލީލް ވިދާޅުވީ އެފަދަ ކަންކަމުގައި އަންނަ މީހުން ޓޫރިސްޓު ވިސާގައި އެނބުރި ރާއްޖެ އައުމަށް އިމިގްރޭޝަނުން އިރުޝާދެއް ނުދޭނެ ކަމަށެވެ.
"ދެވަނަ ފަހަރަށް ގެސްޓެއްގެ ގޮތުގައި އައިމަ ވެސް ހިފެހެއްޓި ކަމަށް ބުނަނީ. އޭނާ ފުރަތަމަ ބިޒްނަސް ވިސާގައި އައީ ވަކި ރިސޯޓަކަށް. ދެން އަނެއްކާ ފޮނުވާލީމަ އެނބުރި އެ ރިސޯޓަށް އަންނަން އުޅުނަސް މަގްސަދު އެނގޭނެ ދެއްތޯ،" ޚަލީލް ވިދާޅުވި އެވެ.
ލާރާގެ ލިޔުމުން ދޭހަވާ ގޮތުގައި އޭނާ ރާއްޖެއަށް ޓޫރިސްޓް ވިސާގައި އެތެރެވުމަށް ވެސް މަސައްކަތް ކުރީ، ފުރަތަމަ ފަހަރަށް އޭނާ ރާއްޖެ އައި މަގްސަދު ހާސިލު ކުރުމަށެވެ.
ބޭރުގެ ފޮޓޯގްރާފަރުން ރާއްޖޭގައި މަސައްކަތް ކުރުން މަނާކުރީ 2015 ވަނަ އަހަރު އެވެ. އެގޮތަށް ސަރުކާރުން ނިންމީ، ފޮޓޯގްރަފީއަކީ ރާއްޖޭގައި ކުދި އަދި މެދުފަންތީގެ ވިޔަފާރިއެއްގެ ގޮތުން ގެ ގޮތުގައި ކަނޑައެޅުމުންނެވެ.