28 Sep 2016, 08:50
އަންނަ މަހު ރިލީޒް ކުރުމަށް ހަމަޖެހިފައިވާ ކަރަން ޖޯހަރުގެ "އޭ ދިލް ހޭ މުޝްކިލް"ގައި ހުނަރުވެރި އެކްޓަރު ސައިފް އަލީ ޚާންގެ ޚާއްސަ ފެނިލުމެއް ހިމެނުމަށް ކަރަން ހުށަހެޅި ނަމަވެސް، ސައިފު އެ ފުރުސަތު ދޫކޮށްލީ އަނިޔާގެ ސަބަބުން ކަމަށް ޚަބަރުތައް ބުނެފި އެވެ.
ސައިފް އާ ގާތް ފަރާތަކާ ހަވާލާދީ ޚަބަރުތައް ބުނާ ގޮތުން، ފިލްމުގައި ޚާއްސަ ފެނިލުމެއްގެ ގޮތުން ކުޑަ ރޯލެއް ކުޅެދިނުމަށް އެދި ކަރަން ވަނީ ސައިފް އަށް ހުށަހަޅައިފަ އެވެ.
ނަމަވެސް ސައިފް އަށް ލިބުނު އަނިޔާ އަކާ ގުޅިގެން ދެ މަސް ދުވަސް ވަންދެން މަސައްކަތާ ދުރުގައި ހުރުމަށް ޑޮކްޓަރު ވަނީ އިރުޝާދު ދީފައި އެވެ.
އަދި ކަރަން އާއި ސައިފް އަކީ ވަރަށް ގާތް ދެމީހުން ކަމަށާއި، ސައިފްގެ ބަދަލުގައި އެ ރޯލަށް އެހެން މީހަކު ހަމަޖެއްސުމަށް ކަރަން ގާތު ބުނީ ވެސް ސައިފް ކަމަށް ޚަބަރުތައް ބުނެ އެވެ.
"އޭ ދިލް ހޭ މުޝްކިލް"ގައި ޚާއްސަ ފެނިލުމެއްގެ ގޮތުގައި ހިމަނާފައި ވަނީ ސުޕާ ސްޓާ ޝާހު ރުކް ޚާން އެވެ.
ސައިފް ދެން އެންމެ އަވަހަށް ފެނިގެން ދާނީ ވިޝާލް ބަރްދްވާޖްގެ "ރަންގޫން" އިންނެވެ. އެ ފިލްމުގައި ސައިފްގެ އިތުރުން ކަންގަރނާ ރަނައުތު އަދި ޝާހިދު ކަޕޫރު ވެސް ފެނިގެންދާނެ އެވެ.
ސައިފު މިހާރު މަސައްކަތް ކުރަމުން އަންނަނީ ފިލްމު "ޝެފް"ގެ މަސައްކަތުގަ އެވެ.
ރަންބީރު ކަޕޫރު، އައިޝްވާރްޔާ ރާއި އަދި އަނުޝްކާ ޝަރްމާ ފެނިގެންދާ ފިލްމު "އޭ ދިލް ހޭ މުޝްކިލް" ރިލީޒް ކުރާނީ އަންނަ މަހުގެ 28 ވަނަ ދުވަހު އެވެ.