25 Sep 2016, 10:32
ނިޔުޔޯކް (ސެޕްޓެމްބަރ 25): ފިލިޕީންސުން ޖަރީމާތައް ނައްތާލުމަށާއި މަސްތުވާތަކެތި ކޮންޓްރޯލް ކުރުމަށް ރައީސް ރޮޑްރިގޯ ޑުޓާޓޭ ކުރައްވަމުން ގެންދަވާ މަސައްކަތްތަކުގެ ތެރެއަށް ބޭރުގެ ފަރާތްތައް ނުވަނުމަށް އެގައުމުގެ ޚާރިޖީ ވަޒީރު ޕާފެކްޓޯ ޔަސޭ ބައިނަލްއަގްވާމީ މުޖްތަމައަށް ގޮވާލައްވައިފި އެވެ.
ނިޔުޔޯކްގައި މިހާރު ކުރިޔަށްދާ އދ.ގެ ޖެނެރަލް އެސެމްބްލީގެ ބައްދަލުވުންތަކުގައި ތަގްރީރު ކުރައްވަމުން ޔަސޭ ވިދާޅުވީ ޖަރީމާތަކާއި މަސްތުވާތަކެތި ކޮންޓްރޯލް ކުރުމަށް ރައީސް ރޮޑްރިގޯ ޑުޓާޓޭ ފައްޓަވާފައިވާ ހަނގުރާމައަކީ ފިލިޕީންސްގެ މުސްތަގްބަލް ސަލާމަތް ކުރުމުގެ ހަނގުރާމައެއް ކަމަށާއި އެކަމުގެ ތެރެއަށް ވަދެ ގޮތްފާޑު ނުކިޔުމަށް ދުނިޔޭގެ ގައުމުތަކުގެ ކިބައިންނާއި ބައިނަލްއަގްވާމީ ޖަމްއިޢްޔާ ޖަމާއަތްތަކުގެ ކިބައިން އެދިވަޑައިގަންނަވާ ކަމުގަ އެވެ.
ފިލިޕީންސްގެ ގައުމީ ލަނޑުތަކާއި ތަރައްގީގެ މަގްސަދުތައް ހާސިލް ކުރުމަށް ޓަކައި މިހަނގުރާމަ ކާމިޔާބު ކުރަން ކޮންމެހެން ޖެހޭ ކަމަށް ވެސް އެގައުމުގެ ޚާރިޖީ ވަޒީރު ޕާފެކްޓޯ ޔަސޭ ވިދާޅުވި އެވެ. ފިލިޕީންސްގައި ބޭއްވި ރިޔާސީ އިންތިޚާބު ވަރަށް ތަނަވަސް އަޣްލަބިއްޔަތަކުން ކާމިޔާބު ކުރައްވައިގެން ރައީސް ރޮޑްރިގޯ ޑުޓާޓޭ ވެރިކަމަށް ވަޑައިގެންފައި ވަނީ މިދިޔަ މޭމަހުގެ ތެރޭގަ އެވެ. ރިޔާސީ އިންތިޚާބުގެ ކޭންޕޭންގައި ޑުޓާޓޭ އެންމެ ބޮޑު އިސްކަމެއް ދެއްވާފައި ވަނީ ފިލިޕީންސުން ޖަރީމާތައް ނައްތާލުމަށާއި މަސްތުވާތަކެތި ކޮންޓްރޯލް ކުރުމަށެވެ. ވެރިކަން ލިބިއްޖެ ނަމަ މިދެކަންތަކާ ދެކޮޅަށް ވަރުގަދަ ހަނގުރާމައެއް ފައްޓަވާނެ ކަމަށް ކޭންޕޭންގައި ޑުޓާޓޭ ތަކުރާރުކޮށް ވިދާޅުވެފައިވެ އެވެ.
ފިލިޕީންސްގެ ރައީސް ކަމަށް އިސްވެވަޑައިގަތުމަށް ފަހު ޖަރީމާތަކާއި މަސްތުވާތަކެއްޗާ ދެކޮޅަށް ޑުޓާޓޭ ފައްޓަވާފައިވާ ހަނގުރާމައިގާ މިހާތަނަށް ތިންހާސް މީހުން މަރުވެފައިވާ އިރު މީގެތެރޭގައި ގިނައީ ޑްރަގްލޯޑުންނާއި ބޮޑެތި ޖަރީމާތައް ރާވައި ހިންގާ އިސް ފަރާތްތަކެވެ. ނަމަވެސް ޑުޓާޓޭގެ މިހަނގުރާމައަށް ދުނިޔޭގެ ބައެއް ގައުމުތަކާއި ޔޫރަޕްގެ އިއްތިޙާދާ އަދި އދ.ގެ ފާޑުކިޔުންތައްވަނީ އަމާޒުވެފަ އެވެ.
ނަމަވެސް ޓުޓާޓޭ ވަނީ ފަސްބެލުމެއްނެތި މިހަނގުރާމަ ކުރިޔަށް ގެންދަވާނެ ކަމަށް ވިދާޅުވެފަ އެވެ. އަދި ޑުޓާޓޭ ގެންދަވަނީ އޭނާގެ ހަނގުރާމައަށް ފާޑުކިޔާ ފަރާތްތައްވެސް ކުށްވެރި ކުރައްވަމުންނެވެ. މިގޮތުން މިދިޔަ ބުރާސްފަތި ދުވަހު ޑުޓާޓޭ ވަނީ މިމައްސަލާގައި އދ.ގެ ސެކްރެޓަރީ ޖެނެރަލް ބާންކީ މޫންއަށް ވެސް ވަރަށްބޮޑަށް ފާޑުވިދާޅުވެފަ އެވެ. އޭގެކުރިން އެމެރިކާއަށާއި ޔޫރަޕްގެ އިއްތިޙާދަށް ވެސް ޑުޓާޓޭ ފާޑުވިދާޅުވެފައިވެ އެވެ.
އދ. ގެ ޖެނެރަލް އެސެމްބްލީގައި ތަގްރީރު ކުރައްވަމުން ފިލިޕީންސްގެ ޚާރިޖީ ވަޒީރު ވިދާޅުވީ ޖަރީމާތަކާއި މަސްތުވާތަކެތި ކޮންޓްރޯލް ކުރުމަށް ރައީސް ރޮޑްރިގޯ ޑުޓާޓޭ ފައްޓަވާފައިވާ ހަނގުރާމައަކީ ފިލިޕީންސްގެ ރައްޔިތުންގެ ފުރިހަމަ ތާއީދާއެކު ކުރިޔަށްގެންދަވާ ހަނގުރާމައެއް ކަމަށާ އެހަނގުރާމައަށް ބޭރުގެ ފަރާތްތަކުން ފާޑުކިޔަންޖެހޭ އެއްވެސް ސަބައެއް ނޯންނާނެ ކަމުގަ އެވެ.
ފިލިޕީންސްއަކީ ބޮޑެތި ޖަރީމާތަކާއި މަސްތުވާތަކެތީގެ ޝިކާރައަކަށް ވަރަށްބޮޑަށް ވެފައިވާ ގައުމެކެވެ. މިކަމުގެ ސަބަބުން އެގައުމުގެ ގައުމީ އުފެއްދުންތެރިކަމާއި ތަރައްގީއަށާއި ރައްޔިތުންގެ ދިރިއުޅުމަށްވެސް ނުރައްކާތައް ކުރިމަތިވެފައިވާ ކަމަށް އެގައުމުން ބުނެ އެވެ. (ރޮއިޓާސް)