25 Sep 2016, 09:22
މި ފަހުގެ ތާރީހްގައި ރާއްޖޭގެ ކުޅިވަރު އެސޯސިއޭޝަންތައް މި ވަނީ އެއް ތަނަކަށް އެއްވެ ހިޔާލު ބަދަލުކޮށް އެ ފަރާތްތަކަށް ދިމާވާ ކަންބޮޑުވުންތައް މޯލްޑިވްސް ސްޕޯޓްސް ކޯޕަރޭޝަނާ ހިއްސާ ކޮށްފަ އެވެ.
ސްޕޯޓްސް ކޯޕަރޭޝަން އާއި ޔޫތު މިނިސްޓްރީ ގުޅިގެން 'ކުޅިވަރު އިޖްލާސް 2016'ގެ ނަމުގައި ރާއްޖޭގެ ހުރިހާ ގައުމީ ކުޅިވަރު އެސޯސިއޭޝަން އަށް ދައުވަތު ދީގެން މިއަދު ޕެރަޑައިސް އައިލެންޑް ރިސޯޓްގައި ކުރިއަށް ގެންދިޔަ އެ ހަރަކާތުގެ ފުޓްބޯޅަ އާއި ވޮލީ އަދީ ބާސްކެޓް ފިޔަވާ ހުރިހާ އެސޯސިއޭޝަންތަކުން ވަނީ މަންދޫބުން ބައިވެރިވެ އެ ފާރްތްތަކުގެ ވާހަކަތައް ހިއްސާ ކޮށްފަ އެވެ.
"މި ޕްރޮގްރާމްގެ މަގުސަދަކީ ފާއިތުވި ދެތިން އަހަރު ދުވަހުގެ ތެރޭގައި ތިޔަބޭފުޅުން ކުރެއްވި ބުރަ މަސައްކަތުން ދިވެހި ގައުމަށް ހޯދައިދެއްވި ކާމިޔާބީ ފާހަގަކުރެއްވުން. ކާމިޔާބީ ހޯއްދެވުމަށް ތިޔަ ބޭފުޅުން ކުރެއްވި ބުރަ އުނދަގޫ ދަތުރު ހިއްސާކުރުން. އަދި ލިބުނު އިބުރަތުން ކުރިމަގު ބައްޓަން ކުރަންވީ ފުރިހަމަ ތަސައްވަރެއް އެކުލަވާލުން،" ކޯޕަރޭޝަންގެ މެނޭޖިން ޑިރެކްޓަރު އަބްދުލް ރައްޒާގް އިބްރާހިމް ވިދާޅުވި އެވެ.
ކުޅިވަރު އެސޯސިއޭޝަން ތަކައް ދިމާވާ މައްސަލަ ތައް ދެނެގަތުމައް "ކުޅިވަރު އިޖްލާސް 2016" މި ނަމުގައި ޕެރަޑައިސް އައިލެންޑް ރިސޯޓްގައި ބޭއްވި ޕްރޮގްރާމްގެ ތެރެއިން--- ސަން ފޮޓޯ: މުހައްމަދު އަފްރާހް
އޭނާ ވިދާޅުވީ ކުޅިވަރު އިޖްލާސްގެ އެންމެ ބޮޑު މަގުސަދަކީ ގައުމީ ފެންވަރުގައި ކުޅޭ ކުޅިވަރުތައް ތަރައްގީ ކުރުން ދިމާވާ ގޮންޖެހުންތަކާ މެދު އާ ވިސްނުމަކުން މަސްވަރާކޮށް ހައްލެއް ހޯދުމަށް މަގުފަހިކުރުން ކަމަށެވެ.
މައިގަނޑު ގޮތެއްގައި ހުރިހާ ކުޅިވަރު އެސޯސިއޭޝަންތަކުން ވެސް ފާހަގަކޮށްފައި ވަނީ އެއް މައްސަލަތަކެކެވެ. އެއީ އެސޯސިއޭޝަންތަކަށް ދައުލަތުން ލިބޭ ބަޖެޓް ކުޑަ ކަމަށާއި ބައެއް އެސޯސިއޭޝަންތަކަށް އެއްވެސް ވަރައްގެ ފައިސާގެ އެހީ ނުލިބޭ ކަމަށެވެ.
ކުޅިވަރު އިޖްލާސް 2016 ފައްޓަވައި ދެއްވުމަށް ފަހު ޔޫތް މިނިސްޓަރު އިރުތިޝާމް އެސޯސިއޭޝަން ތަކުގެ މަންދޫބުންނާ އެކު --- ސަން ފޮޓޯ: މުހައްމަދު އަފްރާހް
ގިނަ ކުޅިވަރުތަކަށް ހާއްސަކޮށްގެން ސްޓޭޑިއަމް އެއް ނުވަތަ އެކުޅުވަރު ކުޅޭނެ ރަނގަޅު މާހައުލެއް ތަނަވަސް ވެފައި ނެތުމާ ހިރި ވަސީލަތްތަށް ވެސް ޒަމާނީކުރުމަކީ ރާއްޖެއިން ބޭރުން މެޑަލް ހޯދައިދީ ގައުމަށް ރީތު ނަން ހޯދައިދިނުމަށް އެތުލީޓުންނަށް ފަސޭހަ ވެގެން ދާނެ ކަމެއް ކަމަށް ވަނީ އެސޯސިއޭޝަން ތަކުން ފާހަގަކޮށްފަ އެވެ.
އެ ބައްދަލުވުމުގައި ވަނީ ކުޅިވަރު އެސޯސިއޭޝަންތަކުން ފާހަގަކުރި މައްސަލަތަކަށް ހައްލެއް ހޯދުމަށް ޔޫތު މިނިސްޓްރީ އިންނާއި ސްޕޯޓްސް ކޯޕަރޭޝަން އިން ސަރުކާރާއި ގުޅިގެން މަސްތްކަތް ކުރާނެ ކަމަށް ބުނެފަ އެވެ.