22 Sep 2016, 14:37
ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމް އަވަހާރަކޮށްލަން އުޅުނު ކަމުގެ ތުހުމަތުގައި ސްރީލަންކާ ސުނައިޕަރު ލަހިރު މަޑުޝަންކަރާއި ކުރީގެ ނައިބު ރައީސް އަހުމަދު އަދީބާއި އިތުރު ބައެއްގެ މައްޗަށް އުފުލި ދައުވާގެ މިއަދަށް ތާވަލުކުރި އަޑުއެހުން ސިއްރުކޮށްފި އެވެ.
ރައީސް އަބްދުﷲ ޔާމީން އަބްދުލް ގައްޔޫމު އަވަހާރަކޮށްލުމަށް ރޭވި ކަމަށް ތުހުމަތުކޮށް ދައުލަތުން ދައުވާ އުފުލާފައި ވަނީ ކުރީގެ ނައިބު ރައީސް އަދީބާއި ލަންކާ ސުނައިޕަރުގެ އިތުރުން މ. ލިލީޕާކް ފަޒީލް ހަމީދު އާއި ގ. އޮއިވާލި އިސްހާގު ހުސައިންގެ މައްޗަށެވެ.
އެ މައްސަލައިގެ މީގެކުރިން ބޭއްވި އަޑުއެހުންތައް އާންމުންނަށާއި ނޫސްވެރިންނަށް ހުޅުވާލައިގެން ބޭއްވި ނަމަވެސް މިއަދުގެ އަޑުއެހުން ވަނީ ސިއްރުކޮށްފަ އެވެ.
މީގެކުރިން ބޭއްވި އަޑުއެހުމުގައި ވަނީ ދެމީހެއްގެ ހެކިބަސްނަގައިފަ އެވެ. މިއަދުގެ އަޑުއެހުމަށް ވެސް ތާވަލުކޮށްފައި ވަނީ ހެކިބަސް ނެގުމެވެ.
ދައުލަތުން އުފުލި ދައުވާގައި ބުނެފައި ވަނީ އަދީބާއި ފަޒީލް އިތުރު ބަޔަކާ ގުޅިގެން މިދިޔަ އަހަރުގެ އޮކްޓޯބަރު މަހުގެ ތެރޭގައި ރައީސް ޔާމީނަށް ހަމަލާދީ އަވަހާރަކޮށްލަން ބަޑިޖަހާ މީހަކު ހޯދަން ރާވާފައިވާ ކަމަށެވެ. އަދި ރާވާފައިވާ ގޮތުގެމަތިން ސްރީލަންކާގެ ސުނައިޕަރު ރާއްޖެ އައިސްފައިވާ ކަމަށް ވެސް އެ ދައުވާގައިވެ އެވެ.
އެ މައްސަލާގައި އެ ތިން މީހުންގެ މައްޗަށް އުފުލާފައި ވަނީ އެނގި ހުރެ މީހަކު މަރަން ރޭވި ކަމުގެ ދައުވާ އެވެ.
އެ އަމަލުގެ މައުލޫމާތު އެނގި ހުރެ އެ އަމަލުގައި ބައިވެރިވުމުގެ ގޮތުން އަދީބު ވިދާޅުވެގެން އެކަމަށް ބޭނުންވާނޭ ފައިސާ އަދީބު ވިދާޅުވި ފަރާތްތަކަށް އިސްހާގު ފޯރުކޮށްދީފައިވާ ކަމަށެވެ.
އެ މައްސަލާގައި އިސްހާގުގެ މައްޗަށް އުފުލީ އެނގިހުރެ މީހަކު މަރަން ރޭވުމުގައި ބައިވެރިވުމުގެ ދައުވާ އެވެ.