22 Sep 2016, 13:25
ގާހިރާ (ސެޕްޓެމްބަރު 22): މިސްރުގެ ދައުލަތުގެ ނޫސް އޭޖެންސީން އެ ގައުމުގެ ރައީސް އަބްދުލްފައްތާހު އަލް ސީސީ ދާދި ފަހުން ދެއްވި އިންޓަވިއުއެއްގެ ބަދަލުގައި ކުރީގެ އިންޓަވިއުއެއް ދެއްކުމުން އެޗެނަލްގެ ހަބަރުތަކާ ބެހޭ ޗީފް މަގާމުން ވަކިކޮށްފި އެވެ.
ޔޫއެންގެ ޖެނެރަލް އެސެމްބްލީގައި ބައިވެރިވެވަޑައިގަތުމަށް ސީސީ އެމެރިކާގައި ހުންނަވަނިކޮށް މިސްރުގެ ޗެނަލް އެކަކުން ދައްކަން ހަމަޖެހިފައި އޮތީ އެމެރިކާގެ ޕީބީއެސް އަށް ދާދި ފަހުން ސީސީ ދެއްވި އިންޓަވިއުއެކެވެ. އޭގެ ބަދަލުގައި ޗެނަލް އެކަކުން ދައްކާފައި ވަނީ މީގެ އެއް އަހަރު ކުރިން ޕީބީއެސްއަށް ސީސީ ދެއްވި އިންޓަވިއުއެކެވެ.
އަދި ޓީވީން ދައްކަމުން ދިޔައީ ނުބައި އިންޓަވިއު އެއްކަން އެނގުމާ އެކު އެނޫސް އޭޖެންސީގެ މުވައްޒަފުން ވަނީ ޓްރާންސްމިޝަން މެދުކަނޑާލާފަ އެވެ.
އެހާދިސާއާ ގުޅިގެން ޗެނަލް އެކެއްގެ ހަބަރުތަކާ ބެހޭ ޗީފް، މުސްތަފާ ޝިހާތާ މަގާމުން ވަކިކޮށްފައިވާ ކަން އޭނާ ވަނީ ޔަގީންކޮށްދެއްވާފަ އެވެ. އަދި ކުރީގެ އިންޓަވިއު ދެއްކި ވަގުތު އެތަނުގައި އެހެން މީހުން ވެސް ތިބި ކަމަށާއި އޭނާ ވަޒީފާ އިން ވަކި ކުރުމަކީ ހަމަޖެހޭ ކަމެއް ނޫން ކަމަށް މުސްތަފާ ވިދާޅުވި އެވެ.
އެމައްސަލައާ ގުޅިގެން މިސްރުގެ ދައުލަތުގެ ނޫސް އޭޖެންސީން ވަނީ މާފަށް އެދިފަ އެވެ. އަދި އެ މައްސަލާގައި ޒިންމާވާ މީހުން ހޯދުމަށް ތަހުގީގު ކުރަމުންދާ ކަމަށް ބުނެފަ އެވެ. (ބީބީސީ)