21 Sep 2016, 13:18
ނިއު ދިއްލީ (ސެޕްޓެމްބަރު 21): އިސްރާއީލާ ގުޅިގެން އިންޑިއާއިން އުފައްދާފައިވާ ދިގު ރާސްތާ މިސައިލެއް އިންޑިއާއިން މިއަދު ލޯންޗުކޮށްފި އެވެ.
އެއްގަމުން ވަޔަށް ދަތުރު ކުރާ އެ މިސައިލް ލޯންޗުކޮށްފައި ވަނީ އޮޑީޝާ ސްޓޭޓުގެ އައްސޭރިފަށުގައިވާ ޑިފެންސް ބޭސްއަކުންނެވެ. އިންޑިއާގެ ޑިފެންސް ރިސާޗް އެންޑް ޑެވެލޮޕްމެންޓް އޯގަނައިޒޭޝަން (ޑީއާރުޑީއޯ)އިން ބުނި ގޮތުގައި އެ މިސައިލުގެ ޓެސްޓުތައް ކާމިޔާބެވެ. އަދި ވަރަށް އަވަހަށް އެފަދަ އެހެން ޓެސްޓުތައް ހަދަން ހަމަޖެހިފައިވާ ކަަމަށް ޑީއާރުޑީއޯއިން ބުންޏެވެ.
"މިސައިލްގެ އިތުރުން އެސިސްޓަމްގައި މިސައިލަށް ރާސްތާ ދެއްކުމަށާއި ޓްރެކް ކުރުމަށް މަލްޓި ފަންކްޝަނަލް ސާވެއިލެންސް އެންޑް ތްރެޓް އެލާޓް ރާޑަރު (އެމްއެފް ސްޓާ) ހިމެނޭ،" ޑީއާރްޑިއޯގެ އޮފިޝަލަކު ވިދާޅުވި އެވެ.
އޮފިޝަލު ވިދާޅުވި ގޮތުގައި އެމްއެފް ސްޓާގެ ސަބަބުން ވައި މަތިން މިސައިލަށް ލިބިދާނެ ގެއްލުމަކުން މިސައިލް ސަލާމަތް ކޮށްދޭނެ އެވެ.
އިންޑިއާގައި މިސައިލް ލޯންޗު ކުރި ވަގުތު ސަލާމަތީ ކަންތައްތައް ވަރުގަދަ ކުރުމުގެ ގޮތުން ޑިފެންސް އޮފިޝަލުން ވަނީ ބަލަސޯރު ޑިސްޓުރިކްޓުގެ 3،652 މީހުން މިސައިލް ލޯންޗު ކުރާ ސަރަހައްދާ 2.5 ކިލޯ މީޓަރު ދުރަށް ޖައްސާފަ އެވެ. (އެންޑީޓީވީ)