18 Sep 2016, 22:11
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ޖެނަރަލް ސެކްޓްރީގެ މަގާމްގައި ހުރި ބައްސާމް އަދީލް ޖަލީލް އެމަގާމުން މިއަދު ވަކިކޮށްފިއެވެ.
ބައްސާމް ވަކިކުރެއްވިކަން އެފްއޭއެމްގެ ރައީސް އަހުމަދު ޠާރިޤު (ޓޮމް) 'ސަން' އަށް ކަށަވަރުކޮށްދެއްވި ނަމަވެސް އެކަމާ ގުޅޭ އިތުރު ތަފްސީލެއް އޭނާ ނުދެއްވައެވެ.
އިންތިޚާބު ނުބޭއްވި ދެ އަހަރު ދުވަހަށް ދިގުލައިގެން ދިޔުމަށް ފަހު މި އަހަރުގެ މޭ 31ގައި އެފްއޭއެމްގެ އިންތިހާބު އަހުމަދު ޠާރިޤު ކާމިޔާބު ކުރެއްވުމަށް ފަހު ކޮންގްރެސް ޖަލްސާގެ ތެރެއިން އޭނާ ވަނީ ބައްސާމް ޖެނަރަލް ސެކެޓްރީގެ މަގާމަށް އައްޔަނުކޮށްފައިވާކަން އިއުލާން ކޮށްފައެވެ.
އެފްއޭއެމްގެ ހިންގުން 2014 ވަނަ އަހަރު ނޯމަލައިޒޭޝަން ކޮމެޓީއަކާ ހަވަލުވުމާ އެކު އެ ކޮމިޓީގެ ޗެއާމަން މުހައްމަދު ޝަވީދު ވެސް ވަނީ އޭރުގެ ޖެނަރަލް ސެކެޓްރީ އަކަށް ބައްސާމު އައްޔަނު ކޮށްފައެވެ. ބައްސާމް އެ މަގާމުން އިސްތިއުފާ ދެއްވީ ނޯމަލައިޒޭޝަން ކޮމެޓީގެ ޗެއާމަންގެ މަގާމުން މުހައްމަދު ސަވީދު އިސްތިއުފާ ދެއްވުމާއި ގުޅިގެން ފީފާއިން ބައްސާމް އެ ކޮމެޓީގެ ޗެއާމަނަކަށް ހަމަ ޖެއްސުމުންނެވެ.
މީގެ ކުރިން ވެލެންސިއާ އަށް ކުޅުނު އަދި ފަހުން އެ ކުލަބު ހިންގުމުގައި ވެސް އިސް ދައުރެއް އަދާކުރެއްވި ބާއްސާމު އެފްއޭއެމްގެ ޖެނަރަލް ސެކެޓްރީގެ މަގާމުން ވަކިކުރިއިރު އޭނާ އަކީ ފުޓްބޯޅަ ކުޅުންތެރީންގެ އިތުރުން ދިވެހި ފުޓްބޯޅަ އާއިލާއާ ވެސް ވަރަށް ގާތުން މަސްތްކަތް ކުރައްވަމުންދާ ބޭފުޅެކެވެ.