18 Sep 2016, 16:24
ސޫރަތް (ސެޕްޓެމްބަރު 18): އިންޑިއާގެ ބޮޑުވަޒީރު ނަރެންދުރަ މޯދީގެ 66 ވަނަ އުފަންދުވަސް ފާހަގަ ކުރުމުގެ ގޮތުން ދުނިޔޭގެ އެންމެ އުސް ޕިރަމިޑް ކޭކުގެ މަގާމު ހޯދުމުގެ އުއްމީދުގައި ކޭކެއް އަޅައިފި އެވެ.
ގުޖުރާތުގެ އަތުލް ބޭކަރީން އަޅާފައިވާ އެކޭކުގެ ދިގުމިނުގައި ގާތްގަނޑަކަށް ދެ މީޓަރު ހުރި އިރު އޭގެ ބަރުދަނުގައި 3750 ކިލޯގްރާމް ހުރި ކަމަށް އަތުލް ބޭކަރީގެ ޗެއާމަން އަތުލް ވެކަރިޔާ ވިދާޅުވި އެވެ.
"ކޭކުގެ ބަރުދަނަކީ 3750 ކިލޯގްރާމް. އަޅުގަނޑުމެން ވަނީ މިއަދު ދުނިޔޭގެ ރިކޯޑު މުގުރާލާފައި،" އަތުލް ވެކަރިޔާ ވިދާޅުވި އެވެ.
ގިނެސް ވޯލްޑް ރިކޯޑްސްގައި ދުނިޔޭގެ އެންމެ އުސް ޕިރަމިޑް ކޭކުގެ މަގާމުގައި މިހާރު އޮތީ ޕޮލެންޑުގެ ފެއާއެއްގައި އެޅި 1.74 މީޓަރު ދިގު ކޭކެކެވެ. އެކޭކުގެ ބަރުދަނުގައި ހުރީ 720.8 ކިލޯގުރާމެވެ.
ޗޮކޯބެރީ ފްލޭވާގެ އެކޭކު އެޅުމަށް 30 ޝެފުން ދެ ދުވަސް ހޭދަ ކޮށްފައިވެ އެވެ. އަތުލް ބޭކަރީން އެކޭކު އަޅާފައި ވަނީ އިންޑިއާގެ ފަގީރު ސަރަހައްދުތަކުގައި ދިރިއުޅޭ އަންހެންކުދިން މާލީ ގޮތުން ބާރުވެރިން ކުރުވުމަށް މަސައްކަތް ކުރާ ޖަމްއިއްޔާއެއް ކަމަށްވާ ޝަކްތީ ފައުންޑޭޝަންއާ ގުޅިގެންނެވެ.
މިއަދު އެކޭކު ފެޅުމަށް ހަމަޖެހިފައި ވަނީ އިންޑިއާގެ ފަގީރު ސަރަހައްދުތަކަށް ނިސްބަތްވާ 5،000 އަންހެން ކުދިންނެވެ. އެ ކޭކު އެ ކުދިންނަށާއި އިތުރު މީހުންނަށް ބަހަން ހަމަޖައްސާފައިވާ ކަމަށް އިންޑިއާގެ މީޑިއާތަކުން ބުންޏެވެ.