18 Sep 2016, 15:56
ކުރީގެ ނައިބު ރައީސް އަހުމަދު އަދީބާ ގާތް ގުޅުމެއް އޮންނަ މުހައްމަދު އައްލާމް ލަތީފް (މޮހޯ)ގެ ހިއްސާ އޮންނަ އެސްއޯއެފް ޕްރައިވެޓް ލިމިޓެޑުން 160 މިލިއަން ރުފިޔާ ނަގައިދިނުމަށް އެދި އެމްއެމްޕީއާރިސީ އިން ސިވިލް ކޯޓުގައި ދައުވާ ކޮށްފި އެވެ.
މީގެ ކުރިން އެމްއެމްޕީއާރުސީ އިން އާންމު ކުރި އޮޑިޓް ރިޕޯޓުގައި ބުނެފައި ވަނީ އެމްއެމްޕީއާރްސީން އެސްއޯއެފްގެ އެކައުންޓަށް ޖަމާކޮށްފައި ވަނީ 70.17 މިލިޔަން ޑޮލަރު (1 ބިލިއަން ރުފިޔާ) ކަމަށެވެ. އެ ފައިސާއަކީ ރަށްތަކާއި ފަޅުތައް ދޫކުރުމުން ދައުލަތަށް ލިބެން ޖެހޭ ފައިސާ ކަމަށް އޮޑިޓް ރިޕޯޓުގައިވެ އެވެ.
އެމްއެމްޕީއާރުސީ އިން ސިވިލް ކޯޓުގައި އެސްއޯއެފްއާ ދެކޮޅަށް ކުރި ދައުވާގައި ބުނެފައި ވަނީ އެއްބަސްވުމެއްގެ ދަށުން އެމްއެމްޕީއާރުސީއަށް ލިބެން ޖެހޭ 158 މިލިއަން ރުފިޔާ އާއި އެމްއެމްޕީއާރުސީ އިން އެސްއޯއެފްއަށް ދޫކުރި 6.1 މިލިއަން ރުފިޔާ އެކީ އެއްފަހަރާ ދިނުމަށް އަމުރުކޮށްދިނުމަށެވެ.
މައްސަލަ ހުށަހަޅައި ޝަރީއަތުން ބޭރުން މައްސަލަ ހައްލުރުކުރުމަށް މަޝްވަރާކުރެވުނު ނަމަވެސް އެކަން ހައްލު ނުވެ މައްސަލަ ވަނީ ޝަރީއަތަށް ފޮނުވާފަ އެވެ.
އެމްއެމްޕީއާރުސީ އިން މީގެ ކުރިން ނެރުނު އޮޑިޓް ރިޕޯޓާ ގުޅިގެން އެސްއޯއެފުން ބުނެފައި ވަނީ އެމްއެމްޕީއާރްސީގެ ހިޔާނާތުގެ އޮޑިޓް ރިޕޯޓުން މުހިންމު ބައިތައް "ވަންހަނާކޮށްފައިވާ" ކަމަށެވެ. އެހެންކަމުން މިނިވަން މުސްތަގިއްލު ފޮރެންސިކް އޮޑިޓެއް ހެދުމަށް އެސްއޯއެފުން ވަނީ އެދިފަ އެވެ.
އެމްއެމްޕީއާރުސީގެ ހިޔާނާތުގެ މައްސަލަ ސާބިތުވެ ކުރީގެ ނައިބު ރައީސް އަހުމަދު އަދީބާއި އެމްއެމްޕީއާރުސީގެ ކުރީގެ މެނޭޖިންގް ޑިރެކްޓަރު އަބްދުޑ ޒިޔަތު އަދި ހާމިދު އިސްމާއިލް ޖަލަށް ލާން ކްރިމިނަލް ކޯޓުން ވަނީ ހުކުމް ކޮށްފަ އެވެ.