17 Sep 2016, 17:37
ލަންޑަން(ސެޕްޓެމްބަރު 17): ދެހާސްތިން ވަނަ އަހަރު އިރާގުގައި ތިބި އިނގިރޭސިވިލާތުގެ ހަތަރު ސިފައިން ވަނީ ފަތަން ނޭނގޭ ކުޑަކުއްޖަކު ކެނަލްއަކަށް އެރެން މަޖުބޫރުކޮށް، އެކުއްޖާ ފެތެން ދޫކޮށްލާފައި ކަމަށް އެމައްސަލަ ބެއްލެވި ފަނޑިޔާރު ވިދާޅުވެއްޖެ އެވެ.
ފަނަރަ އަހަރުގެ އަހުމަދު ޖައްބާރު ކަރީމް އަލީގެ މަރާ ބެހޭ ގޮތުން ފަނޑިޔާރު ޖޯޖް ނިއުމަން އެކުލަވާލެއްވި ރިޕޯޓެއްގައިވާ ގޮތުން، އިރާގުގެ ބަސަރާގައިވާ ކެނަލްއަކަށް އަހުމަދު އެރެން ސިފައިން މަޖުބޫރު ކުރުވީ "އޭނާގެ ފުރާނައަށް ލިބިދާނެ ގެއްލުމަކަށް އެއްވެސް ފަރުވާލެއް ނެތި" އެވެ.
ދެހާސްތޭރަ ވަނަ އަހަރުގެ މޭ މަހު އިނގިރޭސި ސިފައިން އަހުމަދާއި އިތުރު ތިން ކުއްޖަކު ހައްޔަރު ކުރީ ވައްކަން ކުރުމުގެ ތުހުމަތުގައެވެ. އެކުދިން ހައްޔަރު ކުރުމަށް ފަހު ސިފައިން ވަނީ ބަސަރާގެ ޝަތް އަލް ބަސަރާ ކެނަލްއަށް އެރެން އެކުދިންނަށް މަޖުބޫރުކޮށްފައެވެ. އަދި އަހުމަދަށް ފަތަން ނޭނގުމުގެ ސަބަބުން އޭނާ ފެތިގެން މަރުވީ އެވެ.
"އެކުއްޖާ މަރުވެފައި ވަނީ އޭނާ ކެނެލްއަށް އެރެން މަޖުބޫރުކޮށް، އޭނާ ފެތެން ފެށުމުން އެތާ ތިބި ސިފައިން އޭނާއަށް އެހީ ނުވުމުން ކަން ވަރަށް ސާފު،" ރިޕޯޓުގައިވެ އެވެ.
އެރިޕޯޓު އެކުލަވާލުމުގެ ކުރިން 2006 ވަނަ އަހަރު އިނގިރޭސިވިލާތުގެ ކޯޓަކުން ވަނީ އެހަތަރު ސިފައިންގެ މައްސަލަ ބެލުމަށް ފަހު، އެމީހުންގެ މައްޗަށް ގަސްތުގައި މީހަކު މެރުމުގެ ދައުވާ ސާބިތު ނުވާ ކަމަށް ނިންމާފައެވެ.
އެރިޕޯޓު އާއްމު ކުރި ފަހުން އިނގިރޭސިވިލާތުގެ ޑިފެންސް މިނިސްޓްރީން ވަނީ މައްސަލައާ ގުޅިގެން މާފަށް އެދިފައެވެ. އަދި އެފަދަ މައްސަލަތައް ތަހުގީގު ކުރަމުންދާ ކަމަށް ބުނެފައެވެ.
ނަމަވެސް އެރިޕޯޓާ ގުޅިގެން އެ ހަތަރު ސިފައިންނާ ދެކޮޅަށް ގާނޫނީ ފިޔަވަޅު އެޅުމަކީ އެކަށީގެންވާ ކަމެއް ނޫން ކަމަށް ރިޕޯޓުތަކުގައިވެ އެވެ. (އަލްޖަޒީރާ)