17 Sep 2016, 11:55
ސްރީ ލަންކާގެ އުތުރުގެ ސަރަހައްދެއް ކަމަށްވާ ކިލިނޮއްޗީގައި ރޭ ހިނގި އަލިފާނުގެ ހާދިސާއެއްގައި، އެ ސަރަހައްދުގައި ހުރި 100 އަށްވުރެ ގިނަ ފިހާރަ އަނދައި ހުލިވެއްޖެއެވެ.
ޖަފްނާގެ އިރު ދެކުނުން 100 ކިލޯ މީޓަރު ދުރުގައި އޮންނަ ކިލިނޮއްޗީ ޑިސްޓްރިކްޓްގައި ރޭ މެންދަމުގެ ވަގުތެއްގައި ހިނގި އަލިފާނުގެ ހާދިސާގައި ޝޮޕިން ކޮމްޕްލެކްސް އަކާއެކު އަނދައި ހުލިވި ފިހާރަތަކުގެ ތެރޭގައި ގިނައިން ހިމެނެނީ މޭވާއާއި ތަރުކާރީ އަދި އަންނައުނު ފިހާރަތައް ކަމަށް އެ ގައުމުގެ ޚަބަރުފަތުރާ ވަސީލަތްތަކުން ބުނެއެވެ. ރޯވެފައިވާ އަލިފާން ނިއްވުމުގައި ހަރަކާތްތެރިވީ އާމީ ސިފައިންނާއި އެ ސަރަހައްދުގެ އާންމުންނާއި ފުލުހުންނެވެ.
ސްރީ ލަންކާގެ ކިލިނޮއްޗީގެ ފިހާރަތަކެއްގައި ރޯވި އަލިފާން ނިއްވާލުމަށް ސިފައިންނާއި ފުލުހުންނާއި އާންމުން ގުޅިގެން މަސައްކަތްކުރަނީ -- ފޮޓޯ: ކޮލަމްބޯގެޒެޓް
އަލިފާން ރޯވާން މެދުވެރިވީ، އިލެކްޓްރިކަލް ޝޯޓް-ސާކިޓެއްގެ ސަބަބުން ކަމަށް، ކަމާގުޅޭ ފަރާތްތަކުން ލަފާކުރާއިރު، އެވަގުތަކީ އެ ސަރަހައްދަށް ގަދައަށް ވައި ޖެހެމުން ދިޔަ ވަގުތެއްކަމުން އަލިފާންގަނޑު ހަލުއިކަމާއެކު ފެތުރި، ނިއްވާލުމުގައި ދަތިތަކެއް ކުރިމަތިވި ކަމަށް ރިޕޯޓުތައް ބުނެއެވެ. އަދި އެ ހިސާބުގައި ހަދާފައިވާ ވަގުތީ ހިޔާތަކަށްވެސް އަލިފާންގަނޑު ފެތުރި އެތަންތަންވެސް އަނދާފައިވާ ކަމަށް ރިޕޯޓުތައް ބުނެއެވެ.
ސްރީ ލަންކާގެ ކިލިނޮއްޗީގައި ރޭ ހިނގި އަލިފާނުގެ ހާދިސާއެއްގައި 100 އަށްވުރެ ގިނަ ފިހާރަ ވަނީ އަނދާފައި -- ފޮޓޯ: ކޮލަމްބޯގެޒެޓް
ކިލިނޮއްޗީގައި ރޭ އަނދާ ހުލިވެފައިވަނީ، 2009 ވަނަ އަހަރު ނިމިގެންދިޔަ ލަންކާ ހަނގުރާމައަށް ފަހު އެ ސަރަހައްދުގެ ވިޔަފާރިވެރީން އަމިއްލަ ފައިމައްޗަށް ތެދުވުމަށް ފެށި މަސައްކަތެވެ. އެމީހުން ވަނީ، މީގެ ކުރީން ފިހާރަތައް ބިނާކުރުމަށް ލަންކާގެ ޕާލަމެންޓުގައި އެޕީލެއްވެސް ކޮށްފައެވެ. ނަމަވެސް އެ އެޕީލްއަށް ލިބިފައިވަނީ ބީރުކަންފަތެކެވެ.
ރޭގެ އަލިފާނުގެ ހާދިސާއާ ގުޅިގެން، ސަބަރަގަމުވަ ޕްރޮވިންސްގެ ބަލަންގޮޑާގައި ހުންނަ އަމިއްލަ ފަރާތެއްގެ ސައިފަތް ފެކްޓަރީއަކަށް ވެސް ގެއްލުންތަކެއް ލިބިފައިވާ ކަމަށް ރިޕޯޓުތައް ބުނެއެވެ.
ލަންކާގެ ޑިޒާސްޓަރ މެނޭޖްމަންޓުގެ އެސިސްޓެންޓް ޑިރެކްޓަރު ޕްރަދީޕް ކޮޑިއްޕިލި ވިދާޅުވީ، އަލިފާނުގެ ހާދިސާގެ ރިޕޯޓް ލިބުމާއެކު ފަޔަރ ޑިޕާޓްމަންޓަށް ގުޅައިގެން އަލިފާން ނިއްވުމުގައި ހަރަކާތްތެރިވާން ފަށާފައިވާ ކަމަށެވެ.