17 Sep 2016, 10:53
މި އަހަރުގެ ހައްޖު މޫސުން ނިމި، ހައްޖުވެރިން އެނބުރި އެމީހުންގެ ގައުމުތަކަށް ދިއުމަށް ދަތުރުތައް ފަށާފައިވާ އިރު، ސައުދީ އަރަބިއްޔާގެ ތަފާސް ހިސާބުތަކާ ބެހޭ އިދާރާއިން ބުނާ ގޮތުގައި މި އަހަރު ހައްޖު ވެފައިވާ މީހުންގެ އަދަދަކީ 1.8 މިލިޔަނެވެ.
މި އަހަރަކީ، މިދިޔަ 10 އަހަރު ތެރޭގައި މީހުން އެންމެ މަދުން ހައްޖުވި އަހަރު ކަމަށް އެ އިދާރާއިން ބުނެއެވެ.
މި އަހަރު 1.8 މިލިޔަން މީހުން ހައްޖުވި އިރު، މިދިޔަ އަހަރު ހައްޖުވީ މީހުންގެ އަދަދަކީ 1.9 މިލިޔަނެވެ. މިދިޔަ 10 އަހަރުގެ ހިސާބުތަކަށް ބަލާ އިރު، އެންމެ ގިނައިން މީހުން ހައްޖުވެފައި ވަނީ 2012 ވަނަ އަހަރެވެ. އެ އަހަރު 3.1 މިލިޔަނަށް ވުރެ ގިނަ މީހުން ހައްޖުގެ އަޅުކަން އަދާކޮށްފައި ވެއެވެ.
މި އަހަރުގެ ހައްޖުވެރީންގެ އަދަދު މަދުވި ސަބަބަކީ ސައުދީއިން ޚާރިޖީ ގުޅުން ކަނޑާލާފައިވާ އިރާނުން މި އަހަރު އެއްވެސް ހައްޖުވެރިއަކު ހައްޖުވުމަށް ސައުދީއަށް ނުފޮނުވުމެވެ. އިރާނަކީ މީގެ ކުރިން ލައްކައިން ހައްޖުވެރިން ސައުދީއަށް ފޮނުވާ ގައުމެކެވެ. މިދިޔަ އަހަރު އެކަނި ވެސް އިރާނުން ސައުދީއަށް 60,000 ރައްޔިތުން ހައްޖަށް ފޮނުވިއެވެ.
ދެގައުމުގެ ގުޅުން ކެނޑުނީ، ސައުދީގެ ޝީޢީ ދީނީ އިލްމުވެރިޔާ ނިމްރު ބާގިރު އަލް ނިމްރުގެ މައްޗަށް ސައުދީއިން މަރުގެ ހުކުމް ތަންފީޒު ކުރުމާ ގުޅިގެން، ޝީޢީ އާބާދީ ބޮޑު އިރާނުން އެކަމާ ނުރުހުން ފާޅުކޮށް، އެގައުމުގައި ހުރި ސައުދީ ސަފާރާއަށް ހަމަލާ ދިން ހިސާބުންނެވެ.
ލައްކައިން ސައުދީއަށް ކުރިން ދާ އިރާނުގެ ހައްޖުވެރިން މި އަހަރު "ނެތް ތަންކޮޅު" ވަރަށް ބޮޑަށް ވަނީ ފެނިފައެވެ.
އިރާނާއި ސައުދީގެ ޚާރިޖީ ގުޅުން ކެނޑުނު ނަމަވެސް އިރާނުން ހައްޖުވެރިން ސައުދީއަށް ފޮނުވުން ސަައުދީއިން މަނައެއް ނުކުރެއެވެ. އެހެން ނަމަވެސް އެގައުމުން ބުނެފައިވަނީ އިރާނު ރައްޔިތުން އެގައުމަށް ދަތުރުކުރަން ޖެހޭނީ ސައުދީއިން އެމީހުންނަށް ރައްކާތެރިކަން ފޯރުކޮށް ނުދޭނެކަން ދަނެގެން ކަމަށާއި، އެމީހުންނަށް ދިމާވާ ކަންކަމަށް ސައުދީއިން ޒިންމާ ނުނަގާނެ ކަމަށެވެ.
އެހެންކަމުން، އިރާނުގެ ރައްޔިތުންގެ ސަލާމަތާއި ރައްކަލަށްޓަކައި އެގައުމުން ހައްޖުވެރިން ނުފޮނުވުމަށް ނިންމީއެވެ.
އިރާނު ހައްޖުވެރިން ނެތްކަން ސައުދީގެ އިގްތިސާދުން ވެސް ދައްކާނެ ކަމަށް ބެލެވެއެވެ. އިރާނަކީ މީގެ ކުރިން އެންމެ ގިނައިން ހައްޖުވެރިން ސައުދީއަށް ދާ ގައުމެވެ. ހައްޖު ޓޫރިޒަމުން އަހަރަކު އެވަރެޖްކޮށް 18 ބިލިޔަން ޑޮލަރު ސައުދީއިން ހޯދާ އިރު، އިރާނުގެ ހަ ލައްކަ ހައްޖުވެރިން މި އަހަރު ނެތް ކަމުން 18 ބިލިޔަން ޑޮލަރުގެ އާމްދަނީއަށް އިރާނުގެ ފަރާތުން ކުރިން އަންނަ ފައިސާއެއް މި އަހަރު ނޯންނާނެއެވެ.
މިދިޔަ އަހަރު ހައްޖު މޫސުމުގައި މިނާގައި ޖަމްރާއަށް ހިލަ އުކުމުގެ ތެރޭގައި ހައްޖުވެރިން ފިތި ބާރުވެ، ދެހާހަކަށް ހާޖީން ނިޔާވި ހާދިސާގައި އެންމެ ގިނައިން ނިޔާވީ އިރާނުގެ ހާޖީންނެވެ. އިރާނުގެ 500 ވަރަކަށް ހާޖީން އެ ހާދިސާގައި ނިޔާވިއެވެ.
މި މަހުގެ ކުރީކޮޅު، އިރާނުގެ ރޫހީ ލީޑާރު އާޔަތުﷲ އަލީ ޚާމަނާއީ ވަނީ، މިނާގައި މިދިޔަ އަހަރު ހިނގި ހާދިސާއަކީ ސައުދީ އަރަބިއްޔާއިން ގަސްތުގައި މީހުން މެރުމަށްޓަކައި "ހިންގި އަމަލެއް" ކަމަށް ތުހުމަތުކުރައްވައިފައެވެ.
މިކަމާ ގުޅިގެން މައްކާ ޕްރޮވިންސްގެ ގަވަރުނަރު، އަމީރު ޚާލިދު ބިން ފައިސަލް އަލް ސައުދު ވިދާޅުވީ އަރަބި މުސްލިމުންނާ ދެކޮޅަށް ނަފްރަތު އުފައްދަން ބަޔަކު މަސައްކަތް ކުރާ ނަމަ އެބަޔަކަށް ތެދުމަގު ދެއްކެވުން އެދޭ ކަމަށެވެ.
ސައުދީ އަރަބިއްޔާއާއި އިރާނާ ދެމެދު މައްސަލަ ޖެހި، ސައުދީއިން އިރާނާ ގުޅުން ކަނޑާލުމާ ގުޅިގެން، ސައުދީ އަރަބިއްޔާއަށް ވާގިވެރިވާ ގިނަ ގައުމުތަކަކުން އިރާނާ ޚާރިޖީ ގުޅުން ވަނީ ކަނޑާލާފައެވެ. އަދި ރާއްޖެއިން ވެސް އިރާނާ އޮތް ޚާރިޖީ ގުޅުން ކަނޑާލިއެވެ. ނަމަވެސް ފޮރިން މިނިސްޓްރީން ބުނީ ރާއްޖޭގެ އެ ނިންމުމަކީ ސައުދީ އަރަބިއްޔާގެ ނުފޫޒެއް އައިސްގެން ނިންމި ނިންމުމެއް ނޫން ކަމަށެވެ.