16 Sep 2016, 20:03
މިރޭ ހަނދުކޭތަ ހިފާ ވަގުތު، ރާއްޖޭގައި މީހުން ދިރިއުޅޭ ހުރިހާ ރަށެއްގައި ކޭތަނަމާދު ކުރުން އޮންނާނެއެވެ.
އިސްލާމިކް މިނިސްޓްރީން ބުނާ ގޮތުގައި ކޭތަނަމާދު ކުރުން އޮންނާނީ މިރޭ 11:54ގައެވެ.
މާލޭގައި ކޭތަނަމާދު ކުރާނީ އިސްލާމީ މަރުކަޒުގައި ހުންނަ މަސްޖިދުލް ސުލްތާން މުހައްމަދު ތަކުރުފާނުލް އައުޒަމްގައެވެ.
ވިލިމާލޭގައި ކޭތަނަމާދު ކުރާނީ މަސްޖިދުލް އިޚްލާސްގައެވެ. އަދި ހުޅުމާލޭގައި ކޭތަނަމާދު ކުރާނީ މަސްޖިދު ޝައިޚް ޤާސިމް ބިން އަލް ޘާނީގައެވެ.
މިރޭ ހިފާ ހަނދުކޭތަ އެންމެ ބޮޑަށް ހިފާފައި ހުންނާނެ ވަގުތަކީ 11:54 އެވެ.
ކޭތަނަމާދަކީ އެހެން ނަމާދުތަކާ ތަފާތުކޮށް ކުރާ ނަމާދެކެވެ. ކޭތަނަމާދުގައި ޛިރުކޮށް ޤުރުއާން ކިޔަވާ އިރު، ރުކޫޢުގައި ގިނަ ވަގުތު ހޭދަ ކުރެއެވެ. އަދި ކޮންމެ ރަކުއަތެއްގައި ދެ ފަހަރު ރުކޫޢުކޮށް، ދެ ފަހަރު ކިޔަވާނެއެވެ.
ކޭތަނަމާދު ކުރާނެ ގޮތް:
އެހެން ނަމާދުތައް ވެސް ކުރާ ފަދައިން ހަށަމް ބަނދެ، ސޫރަތުލް ފާތިހާ ކިޔަވާނީ. އެއަށް ފަހު ކިޔަވާނީ ސޫރަތުލް ބަޤަރާ، ނުވަތަ އެ ސޫރަތުގެ ދިގުމިނަށް.
- الله أكبر ކިޔައި ރުކޫޢު ކުރާނީ.
- سمع الله لمن حمد ކިޔައި ރުކޫޢުން ތެދުވެ، އަނެއްކާވެސް ހަށަމް ބަނދެ، ސޫރަތުލް ފާތިހާ ކިޔަވާނީ. އަދި އެއަށް ފަހު އާލް އިމްރާން ސޫރަތް، ނުވަތަ އެ ސޫރަތުގެ ދިގުމިނަށް ކިޔަވާނީ.
- الله أكبر ކިޔައި، ރުކޫއު ކުރާނީ.
- سمع الله لمن حمده ކިޔައި ތެދުވެ، އިޢުތިދާލުގައި ހުރުމަށްފަހު ދެ ސަޖިދަ ފުރިހަމަ ކުރުމުން ފުރަތަމަ ރަކުއަތް ނިމުނީ.
- ދެވަނަ ރަކުއަތަށް ތެދުވެ، ސޫރަތުލް ފާތިހާ ކިޔަވާނީ. އެއަށްފަހު ނިސާ ސޫރަތް ނުވަތަ އެ ސޫރަތުގެ ދިގުމިނަށް ކިޔަވާނީ.
- الله أكبر ކިޔައި ރުކޫއު ކުރާނީ.
- سمع الله لمن حمد ކިޔައި ރުކޫޢުން ތެދުވެ، އަނެއްކާވެސް ހަށަމް ބަނދެ، ސޫރަތުލް ފާތިހާ ކިޔަވާނީ. އަދި އެއަށް ފަހު މާއިދާ ސޫރަތް ނުވަތަ އެ ދިގުމިނަށް ކިޔަވާނީ.
- الله أكبر ކިޔައި ރުކޫއު ކުރާނީ.
- سمع الله لمن حمده ކިޔައި ތެދުވެ، އިޢުތިދާލުގައި ހުރުމަށްފަހު ދެ ސަޖިދަ ފުރިހަމަ ކޮށް، އައްތަހިޔާތު ކިޔަވައި، ސަލާމް ދިނުމުން ކޭތަ ނަމާދު ފުރިހަމަ ކުރެވުނީ.