13 Sep 2016, 13:43
ކާމިޔާބު ޑައިރެކްޓަރު ސަންޖޭ ލީލާ ބަންސާލީގެ ކުރިއަށް އޮތް އުންމީދީ ފިލްމު "ޕަދްމާވަތީ" ގެ ކާސްޓު މިހާރު ވަނީ ހަމަޖެހިފަ އެވެ. އަދި ފިލްމުގެ އެހެނިހެން ކަންކަން ވެސް ހަމައަކަށް އެޅިފައިވާ ކަމަށް ޚަބަރުތައް ބުނެ އެވެ. ނަމަވެސް ފިލްމުގެ ޝޫޓިންގެ މަސައްކަތް އަދިވެސް ނުފެށިގެން އުޅެނީ ކީއްވެ ހެއްޔެވެ؟
ޚަބަރުތައް ބުނާ ގޮތުން، 'ޕަދްމާވަތީ'ގެ މަސައްކަތް ނުފެށި ލަސްވަނީ ފައިސާގެ ދަތިކަމުގެ ސަބަބުންނެވެ.
ބަންސާލީގެ ކާމިޔާބު ދެ ފިލްމު 'ރާމް ލީލާ' އަދި 'ބާޖީރާއޯ މަސްތާނީ" ޕްރޮޑިއުސްކޮށްފައި ވަނީ އީރޯސް އިންޓަނޭޝަނަލް އިންނެވެ. އަދި ބަންސާލީގެ 'މެރީ ކޮމް' ކޯ-ޕްރޮޑިއުސް ކޮށްފައި ވަނޯ އީރޯސް އާއި އިތުރު އެހެން ކުންފުންޏަކުންނެވެ. އަދި 'ޕަދްމާވަތީ' ވެސް ކޯ ޕްރޮޑިއުސް ކުރާނީ އެ ދެ ކުންފުނިން ކަމަށް ބެލެވެ އެވެ.
ނަމަވެސް'ޕަދްމާވަތީ' ގެ ބަޖެޓު 150 ކުރޯޑު ރުޕީޒް އަށް އަރާ ކަމަށް ޚަބަރުތައް ބުނެ އެވެ. މިއީ ޕްރޮޑަކްޝަން ހައުސްތަކަށް ވަރަށް ބޮޑަށް ފައިސާގެ ދަތިކަން ކުރިމަތިވެފައިވާ ދުވަސް ކޮޅެކެވެ. އެހެންކަމުން ގިނަ ކުންފުނިތަކުން ފިލްމު ޕްރޮޑިއުސް ކުރުން ހުއްޓާލަން ވެސް ވަނީ ނިންމާފަ އެވެ.
މިފަދަ ދަނޑިވަޅެއްގައި 150 ކުރޯޑު ރުޕީޒް އިންވެސްޓު ކުރަން ފަސްޖެހެމުން އަންނާތީ ފިލްމުގެ މަސައްކަތް ލަސްވަނީ ކަމަށް ޚަބަރުތައް ބުނެ އެވެ.