11 Sep 2016, 11:42
ސްޕެނިޝް ލަލީގާ އަށް މި ސީޒަނުގައި އަލަށް ޕްރޮމޯޓުވި ޑިޕޯޓިވޯ އަލަވޭސް އަތުން އެންމެ ފަހުގެ ޗެމްޕިއަން ބާސެލޯނާ ބަލިވެ، ތާވަލުގެ ހަތަރު ވަނައަށް ވެއްޓިއްޖެ އެވެ.
އަމިއްލަ ދަނޑުގައި ރޭ ކުޅުނު ސްޕެނިޝް ލަލީގާ މެޗުގައި އަލަވޭސް އަތުން ބާސާ ބަލިވެފައިވަނީ 2-1 ލަނޑުންނެވެ.
ހައިރާންކުރަނިވި އެ ނަތީޖާއާ ގުޅިގެން މިހާރު ސްޕެނިޝް ލަލީގާގެ ތާވަލުގެ އެންމެ ކުރީގައި އޮތީ ވާދަވެރި ރެއާލް މެޑްރިޑެވެ. އެ ޓީމު ކުޅުނު ތިން މެޗުން ނުވަ ޕޮއިންޓް ހޯދާފައިވާ އިރު، ހަތަރު ވަނަ އަށް ވެއްޓުނު ބާސާ އަށް ކުޅުނު ތިން މެޗުން ލިބިފައިވަނީ ހަ ޕޮއިންޓެވެ. ދެ ވަނައިގައި އޮތް ސެވިއްޔާ އަށް ހަތް ޕޮއިންޓް ލިބިފައިވާ އިރު، ތިން ވަނައިގައި އޮތް ލަސް ޕަލްމާސް ބާސާ އަށް ވުރެ ކުރީގައި އޮތީ ގޯލުގެ ތަފާތުންނެވެ.
ސްޕެނިޝް ލަލީގާގައި ބާސެލޯނާ އާއި ޑިޕޯޓިވޯ އަލަވޭޒް ބައްދަލުކުރި މެޗުގެ ތެރެއިން: އެ މެޗުން ބާސާ ބަލިވެފައިވަނީ 2-1 ލަނޑުން --- ފޮޓޯ: ގެޓީ
މެޗުގެ ފުރަތަމަ ހާފުގެ ކުރީކޮޅުގައި ވެސް ބާސާ އަށް އަލަވޭސްގެ ގޯލަށް މާ ބޮޑު ނުރައްކަލެއް ކުރެވިފައެއް ނުވެ އެވެ. ނަތީޖާއެއްގެ ގޮތުން މެޗުގެ ފުރަތަމަ ހާފު ނިމެން ހަ މިނެޓަށް ވެފައި ވަނިކޮށް، އަލަވޭސް އިން ބާސާގެ ގޯލު ހުޅުވާލި އެވެ. ކިކޯ ފެމެނިއާ ނަގައިދިން ހުރަހަކުން އަލަވޭސް އަށް އެ ލަނޑު ކާމިޔާބުކޮށްދިނީ ޑޭވާސަން އެވެ. މެޗުގެ ފުރަތަމަ ހާފު ނިމިގެންދިޔައީ 1-0 ލަނޑުން ބާސާ ކުރީގައި އޮވެގެންނެވެ.
މެޗުގެ ދެވަނަ ހާފު ފެށިތާ މިނެޓެއް ފަހުން ބާސާ އިން ވަނީ ލަނޑެއް ޖަހައި ނަތީޖާ ހަމަހަމަކޮށްފަ އެވެ. ބްރެޒިލް ތަރި ނޭމާ ނަގައިދިން ކޯނަރަކުން ބާސާ އަށް އެ ލަނޑު ކާމިޔާބުކޮށްދިނީ އެ ޓީމުގެ ޑިފެންޑަރު ޖެރެމީ މެތިއު އެވެ.
މެޗުގެ ފުރަތަމަ ހާފުގައި ބާސާގެ މުހިންމު ތިން ކުޅުންތެރިން ކަމަށްވާ އާޖެންޓީނާ ތަރި ލިއޮނެލް މެސީ އާއި، އުރުގުއާއީ ތަރި ލުއިސް ސުއަރޭޒް އަދި ސްޕެއިން މިޑްފީލްޑަރު އަންދްރޭސް އިނިއެސްޓާ ނުފެނުނު ނަމަވެސް، ދެވަނަ ހާފުގައި އެ ކުޅުންތެރިން ކުޅެން ނުކުމެފައިވެ އެވެ.
މެސީ ކުޅެން ނުކުތްތާ ހަތަރު މިނެޓް ފަހުން އަލަވޭސް އިން ވަނީ އަލުން ލީޑު ހޯދައިފަ އެވެ. މެޗުގެ 64 ވަނަ މިނެޓުގައި އަލަވޭސް އަށް އަލުން ލީޑު ހޯދައިދިނީ އެ ޓީމުގެ ސްޕެއިން ފޯވަޑް އިބައީ ގޮމޭޒް އެވެ.