09 Sep 2016, 01:37
މޯލްޑިވްސް ޔުނައިޓެޑް އޮޕަޒިޝަން (އެމްޔޫއޯ)އިން މިރޭ މާލޭގައި ކުރި މުޒާހަރާ ކަވަރު ކުރަން އުޅުނު ރާއްޖެޓީވީ އާއި ސަންގުޓީވީގެ ހަތަރު ކެމެރާމަނަކު ފުލުހުންގެ ބެލުމުގެ ދަށަށް ގެންގޮސްފި އެވެ.
މިރޭ 12:15 އެހާކަންހާއިރު މަޖީދީމަގު، ޑިލައިޓް ކުރިމަތިން އެ ކެމެރާމަނުން ފުލުހުންގެ ބެލުމުގެ ދަށަށް ގެންދިޔައީ އެ ސަރަހައްދުގެ މަންޒަރުތައް ވަގުތުން ދުރަށް ފޮނުވަމުން ދަނިކޮށެވެ. އެ މީހުން ހައްޔަރު ކުރުމާއެކު ޓީވީ ސްޓޭޝަންތަކަށް ފޮނުވަމުން ދިޔަ މުޒާހަރާ ލައިވް ފީޑު ވަނީ ކެނޑިފަ އެވެ.
ޕޭވްމަންޓު މަތީގައި މަޑުކޮށްގެން ތިއްބައި ހަތަރު ކެމެރާމަނުން ފުލުހުންގެ ވެހިކަލަކަށް އަރުވައިގެން ގެންދިޔައިރު، އެހެން ނޫސްވެރިން ވެސް އެ މީހުންނާއެކު ސަރަހައްދުގައި ތިއްބެވެ. ކެމެރާމަނުން ފުލުހުން ގެންދިޔަ ވަގުތަކީ މުޒާހަރާގައި ހަމަނުޖެހުމެއް ހިނގަމުންދިޔަ ވަގުތެއް ނޫނެވެ.
ސެޕްޓެމްބަރ 8، 2016: އިދިކޮޅު އިއްތިހާދުން ކުރި މުޒާހަރާ ކަވަރު ކުރަން އުޅުނު ކެމެރާމަނަކު ފުލުހުންގެ ވެހިކަލަށް އަރުވަނީ--- ސަން ފޮޓޯ/ މުހައްމަދު އަފްރާހް
ފުލުހުންގެ އިންފޮމޭޝަން އޮފިސަރު އިސްމާއިލް އަލީ ވިދާޅުވީ ކެމެރާމަނުން ހައްޔަރު ކުރީ ފުލުހުންގެ ވާޖިބަށް ހުރަސް އެޅި ކަމުގެ ތުހުމަތުގައި ކަމަށެވެ.
ފުލުހުންގެ ވާޖިބަށް ހުރަސް އެޅުމަށް ކެމެރާމަނުން ކުރީ ކޮން ކަމެއްތޯ ސުވާލު ކުރުމުން އިސްމާއިލް ޖަވާބެއް ނުދެއްވަ އެވެ.
"އެ މީހުން އަދި ހައްޔަރެއް ނުކުރަން. ކެމެރާމަނުން ތިބީ ފުލުހުންގެ ބެލުމުގެ ދަށުގައި،" ފުލުހުންގެ އިންފޮމޭޝަން އޮފިސަރު ވިދާޅުވި އެވެ.
މިރޭގެ މުޒާހަރާގައި ފުލުހުންގެ ވާޖިބަށް ހުރަސް އެޅި ކަމުގެ ތުހުމަތުގައި މުޒާހަރާ ކުރަން އުޅުނު ނުވަ މީހަކު ވެސް ވަނީ ފުލުހުންގެ ބެލުމުގެ ދަށަށް ގެންގޮސްފަ އެވެ. އެ މީހުން ތިބީ ހައްޔަރުކޮށްފައި ނޫން ކަމަށާއި އެ މީހުން ތިބީ ފުލުހުންގެ ބެލުމުގެ ދަށަށް ގެންގޮސްފައި ކަމަށް ފުލުހުން ބުންޏެވެ.
ސަރުކާރާ ދެކޮޅަށް މޯލްޑިވްސް ޔުނައިޓެޑް އޮޕަޒިޝަނުން މިރޭ މުޒާހަރާ ކުރީ އަލްޖަޒީރާއިން އާންމު ކުރި ތަހުގީގީ ޑޮކިއުމެންޓްރީ، "ސްޓީލިން ޕެރަޑައިޒް"ގައި ކުރި ތުހުމަތުތައް ތަހުގީގު ކުރުމަށް ގޮވާލަ އެވެ. އަލްޖަޒީރާއިން ތުހުމަތުކޮށްފައިވާ ކަންކަން ތަހުގީގު ކުރުމަށް ރައީސުލްޖުމްހޫރިއްޔާ އަބްދުﷲ ޔާމީން ހައްޔަރު ކުރުމަށް ވެސް މިރޭގެ މުޒާހަރާގައި ވަނީ ގޮވާލާފަ އެވެ.
އިދިކޮޅު އިއްތިހާދުން މިރޭ މުޒާހަރާކޮށްފައި ވަނީ މާލޭގައި މުޒާހަރާ ކުރުމަކީ މަނާ ކަމެއްގެ ގޮތުގައި ގާނޫނުން ކަނޑައަޅާފައިވަނިކޮށެވެ.
ސުލްހަވެރިކަމާ އެކު އެއްވެ އުޅުމުގެ ގާނޫނަށް ސަރުކާރު ހިންގާ ޕީޕީއެމަށް ނިސްބަތްވެވަޑައިގަންނަވާ މާފަންނު ދެކުނު ދާއިރާގެ މެމްބަރު އަބްދުﷲ ރިފާއު ހުށަހެޅުއްވި އިސްލާހު މަޖިލީހުން ފާސްކޮށް، ރައީސުލްޖުމްހޫރިއްޔާ ތަސްދީގު ކޮށްފައިވާ އިރު، އެ އިސްލާހުގައި ބުނެފައި ވަނީ ރާއްޖޭގެ ވެރިކަން ކުރާ މާލޭގައި އެއްވެސް ބާވަތެއްގެ އެއްވުމެއް، ހިނގާލުމެއް އަދި އުޅަނދުބުރެއް ބޭއްވޭނީ ހޯމް މިނިސްޓްރީން ކަނޑައަޅާ ތަންތަނުގައި އެކަނި ކަމަށެވެ.
ހޯމް މިނިސްޓްރިން މިއަދު ކަނޑައަޅާފައި ވަނީ ފުލުހުންގެ ހުއްދަ ހޯދައިގެން މުޒާހަރާ ކުރެވޭނީ ކާނިވާ ސަރަހައްދުގައި އެކަނި ކަމަށެވެ.