08 Sep 2016, 20:15
ރާއްޖޭގައި އިންވެސްޓް ކުރުމަށް މިހާރު ހުރި ފުރުސަތުތަކާ ބެހޭ މައުލޫމާތު، ސްރީލަންކާގެ ވިޔަފާރިވެރިންނާ ހިއްސާ ކޮށް، ރާއްޖޭގައި އިންވެސްޓް ކުރުމަށް ލަންކާގެ ވިޔަފާރިވެރިންނަށް ދިވެހި ސަރުކާރުން ބާރު އަޅުއްވައިފި އެވެ.
ސްރީލަންކާގެ ވިޔަފާރިވެރިންގެ ޖަމިއްޔާ، ސިލޯން ޗެމްބާ އޮފް ކޮމާސް (ސީސީސީ)އިން މިއަދު ނެރުނު ބަޔާނެއްގައި ބުނި ގޮތުގައި، ސްރީލަންކާގައި ހުންނަވާ ދިވެހި ހައިކޮމިޝަނަރު ޒާހިޔާ ޒަރީރު ވަނީ، އެ ޖަމިއްޔާގެ އިސްވެރިންނާ ބައްދަލު ކުރައްވައި ރާއްޖޭގައި ހުރި ބައެއް މަޝްރޫއުތަކާ ބެހޭ މައުލޫމާތު އެފަރާތަށް އަރުވައިފަ އެވެ.
ލަންކާގައި ހުންނަވާ ދިވެހި ސަފީރު ޒާހިޔާ ޒަރީރު --
މިހަފްތާގައި ޒާހިޔާ ލަންކާގެ ވިޔަފާރިވެރިންގެ އެންމެ ބޮޑު ޖަމިއްޔާ ސީސީސީއާ ބައްދަލުކުރައްވައި، ރާއްޖޭގައި ހުރި ތަރައްގީގެ ބައެއް މަޝްރޫއުތައް ކަމުގައިވާ އެއާޕޯޓު ތަރައްގީ ކުރުން، ގެދޮރު އެޅުން، ހޮސްޕިޓަލު އެޅުން އަދި އިޔާދަކުރުވަނިވި ހަކަތައިގެ ދާއިރާގެ މަޝްރޫއުތައް ބައިނަލްއަގުވާމީ އިންވެސްޓަރުންނަށް ދާދި އަވަހަށް ހުޅުވާލެވޭނެ ކަމުގެ ޚަބަރު ދެއްވި ކަމަށް ސީސީސީގެ ބަޔާނުގައި ވެ އެވެ.
"މިހާރުވެސް ރާއްޖޭގައި ލަންކާގެ ގިނަ ކުންފުނިތަކެއް އޮޕަރޭޓު ކުރަމުން ދޭ. އަޅުގަނޑުމެން ބޭނުން ޝައުގުވެރިވާ އެހެން ކުންފުނިތަކުން ވެސް ރާއްޖޭގައި ހުރި މަޝްރޫއުތަކަށް ބިޑު ކުރަން،" ޒާހިޔާ ވިދާޅުވި ކަމަށް ސިލޯން ޗެމްބާ އޮފް ކޮމާސްއިން ބުނެ އެވެ.
ސީސީސީއިން ބުނީ، މޭވާ، ތަރުކާރީ އަދި މަސް ފަދަ ތަކެއްޗަށް ވުރެ ފުޅާ ދާއިރާއެއްގައި ލަންކާ އާއި ރާއްޖޭގެ ވިޔަފާރީގެ ގުޅުން ބަދަހި ކުރުމަށް ރާއްޖެއިން ބޭނުންވާ ކަމަށާއި، ދެގައުމުން މިހާރު ބަލަމުން ދަނީ ދެ ގައުމު ގުޅިގެން މަސައްކަތް ކުރެވޭނެ ދާއިރާތައް ބަލަމުން ކަމަށެވެ.
އެގޮތުން ރާއްޖޭގައި ދެ ގައުމު ގުޅިގެން ސިއްހަތާއި ތައުލީމީ ދާއިރާގައި މަސައްކަތް ކުރެވޭނެ ކަމުގެ ވާހަކަތައް ދެކެވުނު ކަމަށް ސީސީސީން ބުނެ އެވެ.