މިރޭ އިރާކޮޅު ގ. އެސްބަރި ގޭގައި އަލިފާން ރޯވެ، އެގެއަށް ބޮޑެތި ގެއްލުންތަކެއްވެއްޖެ އެވެ.

މިރޭ 10:00 ޖަހަން އުޅެނިކޮށް އަލިފާން ރޯވި އެސްބަރި ގެއަކީ ދެ ބުރިއަށް އިމާރާތްކޮށްފައިވާ ގެ އެވެ. ދިވެހިންނާއި ބިދޭސީންނާއެކު 35 މީހުން ދިރިއުޅޭ އެ ގޭގައި ހިންގި އަލިފާނުގެ ހާދިސާގައި އެއްވެސް މީހަކަށް ގެއްލުމެއް ނުވެ އެވެ.

އެސްބަރި ގޭގައި ރޯވި އަލިފާންގަނޑު ނިއްވާލެވުނީ ގަޑިއެއްހާއިރުގެ މަސައްކަތުންނެވެ. އެސްބަރި ގޭގައި ރޯވި އަލިފާންގަނޑުު ފެތުރުމުގެ ކުރިން، އެ ގެއިން ވަނީ 8 ގޭސް ފުޅި ނެރެފަ އެވެ.

އަލިފާން ރޯވި ގެއާ އިންވެގެން ހުރި އިމާރާތްތަކަށް ވެސް އަލިފާނުގެ އަސަރު ކުރި އެވެ. ނަމަވެސް އެ ގެތަކަށް އެހާ ބޮޑެތި ގެއްލުންތަކެއް ނުވެ އެވެ.

އެންމެ ބޮޑު ގެއްލުމެއް ވެފައި ވަނީ އަލިފާން ރޯވި އެސްބަރި ގެއަކަށެވެ. އެ ގޭގައި ދިރިނޫޅެވޭ ވަރަށް ވަނީ އަނދާފަ އެވެ.

އެސްބަރި ގެއަކީ ދުވަސްވީގެ އެވެ. އެގޭގައި ބައެއް ފާރުތައް ބަލިކަށިވުމުން އެގެއަށް ވަދެ އަލިފާން ނިއްވުމަށް ސިފައިންނަަށް ދަތިތަކެއް ކުރިމަތިވި އެވެ.

މިރޭގެ އަލިފާނުގެ ހާދިސާއާ ގުޅިގެން އެ ސަރަހައްދުގެ ތިން ގެއަކުން ކަރަންޓު ކަނޑާލާފައިވާއިރު، ދުމުގެ އަސަރުކޮށްގެން ފަސް މީހަކު ވަނީ ހޮސްޕިޓަލަށް ގެންގޮސްފަ އެވެ. އަދި އަވަސް ފަރުވާ ދިނުމަށް މޯލްޑިވްސް ރެޑްކްރެސެންޓުން ދަނީ ހަރަކާތްތެރިވަމުންނެވެ.

އެ ގޭގައި އަލިފާން ރޯވާން ދިމާވި ސަބަބެއް އަދި ހޯދިފައި ނުވާ ކަމަށް ފުލުހުން ބުނެ އެވެ.

ދުމުގެ އަސަރުކޮށްގެން ފަސް މީހަކު ހޮސްޕިޓަލަށް ގެންދިޔަ. ކަރަންޓް ކަނޑާލާފައި ވަނީ ތިން ގެއަކުން. އަލިފާން ރޯވި ގެ އާއި އެ ސަރަހައްދާ އިންވެގެން ހުރި ގެތަކުގައި މީހުން ދިރިނޫޅޭވޭ ވަރަށް ހުރި ގެތަކުގެ މީހުންނަށް ބޯހިޔާވަހިކަން ދިނުމަށް ޑިޒާސްޓާ މެނޭޖުމަންޓް ސެންޓަރުން އެ ސަރަހައްދުގައި ދަނީ ހަރަކާތްތެރިވަމުން.