06 Sep 2016, 14:56
ނިއުދިއްލީ (ސެޕްޓެމްބަރު 6): އިންޑިއާ އަށް ކުރަމުންދާ ވިއްސާރަައިގައި ބޯކޮށް ވާރޭ ވެހި ފެންބޮޑުވުމުގެ ސަބަބުން ބިހާރު ސްޓޭޓުން އެކަނި ވެސް މަރުވި މީހުންގެ އަދަދު 205އަށް އަރައިފި އެވެ.
އިންޑިއާގެ ނޫސްތަކުގައިވާ ގޮތުން ބިހާރު ސްޓޭޓުގެ 31 ޑިސްޓްރިކްޓަކަށް ވަނީ ފެންބޮޑުވުމުގެ އަސަރުކޮށްފަ އެވެ. އަދި ގަންގާ ކޯރު ފަދަ ބައެއް ކޯރުތަކުގެ ފެންގަނޑު ހިނދެމުން ދިޔަ ނަމަވެސް ބައެއް ސަރަހައްދުތަކުގައި އަދި ވެސް ކޯރުތައް ބަންޑުންވަމުންދާ ކަމަށް ނޫސްތަކުގައިވެ އެވެ.
ބިހާރު ސްޓޭޓުގެ ސަރުކާރުން އާއްމު ކުރި މައުލޫމާތުގައިވާ ގޮތުން ފެންބޮޑުވުމުގެ އަސަރު ބިހާރުގެ 4861 އަވަށަކަށް ކޮށްފައިވާ އިރު، 7.8 މިލިއަން މީހުންނަށް ވަނީ އެމީހުންގެ ގެދޮރު ދޫކޮށް ދާންޖެހިފަ އެވެ. އަދި ވިއްސާރައިގެ ސަބަބުން ދަނޑުބިންތަކަށް ލިބުނު ގެއްލުމުގެ އަގު 270 ކުރޯޑު ރުޕީސްއަށް އަރާނެ އެވެ. (އިންޑިއާޓުޑޭ)