06 Sep 2016, 13:19
ކާމިޔާބު އެކްޓަރު ރިތިކް ރޯޝަންގެ ފޭސްބުކް އެކައުންޓު ހެކް ކޮށްފިއެވެ.
ރިތިކްގެ ފޭސްބުކް އެކައުންޓު ހެކް ކޮށްފައި ވަނީ އިއްޔެއެވެ. އެކައުންޓު ހެކް ކުރުމަށް ފަހު ރިތިކްގެ ޕްރޮފައިލް ފޮޓޯ ބަދަލުކޮށް، ލައިވް ސްޓްރީމް ވެސް ކޮށްފައިވެއެވެ.
ރިޕޯޓުތައް ބުނާ ގޮތުން އެއީ ރިތިކްގެ ވީޑިއޯއެއް ނޫން ކަން އެނގުނީ 2500 އަށް ވުރެ ގިނަ މީހުން ލައިވް ސްޓްރީމް ވީޑިއޯ ބެލި ފަހުންނެވެ.
އެކައުންޓު ހެކް ކޮށް، ލައިވް ސްޓްރީމް ކުރަން ފެށިތާ މާ ގިނައިރު ނުވަނީސް އެކައުންޓު ވަނީ ޑީއެކްޓިވޭޓް ކޮށްފައެވެ. ނަމަވެސް މިހާރު އެކައުންޓު ވަނީ އެކްޓިވޭޓް ކޮށްފައެވެ.
ރިތިކް ވެސް ވަނީ އޭނާގެ ފޭސްބުކް އެކައުންޓު ހެކް ކޮށްފައި ވާކަން ޔަގީންކޮށްދީފައެވެ. ފޭސްބުކް މެދުވެރިކޮށް ރިތިކް ބުނެފައި ވަނީ މީހަކު އޭނާގެ އެކައުންޓު ހެކް ކޮށްފައިވާ ކަމަށާއި، ނަމަވެސް މިހާރު މައްސަލަ ހައްލުވެ އޭނާއަށް އެކައުންޓު އަނބުރާ ލިބިފައިވާ ކަމަށެވެ.
މިވަގުތު "ކާބިލް"ގެ ޝޫޓިން ގައި ހަރަކާތްތެރި ވަމުން އަންނަ ރިތިކް ވަނީ ސިއްހީ ހާލަތު ދަށްވުމުގެ ސަބަބުން މަސައްކަތުން ކުޑަ ބްރޭކެއް ވެސް ނަގައިފައެވެ.
ސަންޖޭ ގުޕްތާ ޑައިރެކްޓު ކުރާ "ކާބިލް" ގައި ރިތިކް އާއެކު ދެން ހަރަކާތްތެރި ވާނީ ޔަމީ ގޯތަމްއެވެ. އެ ފިލްމު ރިލީޒް ކުރުމަށް ހަމަޖެހިފައި ވަނީ އަންނަ އަހަރުއެވެ.