05 Sep 2016, 15:02
ރާއްޖެއަށް މަސައްކަތް ކުރަން އައި އިންޑިއާ މީހަކު މަރާލާފައިވާ ކަމަށް ބުނެ އޭނާގެ އާއިލާއިން އިންޑިއާގެ ފުލުހުންނަށް މައްސަލަ ހުށަހަޅައިފި އެވެ.
އެމައްސަލަ ހުށަހަޅާފައި ވަނީ 30 އަހަރުގެ ރާޖާ ކިޔާ މީހެއްގެ އާއިލާއިން ކަމަށް ޓައިމްސް އޮފް އިންޑިއާގައިވެ އެވެ. އެ ނޫހުގައިވާ ގޮތުން ރާާޖާގެ އާއިލާއިން ވަނީ މިދިޔަ މަހުގެ 27ގައި އޭނާއާ ފޯނުން ވާހަކަ ދައްކައިފަ އެވެ. އަދި އޭގެ މާގިނަ އިރުތަކެއް ނުވެ ރާޖާ މަސައްކަތް ކުރަމުން އައި ކުންފުނިން ވަނީ އޭނާ މަރުވެފައިވާ ކަން އާއިލާއަށް އަންގައިފަ އެވެ.
އޭގެ ފަހުން މިދިޔަ ހަފްތާގެ އަންގާރަ ދުވަހު ރާޖާގެ ހަށިގަނޑު އޭނާގެ އުފަންރަށް އަރިޔާލާއަށް ގެންދިޔަ ނަމަވެސް އާއިލާ އިން ވަނީ އޭނާގެ ހަށިގަނޑާ ހަވާލުވާން ދެކޮޅު ހަދައި މައްސަލަ ފުލުހުންނަށް ހުށަހަޅައިފަ އެވެ.
ޓައިމްސް އޮފް އިންޑިއާގައިވާ ގޮތުން އާއިލާ އިން ކުރި ޝަކުވާއާ ގުޅިގެން ރާޖާގެ ހަށިގަނޑު ވަނީ ޕޯސްޓްމޯޓަމް ހަދަން އަރިޔާލާގެ ހޮސްޕިޓަލަކަށް ފޮނުވައިފަ އެވެ. އަދި ފުލުހުން ދަނީ މައްސަލަ އިތުރަށް ތަހުގީގު ކުރަމުންނެވެ.
އެ މައްސަލައާ ގުޅޭ ގޮތުން ރާއްޖޭގެ ފުލުހުންގެ ބަހެއް އަދި ވަނީ ލިބޭ ގޮތް ނުވެފަ އެވެ.