05 Sep 2016, 10:31
ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) އާއި އަދާލަތު ޕާޓީގައި ރައީސަކު ނުހުންނާނެ ކަމަށް އިލެކްޝަންސް ކޮމިޝަނުން ބުނެފި އެވެ.
އަމިއްލަ ފަރާތަކުން އިލެކްޝަންސް ކޮމިޝަނަށް ފޮނުވި ސިޓީއެއްގެ ޖަވާބުގައި އެކޮމިޝަނުން ބުނެފައިވަނީ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)ގެ ރައީސަކީ ކުރީގެ ރައީސް މައުމޫނު އަބްދުލް ގައްޔޫމު ކަމަށެވެ.
ނަމަވެސް އެމްޑީޕީ އަދި އަދާލަތު ޕާޓީގައި މިވަގުތު ރައީސެއް ނުހުންނާނެ ކަމަށް އިލެކްޝަނުން ވަނީ ބުނެފައެވެ. ސަބަބެއް ކަމަށް އެ ސިޓީ ގައި ބުނެފައި ވަނީ އެ ދެ ޕާޓީގެ ރައީސް ކަމުގައި ތިބި ބޭފުޅުން ޖަލު ހުކުމެއް ތަންފީޒު ކުރަމުން ދާތީ ކަމަށެވެ.
އަދާލަތުޕާޓީގެ ރައީސް ޝެއިޚް އިމްރާނާއި އެމްޑީޕީގެ ޗެއާ ޕާސަން އަލީ ވަހީދާއި މަޖިލިސް މެމްބަރު ފަލާހު، މޭޑޭ މުޒާހަރާގެ ތެރެއިން -- ސަން ފައިލް ފޮޓޯ
އިލެކްޝަންސް ކޮމިޝަނުން އެހެން ބުނެފައިވަނީ ދިވެހިރާއްޖޭގެ ޖަލުތަކާ ޕެރޯލްގެ ގާނޫނުގެ 64 ވަނަ މާއްދާއަށް މިދިއަ އަހަރު ރައްޔިތުންގެ މަޖިލީހުން ގެނައި އިސްލާހާ ގުޅިގެންނެވެ.
އެ އިސްލާހުގައި ވާގޮތުން ޖަލުގައި ހުކުމެއް ތަންފީޒު ކުރަމުން ދާނަމަ ސިޔާސީ ޕާޓީއެއްގެ އެއްވެސް އިސް މަގާމެއްގައި ނުހުރެވޭނެ އެވެ. ނަމަވެސް އާންމު މެމްބަރެއްގެ ގޮތުގައި ހުރެވޭނެ ކަމަށް އިސްލާހުގައިވެ އެވެ.