02 Sep 2016, 15:17
ކުރީގެ ފޮރިން މިނިސްޓަރު ދުންޔާ މައުމޫނަށް ނިސްބަތްކުރައްވައި ފިޝަރީޒް މިނިސްޓަރު ޑރ. މުހައްމަދު ޝައިނީ އިއްޔެ ރޭ މީޑިއާގައި ދެއްކެވި ވާހަކަ ތަކަކީ ހަގީގަތާ ހިލާފު ވާހަކަތަކެއް ކަމަށް ޕީޕީއެމް އިން ބުނެފިއެވެ.
އެ ޕާޓީން އާންމުކުރި ބަޔާނެއްގައި ބުނީ އެއީ ކުރީގެ ރައީސް މައުމޫން އަބްދުލްގައްޔޫމާއި އެމަނިކުފާނުގެ އާއިލާގެ ބޭފުޅުންނާއި ޕީޕީއެމްގެ އަގުވައްޓާލުމަށް މިނިސްޓަރު ޝައިނީ ދެއްކެވި ވާހަކަފުޅުތަކެއް ކަމަށެވެ. އަދި އެ ވާހަކަތައް ޕީޕީއެމްގެ ފަރާތުން ހަރުކަށި އިބާރާތުން ކުއްވެރިކުރާ ކަމަށެވެ.
އިއްޔެ ރޭ ސަންގު ޓީވީގެ ހަބަރަށްފަހު ޕްރޮގްރާމްގައި ރިޕޯޓަރު ދެންނެވި ސުވާލެއްގެ ޖަވާބުގައި މިނިސްޓަރު ޝައިނީ ވިދާޅުވީ، ކުރީގެ ފޮރިން މިނިސްޓަރުގެ މަގާމުގައި ހުންނެވި ކުރީގެ ރައީސް މައުމޫން އަބްދުލްގައްޔޫމްގެ ދަރިކަނބަލުން ދުންޔާ މައުމޫނަކީ ފެއިލްވެފައިވާ ބޭފުޅެއް ކަމަށެވެ. އެ ޕްރޮގްރާމްގައި މިނިސްޓަރު ޝައިނީ ވަނީ ދުންޔާ ކުރެއްވި ޓުވީޓަކަށް ރައްދުދެއްވާފައެވެ.
މިދިޔަ މަހުގެ ކުރީކޮޅު މަގާމުން އަމިއްލަފުޅަށް އިސްތިއުފާދެއްވި ދުންޔާ މިދިޔަ އަންގާރަ ދުވަހު ކުރެއްވި ޓުވީޓުގައި ވިދާޅުވެފައި ވަނީ، އާއުސްމިންތަކަށް ދިއުމަށް، އަދި ބާއްޖަވެރި މުސްތަގްބަލަކަށް ވާސިލްވުމަށް ވަތަން އެދޭ އަދި ރައްޔިތުން އެދޭ ހެޔޮ ބަދަލުތައް އައުން މުހިއްމު ކަމަށެވެ.
އެ ޓުވީޓްގައި ކުރީގެ ސަރުކާރުން ކެމްޕެއިން ދުވަސްވަރު ބޭނުންކޮށްފައިވާ ބައެއް ކަންތައްތައް ފާހަގަކޮށްފައި ހުރި ކަމަށާއި ރައީސް މައުމޫންގެ އާއިލާގެ ބޭފުޅުންނާއި އެމަނިކުފާނަށް ތާއީދު ކުރައްވާ ބޭފުޅުން ސަރުކާރަށް ފާޑުކިޔަމުންދާ ކަމަށް ރިޕޯޓަރު ދެންނެވުމުން ޝައިނީ ވިދާޅުވީ، 2008 ވަނަ އަހަރު ވިދާޅުވި ކަންތައްތަކީ ފެއިލްވެފައި އޮތް ކަންތައްތަކެއް ކަމަށެވެ.
އަދި ވިދާޅުވީ، ދުންޔާ އެވާހަކަތައް ދައްކަވާ ނަމަ އެކަމަނާ ވެސް ހުންނެވި ފަޅި އޮތީ ފެއިލްވެފައި ކަމަށާއި ދުންޔާ އަކީ ވެސް ފެއިލްވެފައިވާ ބޭފުޅެއް ކަމަށެވެ.
"ދެހާސް އަށް ވަނަ އަހަރުގެ ތިޔަ ވިދާޅުވި ކަންތައްތަކީ ފެއިލްވެފަ އޮތްކަމެއް. އެއީ ދުންޔާ ނުކުމެ އެވާހަކަ ދައްކަވާއިރުގައި އެކަމަނާ ހުންނެވި ފަޅި އެއޮތީ ފެއިލްވެފައި. އޭރުގައި. އޭގެން މިސާލު ނަންގަވައިގެން ކުރާކަމަކަށް އަޅުނގަޑު އެއްޗެކޭ ދަންވާކަށް ނެތިން. ކެރިވަޑައިގެން އަޅުނގަޑުމެންނާ އެކު މަސައްކަތްކޮށްލަވާކަށް ނުކެރުނު. އިސްތިއުފާ ދީފަ ދިޔައީ. އެއީ ވާނީ ފެއިލިއާއެއް ކަމަށް. ފެއިލްވެފައިވާ މީހެއްގެ ވާހަކަ މިތާކު ދައްކާކަށް ނެތިން،" ޝައިނީ ވިދާޅުވިއެވެ.
ޕީޕީއެމުން އިއްޔެ ނެރުނު ބަޔާނުގައި ބުނީ އެޕާޓީން ގަބޫލުކުރާ ގޮތުގައި ދުންޔާ އެ މަގާމުން އިސްތިއުފާ ދެއްވި ސަބަބު ވަރަށް ސާފުކޮށް ރައްޔިތުންނަށް ހާމަކޮށްދެއްވާފައިވާ އިރު، ރައްޔިތުންނަށް އޮޅުން އަރާގޮތަށް ވާހަކަތައް ދެއްކުމަކީ އެޕާޓީގެ އާންމު މެންބަރުންގެ ހިތްތަކުގައި ނުތަނަވަސްކަން އުފައްދައި ރައީސް މައުމޫނާއި އެމަނިކުފާނުގެ އާއިލާގެ މެންބަރުންނާ މެދު ޕާޓީގެ އާންމު މެންބަރުންގެ ހިތުގައި ނަފުރަތު އުފައްދަން ކުރާ ކަމެއް ކަމަށެވެ.
ބައެއް ފަރާތްތަކުން ކުރީގެ ރައީސް މައުމޫނާ ގުޅޭގޮތުން ދައްކާ ވާހަކަ ވެސް ޕީޕީއެމުން ކުށްވެރިކުރެއެވެ. އެގޮތުން އެފަދަ މައުލޫމާތުތައް ފަތުރާ ފަރާތްތަކުން ޒިންމާދާރުކަމާއެކު އެކަން ކުރުމަށް ޕީޕީއެމުން ގޮވާލައެވެ.