Last Updated: 9 year 3 month ago

Last Updated:
9 year 3 month ago

ބަންގާޅުގެ އެތަކެއް ހާސް ސަޕޯޓަރުންގެ ކުރިމަތީގައި ދިވެހި ޓީމަށް ތަފާތު ބޮޑު މޮޅެއް

ގަލޮޅު ދަނޑުން: އަލީ ރިފްޝާން، މުއާވިއަތު އަންވަރު، އަހްމަދު މުޖްތަބާ

ބުލޮގު ޚުލާސާ

އެކުވެރިކަމުގެ މެޗުގައި މިރޭ ރާއްޖެ އާއި ބަންގްލަދޭޝް ބައްދަލުކުރާ މެޗުގެ ލައިވް ކަވަރޭޖަށް "ސަން"ގެ ކިޔުންތެރީންނަށް މަރުހަބާ!

ގައުމީ ފުޓްބޯޅަ ދަނޑުގައި މިރޭ 9:00ގައި ކުޅޭ މެޗަށް ނުކުންނަ އިރު:

1980ގެ އަހަރުތަކުގައި ކުޅުނު ތިން މެޗެއްގައި ބަންގްލަދޭޝް އަތުން ރާއްޖެ ވަނީ ބޮޑު ތަފާތަކުން ބަލިވެފައި. ސާފް ގޭމްސްގައި 1984ގައި ކުޅުނު ދެ މެޗުން ވެސް 5-0 ލަނޑުން ރާއްޖެ ބަލިވި އިރު، ސާފް ގޭމްސް 1985ގައި ރާއްޖެ ބަލިވެފައިވަނީ 8-0 ލަނޑުން.
އެއަށްފަހު ދެން ރާއްޖެ އާއި ބަންގްލަދޭޝްގެ ކުރިމަތިލުމެއް ފެނިގެންދިޔައީ 1995 ވަނަ އަހަރު އެކުވެރިކަމުގެ މެޗެއްގައި. އެ މެޗު ނިމިގެންދިޔައީ ދެ ޓީމުންކުރެ އެއްވެސް ޓީމަކަށް ލަނޑެއް ނުޖެހި އެއްވަރުވެގެން.
ސާފް ޗެމްޕިއަންޝިޕް 1997ގައި ވެސް ރާއްޖެ އާއި ބަންގްލަދޭޝްގެ ކުރިމަތިލުން ނިމިގެންދިޔައީ އެއްވަރުވެގެން. އެ މެޗުގައި ރާއްޖޭން ކާމިޔާބުކުރި ލަނޑު ޖަހައިދިނީ ލިރުގާން ސައީދު.
ރަސްމީ މެޗެއްގައި ބަންގްލަދޭޝްގެ މައްޗަށް ރާއްޖެ އަށް ފުރަތަމަ ކުރި ހޯދުނީ ސާފް ގޭމްސް 1997ގައި. އެ މެޗުން 2-1 ލަނޑުން ރާއްޖެ މޮޅުވި އިރު، މެޗުގައި ރާއްޖޭގެ ލަނޑުތައް ކާމިޔާބުކޮށްދިނީ މުހައްމަދު ނިޒާމް (ތޮއްޑޫ) އާއި އަލީ ޝިހާމް.
ރާއްޖޭގައި 2000 ވަނަ އަހަރު ބޭއްވި ގޯލްޑަން ޖުބިލީ ފުޓްބޯޅަ މުބާރާތުގައި ބަންގްލަދޭޝް އާއި ރާއްޖެ ކުޅުނު މެޗު ނިމިގެންދިޔައީ 1-1 ލަނޑުން އެއްވަރުވެގެން. އެ މެޗުގައި ރާއްޖޭގެ ލަނޑު ކާމިޔާބުކޮށްދިނީ އިބްރާހިމް ފަޒީލް (އޮއްޕޮ).
ސާފް ޗެމްޕިއަންޝިޕް 2003ގެ ގްރޫޕް ސްޓޭޖް މެޗުގައި 1-0 ލަނޑުން ބަންގްލަދޭޝް މޮޅުވި އިރު، އެ މުބާރާތުގެ ފައިނަލުގައި ރާއްޖެ އަތުން ބަންގްލަދޭޝް މޮޅުވެފައިވަނީ ޕެނަލްޓީ ޖަހައިގެން. އެ މެޗުގެ ފުރިހަމަ ވަގުތު ހަމަވި އިރު، 1-1 ލަނޑުން ދެ ޓީމު ވަނީ އެއްވަރުވެފައި. މެޗުގައި ރާއްޖޭގެ ލަނޑު ކާމިޔާބުކޮށްދިނީ އަލީ އުމަރު.
ސާފް ޗެމްޕިއަންޝިޕް 2011ގެ ގްރޫޕް ސްޓޭޖު މެޗުގައި ބަންގްލަދޭޝް އަތުން ރާއްޖެ މޮޅުވީ 3-1 ލަނޑުން. އެ މެޗުގައި ރާއްޖޭން ކާމިޔާބުކުރި ތިން ލަނޑުގެ ތެރެއިން ދެ ލަނޑު އަހްމަދު ޠާރިގް (ޓޮމް) ކާމިޔާބުކޮށްދިން އިރު، ތިން ވަނަ ލަނޑު ކާމިޔާބުކޮށްދިނީ އަލީ އަޝްފާގު (ދަގަނޑޭ).
އެންމެ ފަހުން ރާއްޖެ އާއި ބަންގްލަދޭޝްގެ ކުރިމަތިލުމެއް ފެނިގެންދިޔައީ މިދިޔަ އަހަރު އިންޑިއާގައި ބޭއްވި ސާފް ޗެމްޕިއަންޝިޕްގައި. ގްރޫޕް ސްޓޭޖުގައި ކުޅުނު އެ މެޗުން ރާއްޖެ މޮޅުވެފައިވަނީ 3-1 ލަނޑުން. މެޗުގައި ރާއްޖޭގެ ލަނޑުތައް ކާމިޔާބުކޮށްދިނީ އަލީ އަޝްފާގު (ދަގަނޑޭ) އާއި، ނާއިޒް ހަސަން (ދާދު) އަދި އަހްމަދު ނާޝިދު (ނައްޓޭ).

23:08

ވޯލްޑް ކަޕް ކޮލިފައިން ޕްލޭއޮފް ގައި ލާއޯސްއާ ދެކޮޅަށް ރާއްޖެ ކުޅެން ޖެހޭ މެޗަށް ތައްޔާރުވުމުގެ ގޮތުން މިރޭ ގަލޮޅު ދަނޑުގައި ބަންގާޅުގެ އެތަކެއް ހާސް ސަޕޯޓަރުންގެ ކުރިމަތީގައި ރާއްޖެއާއި ބަނގުލަދޭޝް ކުޅުނު ބައިނަލްގްވާމީ އެކުވެރިކަމުގެ ފުޓްބޯޅަ މެޗުން 5-0 ލަނޑުގެ ތަފާތު ބޮޑު ނަތީޖާއަކުން ރާއްޖެ މޮޅުވެއްޖެއެވެ.

މިރޭގެ މެޗުގެ ފުރަތަމަ ހާފްގައި ބަންގާޅު ޓީމުން ރަނގަޅު ކުޅުމެއް ފެނިގެން ދިޔައިރު ފުރަތަމަ ހާފް ނިމުނީ ދެޓީމުންކުރެ ޓީމަކަށް ލަނޑެއް ކާމިޔާބު ނުކުރެވިއެވެ. އެހެން ނަމަވެސް ދެވަނަ ހާފްގެ ކުޅުން ފަށައިގެން 53 ވަނަ މިނިޓްގައި ރާއްޖޭ ޓީމުން ވަނީ ލީޑު ނަގައިފައެވެ. ރާއްޖޭގެ ފުރަތަމަ ލަނޑު ކާމިޔާބުކޮށްދިނީ، މެޗުގައި ތިން ލަނޑު ކާމިޔާބުކޮށް ހެޓްރިކެއް ފުރިހަމަކުރި އަސަދުﷲ އަބްދުﷲ އެވެ.

ރާއްޖޭ ޓީމުން ލަނޑު ޖަހަން ފެށުމާއެކު ދަނޑަށް ވަދެ ތިބި ބަންގާޅު ސަޕޯޓަރުން ދަނޑުން ނުކުމެގެންދިޔައެވެ. ހަމަ އެއާއެކު ދިވެހީންގެ ދަނޑުގައި ދިވެހި މަދު ސަޕޯޓަރުންގެ ކުރިމަތީގައި ކުޅެމުން ދިޔަ ދިވެހި ޓީމުން ވަނީ، މެޗުގެ ފަހު ކަށިގަނޑު ރެފްރީ ފުމެލުމުގެ ކުރީން ބަންގާޅުގެ މައްޗަށް 5 ލަނޑުގެ ލީޑެއް ނަގައިފައެވެ. ރާއްޖޭގެ އަނެއް ދެލަނޑު ކާމިޔާބުކުރީ ހަމްޒާ މުހައްމަދާއި އިސްމާއީލް އީސާއެވެ.

މިއީ ދިވެހި ފުޓްބޯޅައިގެ ތާރީޚްގައި ބަނގުލަދޭޝް އަތުން ރާއްޖެ މޮޅުވި އެންމެ ތަފާތު ބޮޑު ނަތީޖާއެވެ. 1980ގެ އަހަރުތަކުގައި ކުޅުނު ތިން މެޗެއްގައި ބަންގްލަދޭޝް އަތުން ރާއްޖެ ވަނީ ބޮޑު ތަފާތަކުން ބަލިވެފައެވެ. ސާފް ގޭމްސްގައި 1984ގައި ކުޅުނު ދެ މެޗުން ވެސް 5-0 ލަނޑުން ރާއްޖެ ބަލިވި އިރު، ސާފް ގޭމްސް 1985ގައި ރާއްޖެ ބަލިވެފައިވަނީ 8-0 ލަނޑުންނެވެ.

ވޯލްޑް ކަޕް ކޮލިފައިން ޕްލޭ އޮފްގައި ލާއޯސްއާ ދެކޮޅަށް ރާއްޖެ ކުޅޭ ފުރަތަމަ ލެގްގެ މެޗު އޮންނާ އަންނަ އަންގާރަ ދުވަހުގެ ރޭ 9:00ގައި ރާއްޖޭގެ ގައުމީ ފުޓްބޯޅަ ދަނޑުގައެވެ. ދެވަނަ ލެގުގެ މެޗު ކުޅޭނީ 11 ވަނަ ދުވަހު ލާއޯސްގައެވެ.