01 Sep 2016, 13:11
އަލްގުދުސް(ސެޕްޓެމްބަރު 1): ފަލަސްތީނުގެ ވެސްޓެ ބޭންކުގައި އިސްރާއީލުން ހިފާފައިވާ ބިންތަކުގައި 464 ގެ އެޅުމަށް އިސްރާއީލުން ޔަހޫދީންނަށް ހުއްދަ ދީފައިވާ ކަމަށް ޕީސް ނައު ޖަމިއްޔާ އިން ބުނެފިއެވެ.
ވެސްޓް ބޭންކުގައި ގެ އެޅުމަށް މިދިޔަ އަންގާރަ ދުވަހު އިސްރާއީލުން ހުއްދަ ދީފައިވާ ސަރަހައްދުތަކުގެ ތެރޭގައި އަލްގަނާ، ބެއިތު އާރީ، ގިވަތު ޒީވް އަދި އޮފާރިމް ހިމެނެއެވެ.
އިސްރާއީލުން ހިފާފައިވާ ބިންތަކުގެ ކަންތައްތައް މޮނިޓާ ކުރާ ޖަމްއިއްޔާއެއް ކަމަށްވާ ޕީސް ނައުއިން ބުނި ގޮތުގައި އެ ގެތަކާ ލައިގެން، މިއަހަރު ތެރޭ އިސްރާއީލުން ވަނީ ވެސްޓް ބޭންކުގައި 2،363 ގެ އެޅުމަށް ހުއްދަ ދީފައެވެ. އޭގެ ތެރޭގައި ގަވާއިދާ ހިލާފަށް އަޅާފައިވާ 756 ގެއެއް ހިމެނޭ ކަމަށް ޕީސް ނައު އިން ބުންޏެވެ.
އިސްރާއީލުން ފަލަސްތީނުގެ ވެސްޓް ބޭންކާއި އިރުމަތީ ގުދުސް، 1967 ވަނަ އަހަރު ހިފި ފަހުން އެސަރަހައްދުތަކުގައި ދިރިއުޅޭ އިސްރާއީލު ރައްޔިތުންގެ އަދަދު ވަނީ 570،000ށް އަރާފައެވެ. ވެސްޓް ބޭންކުގައި އިސްރާއީލުން ގެ އެޅުމަކީ ބައިނަލްއަގުވާމީ ގާނޫނުތަކާ ހިލާފުކަމެއް ނަމަވެސް އިސްރާއީލުން އެކަމާ ދެކޮޅުހަދައެވެ. (ބީބީސީ)