31 Aug 2016, 15:22
އެސްޓީއޯ އިން ބާޒާރަށް ނެރެ ވިއްކަމުންދާ އަލްނޫރު އަދި ޑެވޮންޑޭލް ހިކި ކިރު ގެ އަގު މިއަދު ހެޔޮކޮށްފި އެވެ.
އެސްޓީއޯ އިން ނެރުނު ބަޔާނެއްގައި ބުނީ އަލްނޫރު ހިކި ކިރު ޕެކެޓްގެ އަގަށް ގެނައި ބަދަލާ ގުޅިގެން ކުރިން 85 ރުފިޔާ އަށް ވިއްކަމުން އައި 800 ގްރާމްގެ ޕެކެޓެއްގެ އަގު ވަނީ 80 ރުފިޔާ އަށް ހެޔޮކޮށްފައި ކަމަށެވެ.
އޭގެ އިތުރުން 185 ރުފިޔާ އަށް ވިއްކަމުން އައި 1800 ގްރާމްގެ ޕެކެޓެއްގެ އަގު ވަނީ 180 ރުފިޔާ އަށް ހެޔޮކޮށްފައި ކަމަށާއި އަދި 228 ރުފިޔާ އަށް ވިއްކަމުން އައި 2250 ގްރާމްގެ ޕެކެޓެއްގެ އަގު ވަނީ 220 ރުފިޔާ އަށް ހެޔޮކޮށްފައި ކަމަށެވެ.
އެ ބަޔާނުގައި ބުނީ ޑެވޮންޑޭލް ހިކިކިރު 105 ރުފިޔާ އަށް ވިއްކަމުން އައި އެއް ކިލޯ ޕެކެޓެއްގެ އަގު ވަނީ 100 ރުފިޔާއަށް ހެޔޮކޮށްފައި ކަމަށެވެ.
އެސްޓީއޯ އިން މައުލޫމާތު ދޭގޮތުގައި މާލޭ ގައި ހުންނަ އެސްޓީއޯ ސުޕަމާޓް ފިހާރައިން ރީޓެއިލްކޮށް އަދި އަލަށް ހުޅުވި ސުޕަމާޓް ހޯލްސޭލް ސެންޓަރުން ހޯލްސޭލްކޮށް އަލްނޫރު އަދި ޑެވޮންޑޭލް ލިބެން ހުނާނެ އެވެ.
އެ ދެ ފިހާރައިގެ އިތުރުން، އެސްޓީއޯގެ 13 ރީޖަނަލް ފިހާރައިން ވެސް އަލްނޫރު އަދި ޑެވޮންޑޭލް ބުރޭންޑްގެ ހިކި ކިރު ހޯލްސޭލްކޮށް އަދި ރީޓެއިލް ކޮށް މާލެ އެކޭ އެއްއަގެއްގައި ލިބެން ހުންނާނެ ކަމަށް އެ ކުންފުނިން މައުލޫމާތުދެ އެވެ.